હિમાચલમાં પ્રવાસીઓએ તોડ્યો રેકોર્ડ, જાણો- કેટલા પ્રવાસીઓએ લીધી મુલાકાત ?

કોરોના કારણે દેશના પ્રવાસન સ્થળો જવા પર પ્રતિબંધ હતો. જેના કારણે લોકો ફરવા જઈ શકતા ન હતા. પરંતુ, હવે કોરોના હળવો થઈ ગયો છે. સંક્રમણ ઘટ્યું છે. તેના કારણે પ્રવાસન સ્થળોએ પણ પ્રવાસીઓની સંખ્યા વધી રહી છે. કોરોના કાળ બાદ હિમાચલ પ્રદેશમાં પ્રવાસીઓ મોટી સંખ્યામાં આ વખતે ઉમટ્યા છે. જેથી પ્રવાસીઓની મુલાકાતના અગાઉના તમામ રેકોર્ડ તૂટી ગયા છે.

બે વર્ષથી કોરોનાથી પ્રભાવિત હિમાચલની પર્યટન સિઝનમાં આ વખતે અગાઉના ઘણા રેકોર્ડ તોડ્યા છે. 31 મે સુધી 66 લાખ 79 હજાર 145 પ્રવાસીઓ હિમાચલ પ્રદેશ પહોંચ્યા છે. અનુમાન લગાવવામાં આવી રહ્યું છે કે જૂન મહિનામાં પ્રવાસીઓનો આ આંકડો ઘણો વધારે હશે. જોકે વિદેશી પ્રવાસીઓની સંખ્યામાં ધરખમ ઘટાડો થયો છે. જેમાંથી વિદેશી પ્રવાસીઓની સંખ્યા માત્ર 4303 છે. જ્યારે 2020માં માત્ર 32 લાખ અને 2021માં સમગ્ર વર્ષ દરમિયાન માત્ર 55 લાખ પ્રવાસીઓ હિમાચલ પ્રદેશ તરફ વળ્યા હતા. 2019ની સરખામણીમાં આ વખતે મે મહિનામાં વધુ પ્રવાસીઓ આવ્યા.

હિમાચલમાં પ્રવાસીઓની ભીડને જોતા આ વખતે આંકડો 2 કરોડની આસપાસ રહેશે. આ વખતે ગરમીમાં વધારો થતા 15 દિવસ પહેલા પ્રવાસન સીઝન શરૂ થઈ ગઈ હતી. જેના કારણે મેદાની વિસ્તારોના પ્રવાસીઓ પહાડો તરફ વળ્યા છે.

હિમાચલ ટૂરિઝમ કોર્પોરેશનના મેનેજિંગ ડિરેક્ટરે કહ્યું કે કોરોના પહેલા 2019માં એક વર્ષમાં 1 કરોડ 72 લાખ 12 હજાર 107 પ્રવાસીઓ આવ્યા હતા. જેમાં એપ્રિલ મહિનામાં 17 લાખ 81 હજાર 885 પ્રવાસીઓ હિમાચલ આવ્યા હતા જ્યારે મે મહિનામાં 17 લાખ 27 હજાર 329 પ્રવાસીઓ હિમાચલ પહોંચ્યા હતા. તેની સરખામણીએ ચાલુ વર્ષે એપ્રિલ મહિનામાં 17 લાખ 47 હજાર 727 પ્રવાસીઓ હિમાચલ ગયા હતા જ્યારે મે મહિનામાં 19 લાખ 67 હજાર 984 પ્રવાસીઓ હિમાચલ પહોંચ્યા હતા. એટલે કે 2019ની સરખામણીએ 2022માં મે મહિનામાં પ્રવાસીઓની સંખ્યામાં વધારો થયો છે.

વિદેશી પ્રવાસીઓની સંખ્યામાં ઘટાડો
જો કે, આમાં વિદેશી પ્રવાસીઓની સંખ્યામાં ભારે ઘટાડો જોવા મળ્યો છે. મે 2019માં 41 હજાર 276 વિદેશી પર્યટકો હિમાચલમાં આવ્યા હતા, જે 2022માં ઘટીને માત્ર 2020 પર આવી ગયા છે કારણ કે કોરોનાને કારણે વિદેશી પ્રવાસન ક્ષેત્ર હજુ ઉભરી શક્યું નથી. તેમણે કહ્યું કે પ્રવાસીઓની આવકમાં વધારો થવાને કારણે હિમાચલના પ્રવાસન નિયમોને પણ ઘણી કમાણી થઈ રહી છે અને કોર્પોરેશન કોરોનાના નુકસાનમાંથી બહાર આવી રહ્યું છે.

પ્રવાસીઓની ભીડથી હિમાચલના લોકોમાં ખુશી
હિમાચલના પર્યટન સ્થળો પર પ્રવાસીઓનો જમાવડો જોવા મળે છે. રસ્તાઓ કલાકો સુધી જામ થઈ જાય છે. જ્યારે હોટલો સંપૂર્ણ રીતે ભરેલી ચાલી રહી છે. દરરોજ 5 હજાર વાહનો શિમલામાં જ પ્રવેશી રહ્યા છે. સપ્તાહના અંતે પ્રવાસીઓની સંખ્યામાં વધારો થાય છે. હિમાચલના પ્રવાસન ક્ષેત્ર સાથે જોડાયેલા લોકો પ્રવાસીઓની ભીડથી ઘણા ખુશ છે.