‘જો ન્યાય નહીં મળે તો હું દેશ છોડી દઈશ…’, સિદ્ધુ મૂસેવાલાના પિતાએ વ્યક્ત કર્યું દુઃખ

પંજાબી ગાયક સિદ્ધુ મુસેવાલાની હત્યાને 5 મહિનાથી વધુ સમય થઈ ગયો છે. સિંગરના ફેન્સ રવિવારે તેના ઘરે પહોંચ્યા હતા. તેમને સંબોધતા સિદ્ધુ મુસેવાલાના પિતાએ પોતાનું દર્દ વ્યક્ત કર્યું. સરકાર અને સિસ્ટમ પર સવાલ ઉઠાવતા તેમણે કહ્યું કે, જો ન્યાય નહીં મળે તો અમે દેશ છોડીને જઈશું.

ન્યાય હજુ મળ્યો નથી

સિદ્ધુ મુસેવાલાના પિતા બલકાર સિંહે કહ્યું કે, “મેં દેશની સેવા કરી છે. હું એક નિવૃત્ત સૈનિક છું. હું સતત ન્યાયની માંગ કરી રહ્યો છું. પરંતુ હજુ સુધી ન્યાય મળ્યો નથી, પરંતુ મને હેરાન કરવામાં આવી રહ્યો છે”. તેમણે કહ્યું કે તેમણે ડીજીપીને મળવા માટે સમય માંગ્યો છે. 25મી નવેમ્બર સુધી રાહ જોવાશે. તેમ છતાં જો ન્યાય નહીં મળે તો તે દેશ છોડી જશે. બલકાર સિંહે ગંભીર આરોપ લગાવતા કહ્યું કે તપાસ એજન્સી પણ છોકરીઓને હેરાન કરી રહી છે. જેઓ પુત્ર સાથે સહાનુભૂતિપૂર્વક જોડાયેલા હતા તેઓને હેરાન કરવામાં આવી રહ્યા છે. જાની જોહલ (પંજાબી સિંગર)ને નોટિસ મોકલવામાં આવી છે.

પુત્રની બદનામી થઈ રહી છે

બલકાર સિંહનું કહેવું છે કે તપાસ એજન્સી કે સરકારને જે પણ પ્રશ્નો પૂછવાના હોય તે અમને પૂછો. તેમણે કહ્યું કે સિદ્ધુ મુસેવાલાની પિસ્તોલ, મોબાઈલ અને વાહન હજુ પણ પોલીસ પાસે છે. મારા પુત્રને બદનામ કરવામાં આવી રહ્યો છે.

પુત્રનો કેસ પાછો ખેંચી લેશે

બલકાર સિંહે સરકાર અને સિસ્ટમ પર અનેક આરોપો લગાવ્યા છે. તેમણે બેફામપણે કહ્યું હતું કે, “જો તેમની વાત નહીં સાંભળવામાં આવે તો તેઓ પુત્રનો કેસ પાછો ખેંચી લેશે. ભલેને તેમને બાંગ્લાદેશ જઈને રહેવું પડે. સરકારને કોઈનો દીકરો મરી ગયો હોય તેની પરવા નથી. તેમને માત્ર ચૂંટણીની જ ચિંતા છે.” સરકારની ખરાબ વ્યવસ્થાને કારણે યુવાનો સતત વિદેશ જતા રહે છે. સિદ્ધુ મુસેવાલાની માતાએ પણ લોકોને સંબોધિત કર્યા. તેમણે કહ્યું કે સિદ્ધુએ ક્યારેય કોઈને નુકસાન કર્યું નથી. કેટલાક લોકો તેને બદનામ કરી રહ્યા છે. સિદ્ધુ ધાર્મિક એપ તૈયાર કરીને યુવાનોને સારા માર્ગ માટે પ્રેરિત કરવા માંગતા હતા.

આ પણ વાંચો : પાકિસ્તાનઃ ઈમરાન ખાન અને શાહબાઝ શરીફ સામ-સામે, પૂર્વ PMએ વાતચીતના દાવાને રદિયો આપ્યો