શું BZ ગ્રુપના ઠગે દુબઈમાં પણ રોકાણ કર્યું છે? કઈ પ્રાઈવેટ બેંક મારફત દુબઈ પૈસા ટ્રાન્સફર કર્યા હતા?

મોડાસા, 29 નવેમ્બર, 2024: BZ ગ્રુપના ઠગ ભૂપેન્દ્ર ઝાલાના કેસમાં દરરોજ નવા ખુલાસા થઈ રહ્યા છે. આ ઠગે કેટલા લોકોનું કેટલા કરોડનું ફુલેકું ફેરવ્યું છે એનો હજુ સુધી સાચો અંદાજ મેળવી શકાયો નથી. પરંતુ રાજ્યની સીઆઈડી ક્રાઈમે કેસ હાથમાં લીધો ત્યારથી દરરોજ નવા ખુલાસા થઈ રહ્યા છે. છેલ્લે મળતી માહિતી અનુસાર ભાગેડુ ઠગ ભૂપેન્દ્ર ઝાલાની કેટલીક વૈભવી કાર પોલીસે જપ્ત કરી છે. તે ઉપરાંત તેના ફાર્મ હાઉસ પર પણ દરોડા પાડવામાં આવ્યા છે.

એકના ડબલ કરી આપવાની પોન્ઝી સ્કીમ શરૂ કરીને સાબરકાંઠા ઉપરાંત રાજ્યના ઘણા જિલ્લાના લોકોને બાટલામાં ઉતારી તેમના નાણાંથી વૈભવી જિંદગી જીવનાર ભૂપેન્દ્ર ઝાલા કેટલીક વૈભવી ગાડીઓ ગઈકાલે ગુરુવારે જપ્ત કરવામાં આવી હોવાનું જાણવા મળે છે. પોલીસને તેના ફાર્મ હાઉસની માહિતી મળ્યા બાદ ત્યાં દરોડો પાડ્યો હતો અને ત્યારે એક એકથી ચડિયાતી વૈભવી કારોનો કાફલો ત્યાં જોવા મળ્યો હતો.

સાબરકાંઠાના સૂત્રોનું કહેવું છે કે, ભૂપેન્દ્ર ઝાલા ભલે ફરાર છે પરંતુ સી.આઇ.ડી. દ્વારા જો તેની સ્કીમના અમુક સાગરિતોની ધરપકડ કરવામાં આવે તો મોડાસા અને આસપાસના તમામ વિસ્તારના બી.ઝેડ. એજન્ટો ની માહિતી મળે તેમ છે. આ પોન્ઝી સ્કીમમાં ભૂપેન્દ્ર ઝાલા જેટલા જ આ એજન્ટો ગુનેગાર છે કારણ કે આ એજન્ટોએ પોતાના સગા – સંબંધીઓ અને ઓળખીતાઓને વધુ વ્યાજની લાલચ આપીને તેમની પાસે રોકાણ કરાવવાની લાલચે નાણાં લઈને પોતાનું જ હિત સાધ્યું છે અર્થાત આ એજન્ટોએ જ પારકે પૈસે તાગડધિન્ના કરવા અને મોંઘી મોંઘી ભેટ મેળવી, વિદેશ પ્રવાસ કર્યો, મોંઘા મોબાઈલ મેળવ્યા.

લોભિયા હોય ત્યાં ધૂતારા ભૂખે ન મરે એ કહેવત દરેક જણ જાણતા હોવા છતાં ટૂંકા ગાળામાં જંગી વળતર મેળવવાની લાલચ રોકી નહીં શકનાર નાગરિકો હવે કહી રહ્યા છે કે તેમની પાસેથી બીઝેડ ગ્રુપના નામે નાણાં ઉઘરાવનાર એજન્ટોને પણ સજા મળવી જોઈએ, જેથી આવનારા ભવિષ્યમાં લોકો એજન્ટો બનીને ભોળા નાગરિકોઓને છેતરવાનું બંધ કરે.

આ પણ વાંચોઃ – સાબરકાંઠાની પોન્ઝી સ્કીમ વિરુદ્ધ એક્શન: મુખ્ય એજન્ટ, કમિશન એજન્ટ સહિત છ આરોપી CIDના સકંજામાં

મળતી માહિતી અનુસાર એક અરવલ્લીનાં જ એક શિક્ષિકાએ વધુ નાણાં કમાઈ લેવાની લાલચે બી.ઝેડ.માં રોકાણ કરવા માટે ૧૩ લાખ રૂપિયાની લોન લઈને રોકાણ કર્યું છે. આ શિક્ષિકાને અત્યાર સુધીમાં માસિક ૩૯,૦૦૦ મુજબ ૪,૬૮,૦૦૦ રૂપિયા પરત મળ્યા છે પણ બાકીના લાખો રૂપિયાનું શું?

બી.ઝેડ. ફાઇનાન્સના નામે ભૂપેન્દ્ર ઝાલા દર મહિને ૧ થી ૫ તારીખ સુધીમાં રોકાણનું વ્યાજ આપતો હતો, પણ અત્યારે તે ફરાર છે તો રોકાણકારોને રૂપિયા કોણ આપશે? એ પ્રશ્ન લોભિયા રોકાણકારોને સતાવી રહ્યો છે.

મોડસ ઓપરેન્ડીઃ

ભૂપેન્દ્ર ઝાલાના ત્યાં રોકાણ જે રીતે આવતું તે જ રીતે વ્યાજ અથવા રોકાણ પરત કરતો હતો. જેમ કે ૧૦ લાખના રોકાણમાં જો રોકાણકારે ૩ લાખ ચેક કે ઈન્ટરનેટ બેન્કિંગથી આપ્યા હોય અને ૭ લાખ રોકડા આપ્યા હોય તો ૩ લાખના ૩% ચેક અથવા ઈન્ટરનેટ બેન્કિંગથી આપશે અને ૭ લાખના ૩% રોકડમાં આપવાની પોન્ઝી સ્કીમ ચલાવવામાં આવતી હતી. આશ્ચર્યની વાત એ છે કે, તેની આ મોડસ ઓપરેન્ડીમાં “રોકાણ” કરનારા મોટાભાગના શિક્ષિતો છે અને એ શિક્ષિતોને બાટલામાં ઉતારનાર તેમના જ ઓળખીતા લોકો છે જે એજન્ટો બનીને ફરતા હતા.

આ સમગ્ર કેસમાં એક ચોંકાવનારી માહિતી એવી પણ મળી રહી છે કે, દુબઈમાં હવાલા દ્વારા પહોંચાડવામાં આવેલા કરોડો રૂપિયાની તપાસ કરવામાં આવે તો મોટી રકમની હેરફેરની માહિતી મળે તેમ છે. કહેવાય છે કે, ભૂપેન્દ્ર ઝાલાએ એક ખાનગી બેંક મારફત દુબઈમાં આ નાણાં પહોંચાડ્યા હતા અને ત્યાં મિલકત ખરીદવા માગતો હતો.

આ પણ વાંચોઃ અજમેર શરીફમાં મંદિર હોવાનો દાવો કરનારા વ્યક્તિ કોણ? 113 વર્ષ પહેલા લખેલી વાત પર વિવાદ