વિક્રમ ઠાકોરે સરકારને આડે હાથ લીધી: ઠાકોર સમાજને સરકારી કામ નહીં મળે તો કોઈ ભૂખ્યા નહીં રહે, સમાજનો નિર્ણય શિરોમાન્ય

ગાંધીનગર, 16 માર્ચ 2025: ગુજરાતી ફિલ્મ જગતના દિગ્ગજ કલાકાર અભિનેતા વિક્રમ ઠાકોરે સરકાર પર ઠાકોર સમાજની લાંબા સમયથી અવગણના કરવાનો આરોપ લગાવ્યો છે. તેમણે કહ્યું કે, રાજ્ય સરકારના અનેક કાર્યક્રમોમાં ઠાકરો સમાજના દીકરા-દીકરીયોની યોગ્ય ભાગીદારી જોવા મળતી નથી.આ સાથે જ તેમણે ઠાકોર સમાજના કોઈ પણ કલાકારોને સરકારી સ્તરે આયોજીત કાર્યક્રમોમાં આમંત્રણ નહીં આપવા અંગે પણ નારાજગી વ્યક્ત કરી હતી.

વિક્રમ ઠાકોરે વધુમાં જણાવ્યું કે કલાકારની કોઈ જ્ઞાતિ હોતી નથી અને દરેક સમાજમાં પ્રતિભાશાળી કલાકારો મોજૂદ છે. તેમણે સરકારને વિનંતી કરી કે તેઓ તમામ સમાજના કલાકારોને સમાન તક આપે અને તેમને પોતાના કાર્યક્રમોમાં સામેલ કરે. તેમણે માહિતી આપી કે શંકર ભાઈ ચૌધરી દ્વારા કોઈ કલાકારને આમંત્રણ આપવામાં આવ્યું હોવાનું તેમને જાણવા મળ્યું છે.

વિક્રમ ઠાકોરે પોતાના નિવેદનમાં વધુમાં કહ્યું કે, ઠાકોર સમાજને જો સરકારી કામ નહીં મળે તો તેનાથી કોઈ વ્યક્તિ ભૂખ્યો નહીં રહે. તેમણે કહ્યું કે, સમાજ જે નિર્ણય લેશે તે તેમને શિરોમાન્ય રહેશે અને દરેક સમાજના કલાકારો તેમના સમર્થનમાં ઊભા છે.

રાજકારણમાં જોડાવાની વાત પર વિક્રમ ઠાકોરે જણાવ્યું કે તેમને 2007માં નરેન્દ્ર મોદી મળ્યા હતા અને તેમણે તેમને રાજકારણમાં જોડાવા માટે પ્રેરિત કર્યા હતા, પરંતુ હાલમાં તેમનો રાજકારણમાં જોડાવાનો કોઈ વિચાર નથી. તેમણે પોતાને એક સામાન્ય માણસ ગણાવ્યો અને કહ્યું કે તેઓ લડવાવાળા વ્યક્તિ નથી.

અહીં ઉલ્લેખનિય છે કે, ગુજરાતના સુપરસ્ટાર અને લોકપ્રિય કલાકાર વિક્રમ ઠાકોર તાજેતરમાં ગુજરાત વિધાનસભામાં યોજાયેલા કલાકારોના સન્માન સમારંભમાં ઠાકોર સમાજના કલાકારોને આમંત્રણ ન મળતાં નારાજ થયા હતા. તેમણે સોશિયલ મીડિયા પર લાઈવ કાર્યક્રમ દરમિયાન પોતાની વેદના વ્યક્ત કરી હતી. ઠાકોર સમાજના અગ્રણી નવઘણજી સાથે વાતચીત કરતાં વિક્રમ ઠાકોરે જણાવ્યું હતું કે વિધાનસભામાં કલાકારોનું સન્માન થયું અને તેમાં ઠાકોર સમાજના કોઈ કલાકારને ન બોલાવવામાં આવતાં તેમને દુઃખ થયું હતું. એક મિત્રએ પણ તેમને આ બાબતે ધ્યાન દોર્યું હતું, જેનાથી તેમની નારાજગી વધી હતી.

આ પણ વાંચો: બોટાદમાં પત્નીના સીમંત પહેલા જ પોલીસ કોન્સ્ટેબલ પતિએ ગળેફાંસો ખાઈને જીવન ટૂંકાવ્યું: કારણ અંકબંધ