વિરાટ કોહલી ફોર્મમાં કેવી રીતે આવશે ? સુનિલ ગાવસ્કરે આપી ખાસ સલાહ

ભારતના શ્રેષ્ઠ બેટ્સમેનની યાદીમાં ટોપ પર રહેનાર અને હંમેશા પોતાની બેટથી જવાબ આપતાં વિરાટ કોહલી લાંબા સમયથી રન બનાવી શક્યા નથી. જેના અંગે સુનિલ ગાવસ્કરે પણ તેમના અંગે ચિંતા વ્યક્ત કરી છે. સુનિલ ગાવસ્કરે કહ્યું કે, તેઓ માત્ર 20 મિનિટ નેટ પર વિતાવ્યા બાદ વિરાટ કોહલીનું ફોર્મ પરત લાવવામાં મદદ કરી શકે છે.

કેવી રીતે ગાવસ્કર કરી શકે છે મદદ ? 

ગાવસ્કરે તાજેતરમાં એક ઈન્ટરવ્યુ દરમિયાન કહ્યું કે તેમને કોહલી માટે કેટલાક ઈનપુટ્સ મળી છે, જે આધુનિક ક્રિકેટરના રન મશીનને ફરી એકવાર પાટા પર લાવવામાં મદદ કરી શકે છે. તેમણે કહ્યું, જો મારી પાસે તેમની સાથે વિતાવવા માટે લગભગ 20 મિનિટ આપવામાં આવે તો હું તેમને કેટલીક વાતો કહી શકું જેથી તેમનું ફોર્મ પરત આવી શકે છે. હું તેમની ઓફ સ્ટમ્પની બહાર નીકળતા બોલ પર આઉટ થવાની સમસ્યાને સંપૂર્ણ રીતે ખતમ કરી શકું છું.

તેમણે કહ્યું કે ટોપ ઓર્ડર બેટ્સમેન તરીકે તેમને એ લાઈન પરેશાન કરી રહી છે, જો મને 20 મિનિટ આપવામાં આવે તો હું તેમને જણાવી શકું છું. ફોર્મ સારું ના હોય તો દરેક બેટ્સમેન આ લાઈન પર પડતા બોલ પર રન બનાવવાનું વિચારે છે. સમસ્યા અહીંથી જ શરુ થાય છે. આ સાથે તેમણે વિરાટ કોહલીના ફોર્મ અંગે કહ્યું કે, મને લાગે છે આપણે બસ રાહ જોવાની જરુર છે અને એ જોવાનું છે કે તેમનું ફોર્મ ક્યારે પાછું આવે છે. ભારત માટે તેમનો રેકોર્ડ 70 આંતરાષ્ટ્રીય સદી છે. મારો કહેવાનો મતલબ એ છે કે તેમણે તમામ પરિસ્થિતિઓમાં રન બનાવ્યા છે.

કેપ્ટન રોહિતનો મળ્યો છે સાથ

બીજી તરફ કોહલીના ખરાબ ફોર્મના કારણે 1983માં ટીમને વર્લ્ડ ચેમ્પિયન બનાવનારા કેપ્ટન કપિલ દેવે ત્યાં સુધી કહી દીધું કે, જો રન ના બની રહ્યા હોય તો વિરાટ કોહલીને ટીમમાંથી બહાર કરી દેવો જોઈએ. જોકે, કેપ્ટન રોહિત શર્મા સંપૂર્ણ રીતે પોતાના સાથીનું સમર્થન કરી રહ્યા છે. ઈન્ડિયન પ્રિમિયર લીગ 2022માં ખરાબ પ્રદર્શન બાદ વિરાટ કોહલીએ 2022ના ઈંગ્લેન્ડ પ્રવાસ દરમિયાન પણ નિષ્ફળ રહ્યો હતો.