સુરેન્દ્રનગરના કડું નજીક ભયાનક અકસ્માત, 3 યુવકોને ભરખી ગયો કાળ, મૃતકોના પરિવાર પર ફાટી પડ્યું આભ
સુરેન્દ્રનગર જિલ્લામાં ભયાનક અકસ્માત સર્જાયો છે. આ અકસ્માતમાં ત્રણ યુવકોના કમકમાટીભર્યા મૃત્યુ નીપજ્યાં છે. કડું ગામના ત્રણ યુવકોના અકસ્માતમાં મૃત્યુ થતાં ગામમાં શોકનો માહોલ સર્જાયો છે. તો મૃતકોના પરિવાર પર શોકનું મોજુ ફરી વળ્યું છે.
ટ્રકની પાછળ ઘૂસી ગયું બાઈક
પ્રાપ્ત વિગતો અનુસાર, સુરેન્દ્રનગર જિલ્લાના લખતર પંથકના કડું ગામના ત્રણ યુવકો ખરીદી કરવા માટે બાઈક પર લખતર જઈ રહ્યા હતા. આ દરમિયાન રોડ પર બંધ થયેલી હાલતમાં ઊભેલી ટ્રક પાછળ તેમનું બાઇક ઘૂસી ગયું હતું. જેના કારણે ત્રણેય આશાસ્પદ યુવકોના ઘટના સ્થળે જ કરુંણ મૃત્યુ થયાં હતા.
યુવકોના મૃતદેહને પોસ્ટમોર્ટમ અર્થે ખસેડ્યા
આ અકસ્માતને પગલે રાહદારીઓના ટોળે-ટોળા બનાવ સ્થળે એકઠા થયા હતા અને આ અંગે પોલીસને જાણ કરવામાં આવી હતી. જે બાદ લખતર પોલીસની ટીમ બનાવ સ્થળે દોડી આવી હતી અને યુવકોના મૃતદેહને પોસ્ટમોર્ટમ અર્થે ખસેડવાની તજવીજ હાથ ધરી હતી.
પોલીસે હાથ ધરી તપાસ
કડું ગામના ત્રણેય યુવકો ખરીદી કરવા માટે લખતર જઈ રહ્યા હતા, આ દરમિયાન અકસ્માતમાં મૃત્યુ થતાં હાલ ગામમાં શોકનો માહોલ સર્જાયો છે. આ તરફ મૃતકોના પરિવાર પર આભ ફાટી પડ્યું છે. સમગ્ર ઘટનાને લઈ લખતર પોલીસે વધુ તપાસ શરૂ કરી છે.
આ પણ વાંચો : નર્મદા ડેમની સપાટી 136.00 મીટરે પહોંચી
