I.N.D.I.A. નામના ઉપયોગ પર હાઈકોર્ટે વિપક્ષી પાસે એક સપ્તાહમાં જવાબ માંગ્યો
નવી દિલ્હી, 02 માર્ચ: દિલ્હી હાઈકોર્ટે વિપક્ષી પાર્ટીઓના ગઠબંધનને છેલ્લી તક આપી છે અને તેમને PIL પર સાત દિવસમાં તેમનો જવાબ દાખલ કરવા કહ્યું છે, જેમાં વિપક્ષી ગઠબંધનને I.N.D.I.A. (Indian National Developmental Inclusive Alliance) ઉપનામનો ઉપયોગ કરવાથી રોકવાની માંગ કરવામાં આવી છે. PILમાં આરોપ છે કે ગઠબંધનના ટૂંકાક્ષર ઈન્ડિયાનો ઉપયોગ કરીને રાજકીય પક્ષો “આપણા દેશના નામનો અયોગ્ય લાભ” લઈ રહ્યા છે. હાઈકોર્ટના કાર્યકારી ચીફ જસ્ટિસ મનમોહન અને જસ્ટિસ મનમીત પીએસ અરોરાની બેન્ચે મંગળવારે કહ્યું કે PIL પર જવાબ એક અઠવાડિયામાં દાખલ કરવામાં આવે. આ કેસની આગામી સુનાવણી હવે 10 એપ્રિલે થશે. આ મામલે હાઈકોર્ટે કેન્દ્ર સરકારને નોટિસ પણ પાઠવી છે.
ગઠબંધનને I.N.D.I.A. નામ આપતા વાંધો ઉઠાવ્યો
આ PIL ગિરીશ ભારદ્વાજે દાખલ કરી છે. ભારદ્વાજે ઓગસ્ટ 2023માં જ દિલ્હી હાઈકોર્ટનો સંપર્ક કર્યો હતો અને વિપક્ષી પાર્ટીઓના ગઠબંધનને I.N.D.I.A.ના સંક્ષેપનો ઉપયોગ કરવાથી રોકવાની માગણી કરી હતી. કેસની સુનાવણી દરમિયાન અરજદારે ફરીથી ચીફ જસ્ટિસની બેન્ચને વિનંતી કરી કે લોકસભાની ચૂંટણીની તારીખો જાહેર થતાં જ આ મામલાની સુનાવણી કરવામાં આવે. અરજદારનું પ્રતિનિધિત્વ કરતા એડવોકેટ વૈભવ સિંહે જણાવ્યું હતું કે કેન્દ્ર સરકાર અને વિપક્ષી પક્ષોને પહેલાથી જ આઠ તક આપવામાં આવી છે પરંતુ તેઓએ હજુ સુધી તેમનો જવાબ દાખલ કર્યો નથી.
બીજી તરફ વકીલ સિદ્ધાંત કુમારે કોર્ટને જણાવ્યું કે ચૂંટણી પંચ આ મામલે પોતાનો જવાબ દાખલ કરી ચૂક્યું છે. નવેમ્બર 2023માં કેન્દ્ર સરકારના વકીલે કોર્ટને જવાબ દાખલ કરવા માટે વધુ એક સપ્તાહ અથવા 10 દિવસનો સમય આપવા વિનંતી કરી હતી. કોંગ્રેસ, તૃણમૂલ કોંગ્રેસ અને DMK સહિત નવ વિપક્ષી પક્ષોનું પ્રતિનિધિત્વ કરતા વરિષ્ઠ વકીલ અભિષેક મનુ સિંઘવીએ કહ્યું હતું કે આ અરજી સામે “પ્રારંભિક વાંધા” છે, જેની પર સુપ્રીમ કોર્ટ દ્વારા કાર્યવાહી કરવામાં આવી ચૂકી છે.
હાઈકોર્ટે જે રાજકીય પક્ષો પાસેથી જવાબ માંગ્યો છે તેમાં કોંગ્રેસ, તૃણમૂલ કોંગ્રેસ, DMK, આમ આદમી પાર્ટી, જનતા દળ (યુનાઈટેડ), રાષ્ટ્રીય જનતા દળ, ઝારખંડ મુક્તિ મોરચા, રાષ્ટ્રવાદી કોંગ્રેસ પાર્ટી (શરદ પવાર), શિવસેના (UBT), સમાજવાદી પાર્ટી, રાષ્ટ્રીય લોકદળ અને અપના દળ (કામેરાવાડી)નો સમાવેશ થાય છે.
આ પણ વાંચો: રામલીલા મેદાનમાં આજે ‘INDI ગઠબંધન’ની ‘લોકશાહી બચાવો’ મહારેલી, કડક સુરક્ષા વ્યવસ્થા ગોઠવાઈ
