હરિયાણા ચૂંટણી પરિણામ: પ્રારંભિક વલણમાં કોંગ્રેસે પાર કર્યો બહુમતનો આંકડો, જાણો કોણ છે આગળ-પાછળ

અંબાલા, તા.8 ઓક્ટોબર 2024: આજે હરિયાણા વિધાનસભા ચૂંટણીના પરિણામો જાહેર થઈ રહ્યા છે હરિયાણા ચૂંટણીના પરિણામોનો ટ્રેન્ડ સામે આવવા લાગ્યો છે. પ્રારંભિક વલણ અનુસાર બીજેપી 19 સીટ પર આગળ છે તો કોંગ્રેસે 50 સીટ પર લીડ બનાવી છે. આ ઉપરાંત અન્ય દળ સાત સીટો પર તો આઈએનએલડી 2 સીટ પર આગળ ચાલી રહ્યું છે.

કોણ આગળ, કોણ પાછળ

• હરિયાણાની હિસાર બેઠક પરથી અપક્ષ ઉમેદવાર સાવિત્રી જિંદાલ સતત આગળ ચાલી રહ્યા છે. ભાજપ સાથે સમજૂતી ન કરી શકવાથી સાવિત્રી જિંદાલે અપક્ષ તરીકે ચૂંટણી લડવાનો નિર્ણય લીધો હતો.
• અનિલ વિજ અંબાલા કેન્ટ વિધાનસભા બેઠક પરથી પાછળ ચાલી રહ્યા છે. અનિલ વિજ આ બેઠક પરથી 6 વખત ધારાસભ્ય છે.
• HLP ચીફ ગોપાલ કાંડા હરિયાણાના પ્રારંભિક વલણોમાં આગળ છે. ગત ચૂંટણીમાં પણ તેમની પાર્ટીએ એક બેઠક જીતી હતી.
• બેલેટ પેપરના પ્રારંભિક વલણોમાં કોંગ્રેસના ઉમેદવાર વિનેશ ફોગાટ આગળ છે.
• કૈથલથી કોંગ્રેસના ઉમેદવાર આદિત્ય સુરજેવાલા આગળ ચાલી રહ્યા છે. રેવાડીથી કોંગ્રેસના નેતા ચિરંજીવ રાવ આગળ છે.

હરિયાણામાં 90 સીટો માટે 1031 ઉમેદવારો મેદાનમાં છે, જેમની જીત અને હાર પોસ્ટલ બેલેટ અને ઈવીએમમાં ​​નોંધાયેલા મતો દ્વારા નક્કી કરવામાં આવશે. રાજ્યમાં 101 મહિલા ઉમેદવારો પણ છે. સત્તાધારી ભાજપ ઉપરાંત વિપક્ષ કોંગ્રેસ, JJP, INLD, BSP, ASP, આમ આદમી પાર્ટીના ઉમેદવારો પણ મેદાનમાં છે. અહીં 5 ઓક્ટોબરે મતદાન થયું હતું અને 20 હજારથી વધુ મતદાન મથકો બનાવવામાં આવ્યા હતા.

હરિયાણામાં 65.65 ટકા મતદાન થયું હતું

હરિયાણાના 20,354,350 મતદારોમાંથી 65.65 ટકાએ મતદાનમાં ભાગ લીધો હતો. મતદાનના દિવસે રાજકીય પક્ષો વચ્ચે અથડામણ પણ જોવા મળી હતી, ત્યારબાદ સુરક્ષા પણ વધારી દેવામાં આવી હતી.

આ પણ વાંચોઃ હરિયાણા અને જમ્મુ-કાશ્મીરમાં કોની બનશે સરકાર? આજે મતગણતરીનો દિવસ