નવી દિલ્હી, 28 જુન : NEET પેપર લીક કેસમાં ઓએસિસ સ્કૂલના પ્રિન્સિપાલ ડૉ. એહસાન-ઉલ-હક અને કેન્દ્રના અધિક્ષક ઈમ્તિયાઝની આજે CBI દ્વારા ધરપકડ કરવામાં આવી હતી. ડૉ. એહસાન NEET પરીક્ષા હજારીબાગના જિલ્લા સંયોજક પણ હતા. સીબીઆઈ ઓએસિસ સ્કૂલ હજારીબાગના પ્રિન્સિપાલ એહસાન ઉલ હક અને વાઈસ પ્રિન્સિપાલ ઈમ્તિયાઝ આલમ તેમજ હજારીબાગના એક પત્રકારને પટના લાવી શકે છે. સીબીઆઈ પટનામાં વધુ તપાસ કરશે.
સીબીઆઈ ગુરુવારે પૂછપરછ માટે હજારીબાગના ચરહી ગેસ્ટ હાઉસ પહોંચી હતી. સીબીઆઈની ટીમે પહેલા આ ગેસ્ટ હાઉસમાં અહેસાન-ઉલ-હકની પૂછપરછ કરી હતી. તમને જણાવી દઈએ કે, છેલ્લા ચાર દિવસથી CBIની ટીમ હજારીબાગમાં NEET પ્રશ્નપત્ર લીક કેસની તપાસ કરી રહી છે. બુધવારે ઓએસિસ સ્કૂલમાં તપાસ કર્યા બાદ સીબીઆઈની ટીમે પ્રિન્સિપાલ એહસાન ઉલ હકને કસ્ટડીમાં લીધો હતો.
બે પત્રકારોનું કનેક્શન પણ સામે આવ્યું
પ્રિન્સિપાલ એહસાન ઉલ હક સાથે બે પત્રકારોના કનેક્શન સીબીઆઈ દ્વારા ટ્રેક કરવામાં આવ્યા હતા. આ બંને ઝારખંડના એક હિન્દી દૈનિક સાથે જોડાયેલા છે. સીબીઆઈની ટીમ જે પત્રકારને પટના લાવી શકે છે તેનું નામ સલાઉદ્દીન હોવાનું કહેવાય છે. પેપર લીક અને NEETની પરીક્ષા દરમિયાન પત્રકાર અને પ્રિન્સિપાલ વચ્ચે સતત વાતચીત થઈ હતી, એહસાન ઉલ હકની કોલ ડિટેઈલના આધારે સીબીઆઈ દ્વારા પત્રકારને પૂછપરછ માટે બોલાવવામાં આવ્યો હતો.
ઓએસિસ સ્કૂલના આચાર્યની ભૂમિકા શું હતી?
હકીકતમાં NEET પેપર લીક કેસની તપાસ દરમિયાન, બિહાર પોલીસને ધરપકડ કરાયેલા ઉમેદવારોના ઘરેથી અડધા બળેલા પેપર મળ્યા હતા, તેમાં પ્રશ્નપત્રની ફોટોકોપી પણ હતી. આ પછી, બિહારના ઇકોનોમિક ઓફેન્સીસ યુનિટ (EOU) એ આ બળી ગયેલા પેપરોને NTA દ્વારા પૂરા પાડવામાં આવેલા અસલ પ્રશ્નપત્ર સાથે મેચ કર્યા, જેમાં અડધા બળી ગયેલા પેપરમાં 68 પ્રશ્નો મૂળ પ્રશ્નપત્ર સાથે સરખા હોવાનું જણાયું હતું. વધુ તપાસમાં જાણવા મળ્યું કે પોલીસને મળેલા પ્રશ્નપત્ર હજારીબાગની ઓએસિસ સ્કૂલની બુકલેટ સાથે મેળ ખાય છે. ત્યારથી સીબીઆઈ ઓએસિસ સ્કૂલ પર નજર રાખી રહી છે.
આ મામલાને લઈને પ્રિન્સિપાલ એહસાન ઉલ હકે સ્પષ્ટતા આપતાં પોતાને નિર્દોષ ગણાવ્યા હતા. પરંતુ EOU સૂત્રોના જણાવ્યા અનુસાર તેમની ભૂમિકા શંકાસ્પદ છે. ઉલ્લેખનીય છે કે ઓએસિસ સ્કૂલના પ્રિન્સિપાલ એહસાન ઉલ હક સીબીએસઈના સિટી કોઓર્ડિનેટર પણ છે. તેમની પાસે ચાર જિલ્લા, હજારીબાગ, ચતરા, કોડરમા અને રામગઢમાં કેન્દ્રો છે, જ્યાં CBSE ઘણી પરીક્ષાઓનું આયોજન કરે છે.
