હિના ખાનને થયું બ્રેસ્ટ કેન્સર, અભિનેત્રીએ પોસ્ટ શેર કરીને પોતાની પરિસ્થિતિ કહી
- અભિનેત્રીએ પોતાના વિશે શેર કરેલી માહિતીએ તેના ચાહકોને ચિંતામાં મૂકી દીધા
મુંબઈ, 28 જૂન: બોલિવૂડ અને ટીવી એક્ટ્રેસ હિના ખાને આજે શુક્રવારે પોતાની તબિયત વિશે એક એવો ખુલાસો કર્યો છે, જેનાથી તેમના ફેન્સ ચોંકી ગયા છે. તાજેતરમાં એવા અહેવાલો આવ્યા હતા કે, અભિનેત્રીને સારવાર માટે હોસ્પિટલમાં દાખલ કરવામાં આવી છે અને હવે અભિનેત્રીએ તેની તબિયત અંગે આશ્ચર્યજનક ખુલાસો કર્યો છે. અભિનેત્રીએ સોશિયલ મીડિયા પર એક પોસ્ટ શેર કરીને લખ્યું કે, “તે બ્રેસ્ટ (સ્તન) કેન્સર સામે લડી રહી છે.” અભિનેત્રીએ પુષ્ટિ કરી કે, તેણીને તાજેતરમાં જાણવા મળ્યું છે કે તેણીને સ્ટેજ થ્રી બ્રેસ્ટ કેન્સર થયું છે.
View this post on Instagram
અભિનેત્રીએ પોતે માહિતી આપી
હિના ખાનની આ પોસ્ટ પછી, અભિનેત્રીના ચાહકો અને મિત્રો તેના કોમેન્ટ બોક્સમાં આ માહિતી પર પોતાની પ્રતિક્રિયા આપી રહ્યા છે અને તેના સ્વાસ્થ્ય માટે પ્રાર્થના કરી રહ્યા છે. અભિનેત્રીએ પોતાના વિશે શેર કરેલી આ માહિતીએ તેના ચાહકોને ચિંતામાં મૂકી દીધા છે. ઘણા યુઝર્સે હિના ખાનની પોસ્ટ પર પ્રતિક્રિયા આપતા આશ્ચર્ય વ્યક્ત કર્યું હતું.
હિના ખાને શેર કરી પોસ્ટ
તેના સ્વાસ્થ્ય વિશે માહિતી આપતા હિના ખાને લખ્યું કે, ‘તમને બધાને નમસ્કાર, તાજેતરની તમામ અફવાઓને ધ્યાન રાખીને હું તમામ હિનાહોલિકો અને જેઓ મને પ્રેમ કરે છે તેમજ કાળજી રાખે છે, તે બધા લોકો સાથે શેર કરવા માંગુ છું. મને સ્ટેજ થ્રી બ્રેસ્ટ (સ્તન) કેન્સર થયું છે. આ પડકારજનક સ્થિતિ હોવા છતાં, હું દરેકને ખાતરી આપવા માંગુ છું કે, હું સારું કરી રહી છું. હું આ રોગ પર કાબુ મેળવવા માટે મજબૂત, સંકલ્પબદ્ધ અને સંપૂર્ણ પ્રતિબદ્ધ છું. મારી સારવાર શરૂ થઈ ગઈ છે અને હું આમાંથી વધુ મજબૂત બનવા માટે દરેક જરૂરી પગલાં ભરવા માટે તૈયાર છું.
હિના ખાને આગળ શું લખ્યું?
હિનાએ પોતાની સોશિયલ મીડિયા પોસ્ટમાં આગળ લખ્યું કે, ‘હું બધાને નમ્રતાપૂર્વક વિનંતી કરું છું કે, આ સમય દરમિયાન મારી પ્રાઈવસીનું સન્માન રાખવામાં આવે. હું તમારા પ્રેમ, શક્તિ અને આશીર્વાદની ખૂબ પ્રશંસા કરું છું. તમારા અંગત અનુભવો અને સહાયક સૂચનો મારા માટે આ સફરમાં આગળ વધવા માટે ઘણા અર્થપૂર્ણ રહેશે. હું, મારા પરિવાર અને પ્રિયજનો સાથે ધ્યાન કેન્દ્રિત, મજબૂત અને સકારાત્મક છું. મને વિશ્વાસ છે કે, ભગવાનની કૃપાથી હું આ પડકારને પાર કરીશ અને સંપૂર્ણ સ્વસ્થ બનીશ. કૃપા કરીને તમારી પ્રાર્થના, આશીર્વાદ અને પ્રેમ મોકલો.
ચાહકો અને મિત્રોએ હિના ખાન માટે પ્રાર્થના કરી
હિના ખાનની આ પોસ્ટ પર ઘણા યુઝર્સે પ્રતિક્રિયા આપી છે અને અભિનેત્રી મજબૂત રહે અને તેની સુરક્ષા માટે પ્રાર્થના કરી છે. જય ભાનુશાલી, હેલી શાહ, આશકા ગોરાડિયા, સાયંતની ઘોષ, રોહન મહેરા, અંકિતા લોખંડે, અદા ખાન, આમિર અલી અને ગૌહર ખાન સહિત ઘણા સેલેબ્સે હિના ખાનની પોસ્ટ પર પ્રતિક્રિયા આપી છે અને અભિનેત્રીને હિંમત આપી છે.
આ પણ જુઓ: હોલીવુડના પ્રખ્યાત અભિનેતાને દરિયામાં સર્ફિંગ દરમિયાન શાર્કે ભર્યા બચકા, દુનિયાને કહ્યું અલવિદા
