તિરુપતિ બાલાજીઃ કેવી રીતે બને છે પ્રસાદીના લાડુ? પ્રતિવર્ષે 500 કરોડની કમાણી

આંધ્રપ્રદેશ- 20 સપ્ટેમ્બર :  આંધ્રપ્રદેશના વિશ્વ પ્રસિદ્ધ તિરુપતિ બાલાજીના પ્રસાદને લઈને વિવાદ ઊભો થયો છે. મુખ્યમંત્રી ચંદ્રબાબુ નાયડુએ એક અહેવાલને ટાંકીને આરોપ લગાવ્યો છે કે, અગાઉની જગનમોહન રેડ્ડી સરકારમાં મહાપ્રસાદમ બનાવવા માટે વપરાતા ઘીમાં ગાયની ચરબી અને ડુક્કરની ચરબી ભેળસેળ કરવામાં આવી હતી. TDPએ YSR કોંગ્રેસ પર હિન્દુઓની આસ્થા અને વિશ્વાસને ઠેસ પહોંચાડવાનો આરોપ લગાવ્યો છે. એક અહેવાલમાં પુષ્ટિ થઈ છે કે લાડુ બનાવવા માટે વપરાતું ઘી શુદ્ધ નથી અને તેમાં ગાયની ચરબી ભેળવવામાં આવી હતી. ઉલ્લેખનીય છે કે આ ખાસ પ્રસાદના લાડુ મંદિરના રસોડામાં જ તૈયાર કરવામાં આવે છે અને તેને પોટ્ટુ કહેવામાં આવે છે.

તિરુપતિ લાડુ બનાવવાની રીત
મહાપ્રસાદના લાડુ બનાવવાની પ્રક્રિયાને ‘દિત્તમ’ તરીકે ઓળખવામાં આવે છે. તેમાં બધી વસ્તુઓ ચોક્કસ માત્રામાં ઉમેરવામાં આવે છે. તેની રેસીપી તેના 300 વર્ષના ઈતિહાસમાં માત્ર છ વખત બદલાઈ છે. 2016માં તિરુમાલા તિરુપતિ દેવસ્થાનમ બોર્ડના રિપોર્ટ અનુસાર, આ લાડુમાં દૈવી સુગંધ છે. પ્રથમ, ચણાના લોટમાંથી બૂંદી તૈયાર કરવામાં આવે છે. લાડુને બગડતા અટકાવવા માટે ગોળનો ઉપયોગ કરવામાં આવે છે. આ પછી તેમાં આમળા, કાજુ અને કિસમિસ મિક્સ કરીને લાડુ તૈયાર કરવામાં આવે છે. બૂંદી બનાવવા માટે ઘીનો ઉપયોગ થાય છે.

દરરોજ ત્રણ લાખ લાડુ બનાવવામાં આવે છે
ટાઈમ્સ ઓફ ઈન્ડિયાના અહેવાલ મુજબ, TTD દરરોજ લગભગ 3 લાખ લાડુ બનાવે છે. બોર્ડ એક વર્ષમાં લાડુમાંથી અંદાજે રૂ. 500 કરોડની કમાણી કરે છે. એવું કહેવાય છે કે 1715 થી સતત પ્રસાદ તરીકે આ લાડુ બનાવવામાં આવે છે. 2014માં તિરુપતિ લાડુને પણ GI ટેગ મળ્યો હતો. હવે આ નામથી અન્ય કોઈ લાડુ વેચી શકશે નહીં. આ લાડુમાં પર્યાપ્ત માત્રામાં ખાંડ, કાજુ અને કિસમિસ હોય છે. એક લાડુનું વજન લગભગ 175 ગ્રામ છે.

આ પણ વાંચો : NEET પેપર લીક કેસ : વધુ 6 આરોપીઓના નામ સાથે બીજી ચાર્જશીટ રજૂ કરતી CBI