મોદી સરકાર આત્મનિર્ભર ભારત યોજના હેઠળ ભારતીય વાયુસેના માટે 114 ફાઇટર જેટ ખરીદવાની યોજના બનાવી રહી છે. તેમાંથી 96 ભારતમાં બનાવવામાં આવશે અને બાકીના 18 વિદેશી વિક્રેતા પાસેથી આયાત કરવામાં આવશે. ભારતીય વાયુસેના ‘બાય ગ્લોબલ એન્ડ મેક ઇન ઇન્ડિયા’ યોજના હેઠળ 114 મલ્ટીરોલ ફાઇટર એરક્રાફ્ટ હસ્તગત કરવાની યોજના ધરાવે છે, જે ભારતીય કંપનીઓને વિદેશી વિક્રેતા સાથે ભાગીદારી કરવાની મંજૂરી આપશે. સરકારી સૂત્રોએ જણાવ્યું હતું કે, “તાજેતરમાં, ભારતીય વાયુસેનાએ વિદેશી વિક્રેતાઓ સાથે બેઠક યોજી હતી અને તેમને મેક ઇન ઇન્ડિયા પ્રોજેક્ટને કેવી રીતે અમલમાં આવશે તે વિશે પૂછ્યું હતું.”
યોજના અનુસાર, પ્રારંભિક 18 એરક્રાફ્ટની આયાત કર્યા પછી, આગામી 36 એરક્રાફ્ટ દેશની અંદર બનાવવામાં આવશે અને ચુકવણી આંશિક રીતે વિદેશી ચલણ અને ભારતીય ચલણમાં થશે. સૂત્રોએ જણાવ્યું કે છેલ્લા 60 એરક્રાફ્ટની મુખ્ય જવાબદારી ભારતીય ભાગીદારની રહેશે અને સરકાર માત્ર ભારતીય ચલણમાં જ ચૂકવણી કરશે.
વિક્રેતાઓને ભારતીય ચલણમાં ચૂકવણી કરીને આ લાભ મળશે
સૂત્રોએ જણાવ્યું હતું કે ભારતીય ચલણમાં ચુકવણીથી વિક્રેતાઓને પ્રોજેક્ટમાં 60 ટકાથી વધુ ‘મેક-ઈન-ઈન્ડિયા’ સામગ્રી ખરીદવામાં મદદ મળશે. બોઈંગ, લોકહીડ માર્ટિન, સાબ, મિગ, ઇરકુટ કોર્પોરેશન અને ડેસોલ્ટ એવિએશન સહિતના વૈશ્વિક એરક્રાફ્ટ ઉત્પાદકો ટેન્ડરમાં ભાગ લે તેવી અપેક્ષા છે.
