હરિયાણા ચૂંટણી : કોંગ્રેસ સાથે AAPનું ગઠબંધન, 5 સીટ ઉપર લડશે
નવી દિલ્હી, 8 સપ્ટેમ્બર : હરિયાણા વિધાનસભા ચૂંટણી માટે કોંગ્રેસ અને આમ આદમી પાર્ટી વચ્ચે સીટ વહેંચણી પર સમજૂતી થઈ છે. લોકસભા ચૂંટણીની તર્જ પર બંને પક્ષો સાથે મળીને વિધાનસભાની ચૂંટણી લડશે. આમ આદમી પાર્ટી હરિયાણામાં પાંચ વિધાનસભા બેઠકો પર ચૂંટણી લડવા માટે રાજી થઈ ગઈ છે. સોમવારે ગઠબંધનની જાહેરાત થઈ શકે છે.
શનિવાર બાદ રવિવારે પણ હરિયાણા કોંગ્રેસના પ્રભારી દીપક બાબરિયા અને AAP નેતા રાઘવ ચઢ્ઢા વચ્ચે બેઠક યોજાઈ હતી. સૂત્રોનો દાવો છે કે AAP 10 બેઠકોની માંગણી કરી રહી હતી, પરંતુ કોંગ્રેસે તેમને આટલી બેઠકો આપવાનો સ્પષ્ટ ઇનકાર કર્યો હતો. કોંગ્રેસે પાંચ બેઠકોની ઓફર કરી છે, જેના પર AAPએ સહમતિ દર્શાવી છે.
સૂત્રોનો દાવો છે કે પંજાબને અડીને આવેલા પીહોવા, કલાયત, જીંદ અને એનસીઆરમાં ગુરુગ્રામ, જૂના ફરીદાબાદ અને પાણીપત ગ્રામ્યને આ બેઠકો પર આપવા પર સમજૂતી થઈ છે. બીજી તરફ AAPએ પંજાબને અડીને આવેલી ગુહલા ચીકા સીટની પણ માંગણી કરી છે, પરંતુ આ અંગે કોઈ સમજૂતી થઈ નથી.
ઉલ્લેખનીય છે કે, લોકસભા ચૂંટણીમાં ગઠબંધન હેઠળ AAPએ કુરુક્ષેત્ર સીટ પરથી ડૉ. સુશીલ ગુપ્તાને મેદાનમાં ઉતાર્યા હતા. નવ વિધાનસભા બેઠકો ધરાવતા આ લોકસભા મતવિસ્તારમાં, AAPએ ગુહલા ચીકા, પેહોવા, શાહબાદ અને કલાયત મતવિસ્તારમાં જીત મેળવી હતી. બાકીની પાંચ બેઠકો ભાજપે જીતી હતી. આ જીતના આધારે AAP આ ચાર બેઠકો તેમજ NCRની બેઠકો માંગી રહી હતી. બીજી તરફ, સપાએ હરિયાણામાં ચૂંટણી લડવાનો ઈન્કાર કરી દીધો છે. સપા પ્રમુખ અખિલેશ યાદવ અને તેમના સમર્થકો હરિયાણામાં મહાગઠબંધન માટે પ્રચાર કરશે.
