અન્નુ કપૂર સહિત 600 લોકો સાથે અંબર દલાલે 380 કરોડ રૂપિયાની છેતરપિંડી કેવી રીતે કરી?

• મુંબઈ પોલીસની આર્થિક ગુના શાખાએ 13 દિવસની મહેનત પછી ઉત્તરાખંડમાંથી અંબર દલાલની કરી ધરપકડ
• અંબર દલાલ પોલીસથી બચવા માટે સમયાંતરે બદલતો હતો હોટલ

મુંબઈ, 29 માર્ચ: ફિલ્મ અભિનેતા અન્નુ કપૂર સહિત લગભગ 600 લોકો સાથે રૂ. 380 કરોડની છેતરપિંડી કરનાર ચાર્ટર્ડ એકાઉન્ટન્ટ અને રોકાણ સલાહકાર અંબર દલાલની ઉત્તરાખંડમાંથી ધરપકડ કરવામાં આવી છે. હાલ તે મુંબઈ પોલીસની આર્થિક ગુના શાખાની કસ્ટડીમાં છે. ગુરુવારે રાત્રે મુંબઈ પોલીસ અને આર્થિક ગુના શાખાએ ઉત્તરાખંડના ઋષિકેશમાંથી અંબર દલાલની ધરપકડ કરી હતી. કોર્ટમાં હાજર થયા બાદ અંબર દલાલને 2 એપ્રિલ સુધી કસ્ટડીમાં મોકલી દેવામાં આવ્યો છે અને હવે આગળની કાર્યવાહી શરૂ કરવામાં આવી છે.

અંબર દલાલ 13 દિવસની મહેનત બાદ ઝડપાયો

અંબર દલાલે કરેલી ઠગાઈની રકમ નાની નથી પરંતુ રૂ. 380 કરોડથી વધુ છે, એટલા માટે મુંબઈ પોલીસની આર્થિક ગુના શાખા 14 માર્ચથી અંબર દલાલને શોધી રહી હતી. 13 દિવસની મહેનત બાદ મુંબઈ પોલીસની આર્થિક ગુના શાખાએ ઉત્તરાખંડમાંથી દલાલની ધરપકડ કરી છે. જ્યારે પોલીસે અંબર દલાલની શોધ શરૂ કરી ત્યારે તેમને ખબર પડી કે તે ધરપકડથી બચવા માટે સમયાંતરે હોટલ બદલતો હતો. તે દરમિયાન તે મુંબઈથી ઉત્તરાખંડ પહોંચી ગયો હતો. બુધવારે તેની ધરપકડ બાદ અંબર દલાલને મુંબઈ લાવવામાં આવ્યો અને કોર્ટમાં રજૂ કરવામાં આવ્યો, જ્યાંથી કોર્ટે તેને 2 એપ્રિલ સુધી પોલીસ કસ્ટડીમાં મોકલી દીધો છે.

અંબર દલાલે કેવી રીતે કરી કરોડોની છેતરપિંડી?

હવે આર્થિક ગુના શાખાએ શોધવામાં વ્યસ્ત છે કે કેવી રીતે અંબર દલાલે ઘણા પ્રખ્યાત લોકો તેમજ સામાન્ય લોકો પાસેથી કરોડો રૂપિયાની છેતરપિંડી કરી. અત્યાર સુધીની તપાસમાં પ્રકાશમાં આવ્યું છે કે લોકો અંબર દલાલ સાથે 15 વર્ષથી વધુ સમયથી રોકાણ કરી રહ્યા હતા. તપાસમાં એ પણ પ્રકાશમાં આવ્યું છે કે લોકોએ દર મહિને બે ટકાના વ્યાજે ઓછામાં ઓછા 5 લાખથી 10 કરોડ રૂપિયાનું રોકાણ કર્યું હતું. અંબર દલાલની પોન્ઝી સ્કીમમાં જેમણે પૈસા રોક્યા છે તેઓ માત્ર ભારતના જ નહીં પરંતુ અમેરિકા, ઈંગ્લેન્ડ, ઓસ્ટ્રેલિયા, ચીન અને દુબઈના પણ છે. હવે મુંબઈ પોલીસની આર્થિક ગુના શાખા અંબર દલાલની મોડસ ઓપરેન્ડી શું છે તેની તપાસ કરી રહી છે.

આ પણ વાંચો: કોઈપણ આધાર વગર પતિ પર ચારિત્ર્ય પર લાંછન લગાવવું એ ક્રૂરતા છે, કોર્ટે કહ્યું- પત્ની ભરણપોષણની હકદાર નથી