નેશનલ ડેસ્કઃ ભાજપના પૂર્વ પ્રવક્તા નુપુર શર્માએ પ્રોફેટ મુહમ્મદ પરની તેમની કથિત ભડકાઉ ટિપ્પણી સામે શુક્રવારે હિંસક વિરોધ શરૂ કર્યા પછી દેશના ઘણા ભાગોમાં તણાવ પ્રવર્તી રહ્યો હતો. ઝારખંડની રાજધાની રાંચીમાં અથડામણમાં બે લોકોના મોત થયા છે તો પશ્ચિમ બંગાળના હાવડામાં પણ સ્થિતિ ઉગ્ર દેખાય છે. દેખાવકારોએ હોબાળો મચાવ્યો હતો. ઘરોમાં આગ લગાડવામાં આવી હતી અને મિલકતોમાં તોડફોડ કરવામાં આવી હતી.બદમાશોની પોલીસ સાથે ઘર્ષણ પણ થયું.
હિંસાના પગલે પોલીસની કાર્યવાહી ઝડપી કરી દેવામાં આવી છે. માત્ર ઉત્તર પ્રદેશમાં 200થી વધુ લોકોની ધરપકડ કરવામાં આવી હતી. જ્યારે પશ્ચિમ બંગાળ પોલીસે ઉગ્ર વિરોધના સંબંધમાં 60 લોકોની ધરપકડ કરી હતી. દિલ્હી, મહારાષ્ટ્ર અને અન્ય રાજ્યોમાં પણ કેસ નોંધવામાં આવ્યા હતા. જ્યાં લોકોએ નૂપુર શર્માની ધરપકડની માંગ સાથે શુક્રવારની નમાજ પછી સામૂહિક દેખાવો કર્યા હતા.
પશ્ચિમ બંગાળ: પશ્ચિમ બંગાળના હાવડા જિલ્લા અને મુર્શિદાબાદ જિલ્લાના ભાગો અને દક્ષિણ 24 પરગણામાં શનિવારે હિંસા ફેલાઈ હતી. પોલીસે જણાવ્યું હતું કે, ઓછામાં ઓછા 60 લોકોની ધરપકડ કરવામાં આવી હતી અને રમખાણો, હત્યાનો પ્રયાસ અને જાહેર સંપત્તિને નુકસાન કરવાનો કેસ નોંધવામાં આવ્યો હતો.
હાવડાના પંચલા બજાર વિસ્તારમાં હિંસક ટોળાની પોલીસ સાથે અથડામણ થઈ હતી અને તેમના પર પથ્થરમારો કરવામાં આવ્યો હતો. જેમાં ઘણા જવાન ઘાયલ થયા હતા. ટોળાએ અનેક ઘરોને આગ ચાંપી અને ભાજપ કાર્યાલયમાં તોડફોડ કરી હતી. પોલીસે દેખાવકારોને વિખેરવા માટે ટીયર ગેસના સેલ છોડ્યા હતા.
13મી જૂન સુધી ઈન્ટરનેટ બંધ
સમગ્ર હાવડા જિલ્લામાં ઈન્ટરનેટ સેવાઓ 13મી જૂન સુધી સ્થગિત કરવામાં આવી હતી અને ઘણા વિસ્તારોમાં CrPCની કલમ 144 લાગુ કરવામાં આવી હતી. ખોટી માહિતીના ફેલાવાને રોકવા માટે મુર્શિદાબાદના કેટલાક ભાગોમાં ઇન્ટરનેટ ઍક્સેસ પર પણ પ્રતિબંધ મૂકવામાં આવ્યો હતો.
પશ્ચિમ બંગાળ કમિશન ફોર પ્રોટેક્શન ઑફ ચાઇલ્ડ રાઇટ્સે હાવડાના ડોમજુરમાં તેમની વિરોધ રેલીમાં બાળકોની ભાગીદારી માટે ફુરફુરા શરીફ પરિવારના મૌલવી સનાઉલ્લાહ સિદ્દીકીને કારણ બતાવો નોટિસ જારી કરી છે. તેણે પોલીસને દેખાવો માટે સગીરોનો ઉપયોગ કરનારાઓ સામે યોગ્ય પગલાં લેવાનો પણ નિર્દેશ આપ્યો હતો.
ઝારખંડઃ ઝારખંડના રાંચીમાં શુક્રવારે થયેલા રમખાણોના વિરોધની તપાસ માટે વિશેષ તપાસ ટીમ (એસઆઈટી)ની રચના કરવામાં આવી હતી. 12 પોલીસ સ્ટેશન વિસ્તારોમાં પ્રતિબંધક આદેશો અમલમાં છે અને વધારાના સુરક્ષા દળો મૂકવામાં છે. આ દરમિયાન હિંસાગ્રસ્ત શહેરમાં રવિવારે સવારે ઇન્ટરનેટ સેવાઓ પુનઃસ્થાપિત કરવામાં આવી હતી.
ઝારખંડના મુખ્યમંત્રી હેમંત સોરેને રાંચીમાં બે લોકોના મોત અને ઓછામાં ઓછા 24 લોકો ઘાયલ થયેલી હિંસાની તપાસ કરવા માટે વરિષ્ઠ IAS અધિકારી અમિતાભ કૌશલ અને અધિક પોલીસ મહાનિર્દેશક સંજય લાટકરનો સમાવેશ કરતી બે સભ્યોની સમિતિની રચના કરી છે.
ઉત્તર પ્રદેશ: ઉત્તર પ્રદેશ પોલીસે શુક્રવારની હિંસાના સંબંધમાં રાજ્યના વિવિધ જિલ્લાઓમાંથી 237 લોકોની ધરપકડ કરી છે. 3 જૂને કાનપુરમાં આ મુદ્દે વિરોધ અને પથ્થરમારો થયો હતો. કાનપુર ડેવલપમેન્ટ ઓથોરિટીએ શનિવારે મુખ્ય આરોપીના નજીકના સહયોગીની માલિકીની બહુમાળી ઇમારતને તોડી પાડી હતી.
પ્રતિબંધિત આદેશો લાદવામાં આવ્યા હોવા છતાંશનિવારે ઉત્તર પ્રદેશના ભદોહીમાં નુપુર શર્માના સમર્થનમાં સરઘસ કાઢવામાં આવ્યું હતું. પોલીસે કહ્યું કે, સરઘસ માટે કોઈ પરવાનગી લેવામાં આવી ન હતી અને આયોજકો અને સહભાગીઓ સામે કડક કાર્યવાહીનું વચન આપતા કેસ નોંધ્યો હતો.
પાકિસ્તાન દોષિત?
દેશમાં વ્યાપક વિરોધ પર પ્રતિક્રિયા આપતા કેન્દ્રીય મંત્રી પીએસ પટેલે પાકિસ્તાન પર ભારતમાં અશાંતિ ફેલાવવાનો આરોપ મૂક્યો કારણ કે તે તેના પાડોશીની વધતી પ્રતિષ્ઠા અને સ્થિરતાની ઈર્ષ્યા કરે છે. તેમણે કહ્યુ હતુ કે, પાકિસ્તાન ભારતના વિકાસ અને શાંતિની ઈર્ષ્યા કરે છે. વિવિધ વસ્તી વચ્ચે કોઈ સંઘર્ષ ન હોય તેવી પરિસ્થિતિનું નિર્માણ કરવું એ એક પડકાર અને ચિંતાનો વિષય છે.
ઓવૈસીએ ભાજપ પર આકરા પ્રહારો કર્યા
બીજી તરફ AIMIMના વડા અસદુદ્દીન ઓવૈસીએ ભાજપ પર નુપુર શર્માને બચાવવાનો આરોપ લગાવ્યો હતો અને તેમની ધરપકડની માંગને પુનરોચ્ચાર કરતા કહ્યું હતું કે, કાયદાએ પોતાનો માર્ગ અપનાવવો જોઈએ. તેણે કહ્યું, “નૂપુર શર્માની ધરપકડ કરવામાં આવી રહી નથી. કાયદા હેઠળ તેની ધરપકડ થવી જોઈએ. આટલા લાંબા સમયથી તેની ધરપકડ કરવામાં આવી નથી. તમે તેની ધરપકડ કરીને તેની સામે કાયદેસરની કાર્યવાહી કેમ નથી કરતા? તમને કોણ રોકે છે? તેની સામે કાર્યવાહી કરો, કાયદા મુજબ તેની ધરપકડ કરો.
