ICCએ 3 પાકિસ્તાની ખેલાડીઓ પર લગાવ્યો દંડ, કારણ જાણીને તમે પણ ચોંકી જશો

કરાચી, 13 ફેબ્રુઆરી : કરાચીમાં તા.12 ફેબ્રુઆરીએ પાકિસ્તાન, ન્યુઝીલેન્ડ અને દક્ષિણ આફ્રિકા વચ્ચે ચાલી રહેલી ત્રિકોણીય શ્રેણીની મહત્વપૂર્ણ મેચ રમાઈ હતી. જ્યાં પાકિસ્તાનની ટીમ છ વિકેટના અંતરથી જીતવામાં સફળ રહી હતી. મેચ દરમિયાન બંને ટીમો વચ્ચે મેદાન પર કેટલીક ઉગ્ર દલીલો જોવા મળી હતી. જેના પર ICCએ હવે કડક વલણ અપનાવ્યું છે. પાકિસ્તાનના સ્ટાર ફાસ્ટ બોલર શાહીન શાહ આફ્રિદી સહિત ત્રણ ખેલાડીઓ પર આચાર સંહિતાનું ઉલ્લંઘન કરવા બદલ દંડ ફટકારવામાં આવ્યો છે.

ICCએ આફ્રિદીને તેની મેચ ફીના 25% દંડ ફટકાર્યો છે. કારણ કે તેણે બુધવારે દક્ષિણ આફ્રિકા સામે મેથ્યુ બ્રિટ્ઝકેના રનમાં જાણી જોઈને અવરોધ ઊભો કર્યો હતો. આ દરમિયાન અથડામણના કારણે તેમની વચ્ચે બોલાચાલી થઈ હતી. આફ્રિદી સિવાય અન્ય ખેલાડીની જગ્યાએ મેદાનમાં ઉતરેલા તેના સાથી ખેલાડી સઈદ શકીલ અને કામરાન ગુલામને પણ મેચ ફીના 10% દંડ ફટકારવામાં આવ્યો છે. આ બંને બેટ્સમેનોએ 29મી ઓવરમાં રનઆઉટ થયા બાદ દક્ષિણ આફ્રિકાના કેપ્ટન ટેમ્બા બાવુમાની ખૂબ નજીક જઈને ખોટી રીતે ઉજવણી કરી હતી.

આટલું જ નહીં ICC દ્વારા આ ત્રણ ખેલાડીઓના અનુશાસનાત્મક રેકોર્ડમાં એક ડિમેરિટ પોઈન્ટ પણ જોડવામાં આવ્યો છે. ICCએ કહ્યું છે કે ત્રણેય ખેલાડીઓએ પોતાની ભૂલ સ્વીકારી લીધી છે અને સજા સ્વીકારી લીધી છે. મેચના પરિણામની વાત કરીએ તો કરાચીમાં ટોસ જીતીને પ્રથમ બેટિંગ કરવા ઉતરેલી દક્ષિણ આફ્રિકાની ટીમ 50 ઓવરમાં પાંચ વિકેટના નુકસાન પર 352 રન બનાવી શકી હતી.

પાકિસ્તાની ટીમે વિપક્ષી ટીમે આપેલા 353 રનના ટાર્ગેટને 49 ઓવરમાં એક ઓવર બાકી રહેતા ચાર વિકેટ ગુમાવીને હાંસલ કરી લીધો હતો. મેચ દરમિયાન કેપ્ટન મોહમ્મદ રિઝવાન (122 અણનમ) અને સલમાન આગા (134)એ સારી બેટિંગ કરી હતી. બંને બેટ્સમેન સદી ફટકારવામાં સફળ રહ્યા હતા. જેના કારણે પાકિસ્તાનની ટીમ પ્રથમ વખત ODIમાં 353 રનના મોટા લક્ષ્યાંકને હાંસલ કરવામાં સફળ રહી હતી.

આ પણ વાંચો :- હિંસાગ્રસ્ત મણિપુરમાં આખરે લાગ્યું રાષ્ટ્રપતિ શાસન, 9 ફેબ્રુઆરીએ CMએ આપ્યું હતું રાજીનામું