ભારતીય ટીમને પોતાની કપ્તાનીમાં બે વર્લ્ડ કપ જીતાડનાર મહેન્દ્ર સિંહ ધોનીનો આજે જન્મદિવસ છે. 7 જુલાઈના રોજ ધોનીએ 41માં જન્મદિવસની કેક કાપી ઉજવણી કરી.જેનો વીડિયો સામે આવ્યો છે.
આજે મહેન્દ્રસિંહ ધોનીનો જન્મદિવસ
ધોની અને સાક્ષીની લગ્નની વર્ષગાંઠ પણ 4 જુલાઈએ હતી. બંનેના લગ્નને 12 વર્ષ થયા છે. જેને પગલે આ કપલ રજાઓ ગાળવા ઇંગ્લેન્ડ પહોંચી ગયું હતું. અહીં બંનેએ મેરેજ એનિવર્સરી પણ સેલિબ્રેટ કરી અને હવે ધોનીનો બર્થ ડે પણ સેલિબ્રેટ કર્યો.
સાક્ષીએ ધોનીનો વીડિયો શેર કર્યો
ધોનીના બર્થડે સેલિબ્રેશનનો વીડિયો અને તસવીરો ખુદ સાક્ષીએ ઈન્સ્ટાગ્રામ પર શેર કરી હતી. આ ફોટોમાં તમે ટીમ ઈન્ડિયાના સ્ટાર વિકેટકીપર બેટ્સમેન ઋષભ પંતને પણ જોઈ શકો છો. પંત હાલમાં ટીમ ઈન્ડિયા સાથે ઈંગ્લેન્ડના પ્રવાસે છે, જ્યાં એક ટેસ્ટ મેચનું આયોજન કરવામાં આવ્યું છે. હવે ત્રણ ટી-20 અને ત્રણ વન-ડે મેચોની શ્રેણી રમાવાની છે.
ધોનીએ બંને હાથે કેક કાપી
સાક્ષીએ શેર કરેલા વીડિયોમાં ધોની બ્રાઈટ જેકેટ પહેરેલો જોવા મળી રહ્યો છે. લાગી રહ્યું છે કે ધોની માટે શાનદાર કેક તૈયાર કરવામાં આવી છે. ધોની પહેલા મીણબત્તી ઓલવે છે અને ત્યારબાદ બંને હાથે છરી પકડીને કેક કાપતો જોવા મળે છે. આ દરમિયાન વીડિયોમાં બેકગ્રાઉન્ડમાં અંગ્રેજી સંગીત પણ વાગી રહ્યું છે.
ધોની આઈપીએલમાં છેલ્લી મેચ રમ્યો હતો
તમને જણાવી દઈએ કે ધોનીએ 15 ઓગસ્ટ 2020ના રોજ આંતરરાષ્ટ્રીય ક્રિકેટમાંથી નિવૃત્તિ લીધી હતી. ધોનીએ ટીમ ઈન્ડિયા માટે 2019 વર્લ્ડ કપની સેમીફાઈનલ રમી હતી. જોકે માહી હજુ પણ આઈપીએલમાં રમી રહ્યો છે. તે હાલમાં ચેન્નાઈ ટીમનો કેપ્ટન પણ છે. ધોની એ જ સિઝનમાં આઈપીએલમાં છેલ્લી મેચ રમ્યો હતો. ધોનીએ રાજસ્થાન રોયલ્સ સામેની છેલ્લી મેચમાં 26 રન બનાવ્યા હતા. આ મેચ તેની ટીમ હારી ગઈ હતી.
માહી ભારતનો સૌથી સફળ કેપ્ટન
તે ભારતીય ટીમનો સૌથી સફળ કેપ્ટન હતો, જેણે પોતાના નેતૃત્વમાં દેશ માટે ત્રણ ICC ટૂર્નામેન્ટ જીતી છે. ધોનીની કપ્તાની હેઠળ તેણે પ્રથમ 2007 T20 વર્લ્ડ કપ, 2011માં ODI વર્લ્ડ કપ અને પછી 2013માં ચેમ્પિયન્સ ટ્રોફી જીતી હતી. ધોની વિશ્વનો એકમાત્ર એવો કેપ્ટન છે જેણે આ ત્રણેય ટૂર્નામેન્ટ જીતી છે.
