60 વર્ષ જૂના રેલવે સ્ટેશનના એકાએક બે ટુકડા થયા, ટિકિટ ખરીદવા ઊભેલા લોકોમાં નાસભાગ
મધ્યપ્રદેશ – 9 ઓગસ્ટ : ગુનામાં કુંભરાજ રેલવે સ્ટેશનની ઈમારત અચાનક ધરાશાયી થઈ ગઈ હતી. આ અકસ્માતમાં ટિકિટ કાઉન્ટર પર ઊભેલા મુસાફરોનો આબાદ બચાવ થયો હતો. રેલવે સ્ટેશનની બિલ્ડીંગ ખૂબ જ વિચિત્ર રીતે બે ભાગમાં વહેંચાઈ ગઈ, જેના કારણે ટિકિટ કાઉન્ટર બંધ થઈ ગયું. ઈમારત ધરાશાયી થવાને કારણે ટિકિટ કાઉન્ટરમાં રાખવામાં આવેલા કમ્પ્યૂટર અને સીસીટીવી કેમેરાને પણ નુકસાન થયું હતું. રેલવે સ્ટેશન પર જાહેરાત કરવામાં આવી હતી કે, મુસાફરોએ આગામી સ્ટેશનથી ટિકિટ ખરીદવી પડશે. અત્યારે કુંભરાજ સ્ટેશનનું ટિકિટ કાઉન્ટર બંધ કરી દેવામાં આવ્યું છે, તેથી ટિકિટનું વિતરણ થઈ શકશે નહીં.
Guna के Kumbhraj Railway Station पर मच गया हड़कंप, अचानक गिरने लगी स्टेशन की बिल्डिंग !#guna #gunarailwaystation #madhyapradesh pic.twitter.com/BtFbUYbV2a
— MP Tak (@MPTakOfficial) August 8, 2024
કુંભરાજ રેલવે સ્ટેશનની સ્થાપના 60 વર્ષ પહેલા કરવામાં આવી હતી. આ રેલવે સ્ટેશન પરથી સાબરમતી એક્સપ્રેસ, કોટા ઈન્દોર એક્સપ્રેસ, નાગદા બીના પેસેન્જર ટ્રેનો પસાર થાય છે. પશ્ચિમ મધ્ય રેલવે હેઠળના ભોપાલ ઝોનમાં આવતા કુંભરાજ રેલવે સ્ટેશન પરથી ઘણા મુસાફરો મુસાફરી કરે છે.
રેલવે સ્ટેશનની એક તસવીર સોશિયલ મીડિયા પર વાયરલ થઈ રહી છે, જેમાં સ્ટ્રક્ચરમાં એક મોટી તિરાડ દેખાઈ રહી છે અને તેનો એક ભાગ એક તરફ નમ્યો છે. કુંભરાજ રેલવે સ્ટેશન માસ્ટર વિનોદ મીણાએ જણાવ્યું કે, આ બહુ જૂની ઇમારત છે. આ ઘટનામાં કોઈ જાનહાનિ થઈ ન હતી, ત્યારબાદ ટિકિટ કાઉન્ટર બંધ કરી દેવામાં આવ્યું છે.
પશ્ચિમ મધ્ય રેલવેના પબ્લિક રિલેશન ઓફિસર હર્ષિત શ્રીવાસ્તવે જણાવ્યું હતું કે બિલ્ડિંગને નુકસાન થવાને કારણે કુંભરાજ રેલવે સ્ટેશનનું ટિકિટ કાઉન્ટર બંધ કરી દેવામાં આવ્યું છે. કોઈ જાન-માલનું નુકસાન થયું નથી. ક્ષતિગ્રસ્ત બિલ્ડીંગનું ટૂંક સમયમાં સમારકામ કરવામાં આવશે.
તેમણે કહ્યું કે ગુનામાં સતત વરસતા વરસાદને કારણે આ ઘટના બની છે. હવે મુસાફરોની સલામતી સુનિશ્ચિત કરવા માટે આવી જૂની ઇમારતોનો સર્વે કરવામાં આવશે. દરમિયાન, ભારતીય હવામાન વિભાગના ભોપાલ કેન્દ્રએ જણાવ્યું હતું કે, ‘ગુના જિલ્લામાં ગુરુવારે સવારે 8.30 થી 2.30 વાગ્યાની વચ્ચે 34 મીમી (3.4 સેમી) વરસાદ નોંધાયો હતો.’
આ પણ વાંચો : મહેન્દ્ર ધોનીના સાળાને ડેટ કરે છે કૃતિ સેનન, જલદી જ પ્રભુતામાં પગલાં પાડશે?
