ICC એ જસપ્રીત બુમરાહને વર્ષ 2024 માટે પ્લેયર ઓફ ધ યર જાહેર કર્યો

નવી દિલ્હી, 27 જાન્યુઆરી : ભારતીય ફાસ્ટ બોલર જસપ્રીત બુમરાહે ફરી એકવાર મોટી સિદ્ધિ હાંસલ કરી છે.  ઇન્ટરનેશનલ ક્રિકેટ કાઉન્સિલ (ICC)એ તેને વર્ષ 2024નો સર્વશ્રેષ્ઠ ટેસ્ટ ક્રિકેટર તરીકે પસંદ કર્યો છે. ભારતીય ટીમે આવતા મહિને પાકિસ્તાન દ્વારા યોજાનારી ICC ચેમ્પિયન્સ ટ્રોફી 2025 રમવાની છે.  તે પહેલા આ સારા સમાચાર સામે આવ્યા છે.

જસપ્રીત બુમરાહે વર્ષ 2024માં ટેસ્ટ ક્રિકેટમાં સૌથી વધુ વિકેટ લીધી હતી. બુમરાહે આ વર્ષે કુલ 13 ટેસ્ટ મેચ રમી જેમાં તેણે 14.92ની એવરેજથી 71 વિકેટ ઝડપી. બુમરાહ બોર્ડર-ગાવસ્કર ટ્રોફી 2024-25માં 32 વિકેટ સાથે સૌથી વધુ વિકેટ લેનાર બોલર હતો.

સ્થાનિક અને વિદેશી મેદાન પર શાનદાર પ્રદર્શન

આ પ્રદર્શનના આધારે ICCએ બુમરાહને મેન્સ ટેસ્ટ ક્રિકેટર ઓફ ધ યર તરીકે પસંદ કર્યો હતો. બુમરાહે ઘરઆંગણે અને વિપક્ષી ટીમોના મેદાન પર પોતાની જાતને સાબિત કરી છે.  આ જમણા હાથના ફાસ્ટ બોલરે ઘરની ધરતી પર ઈંગ્લેન્ડ અને બાંગ્લાદેશ સામે ટેસ્ટ શ્રેણી જીતવામાં મહત્વની ભૂમિકા ભજવી હતી.

આ સિવાય વિદેશની ધરતી પર દક્ષિણ આફ્રિકા અને ઓસ્ટ્રેલિયા સામે પણ સારું પ્રદર્શન કર્યું હતું.  જો કે ભારતીય ટીમ ઓસ્ટ્રેલિયા સામે બોર્ડર-ગાવસ્કર શ્રેણી જીતી શકી ન હતી. પરંતુ બુમરાહે આ 5 મેચની ટેસ્ટ શ્રેણીમાં સૌથી વધુ 32 વિકેટ લીધી હતી.

બુમરાહે રચ્યો ઈતિહાસ, છઠ્ઠો ભારતીય બન્યો

બુમરાહ આ સિદ્ધિ હાંસલ કરનાર છઠ્ઠો ભારતીય ક્રિકેટર બન્યો છે એટલે કે વર્ષનો ટેસ્ટ ક્રિકેટર તરીકે ચૂંટાયો છે.  તેના પહેલા આ સિદ્ધિ રાહુલ દ્રવિડ (2004), ગૌતમ ગંભીર (2009), વીરેન્દ્ર સેહવાગ (2010), રવિચંદ્રન અશ્વિન (2016) અને વિરાટ કોહલી (2018) મેળવી ચૂક્યા છે.

આ રીતે 6 વર્ષ બાદ ફરી એકવાર આ એવોર્ડ દેશમાં પાછો ફર્યો છે. છેલ્લી વખત કોહલીએ 2018માં આ ખિતાબ જીત્યો હતો. બુમરાહને આ સન્માન મળવાની સાથે જ ભારતે ઓસ્ટ્રેલિયાની બરાબરી કરી લીધી છે. બંને દેશોએ 6-6 વખત આ એવોર્ડ જીત્યો છે. ઉપરાંત, કાંગારૂ બેટ્સમેન સ્ટીવ સ્મિથ (2015, 2017) એકમાત્ર એવો ક્રિકેટર છે જેણે તેની કારકિર્દીમાં બે વાર આ ખિતાબ જીત્યો છે.

આ પણ વાંચો :- મધ્યપ્રદેશ RTOનો પૂર્વ કોન્સ. કોર્ટમાં થયો હાજર, IT-EDના દરોડામાં મળ્યો હતો કરોડોનો ખજાનો