ગુજરાત: 130 કરોડનું ફલેકું ફેરવનારા પાલનપુરની સ્ટારવે ટેક કૌભાંડના મુખ્ય આરોપીની ધરપકડ

• 16 હજારથી વઘુ રોકાણકારો સાથે છેતરપિંડી આચરી
• પૈસા ડબલ કરી આપવાની સ્કીમ લોન્ચ કરી
• એજન્ટોને કાર, આઇફોન જેવી ભેટ આપી હતી

પાલનપુરમાં નાવ સ્ટારવે ટેક ઈન્ડિયા મેનેજમેન્ટ નામની કંપનીની ઓફિસ શરૂ કરીને મલ્ટી લેવલ માર્કેટીંગ અને પીરામીડ સ્કીમમાં રોકાણની સામે 70 દિવસ અને 200 દિવસમાં નાણાં બમણાં કરી આપવાની સ્કીમ લોંચ કરીને 130 કરોડથી વધારેની રકમ ઉઘરાવીને છેતરપિંડી કરવાના કેસમાં સીઆઇડી ક્રાઇમે કંપનીના ડાયરેક્ટર નિરંજન શ્રીમાળીની ધરપકડ કરી છે.

16 હજારથી વઘુ રોકાણકારો સાથે છેતરપિંડી આચરી

આરોપીએ ગુજરાતના મોટા શહેરો, મહારાષ્ટ્ર અને રાજસ્થાનમાં ઓફિસ શરૂ કરીને 16 હજારથી વઘુ રોકાણકારો સાથે છેતરપિંડી આચરી હતી. આ અંગે સીઆઇડી ક્રાઇમે વઘુ તપાસ હાથ ધરી છે.

પૈસા ડબલ કરી આપવાની સ્કીમ લોન્ચ કરી

પાલનપુરમાં નાવ સ્ટાર વે ટેક ઈન્ડિયા મેનેજમેન્ટ નામની કંપની આરઓસીમાં રજીસ્ટર્ડ કરીને વિવિધ પ્રોજેક્ટમાં રોકાણની સામે ઊંચા વળતરની લાલચ આપીને છેતરપિંડી કરવાનું કૌભાડ ઝડપાયું હતું. જેમાં કંપનીના ડાયરેક્ટર નિરંજન શ્રીમાળીને સીઆઇડી ક્રાઇમ દ્વારા ઝડપી લેવામાં આવ્યો છે. તેણે રોકાણની સામે પ્રતિદિન એક ટકાનું વળતર, તેમજ 200 દિવસમાં મુડી બમણી કરી આપવાની અને તે પહેલા 70 દિવસમાં બમણા નાણાં આપવાની સ્કીમ લોંચ કરીને અનેક લોકો સાથે છેતરપિંડી કરી હતી.

એજન્ટોને કાર, આઇફોન જેવી ભેટ આપી હતી

નિરંજન શ્રીમાળીએ ત્રણ અલગ અલગ કંપનીઓ બનાવીને ગુજરાતમાં પાલનપુર, મહેસાણા, હિંમતનગર, અમદાવાદ, પાટણ, રાજકોટ, સુરત જેવા શહેરોમાં તેમજ રાજસ્થાનના બાંસવાડા, પાલી, ઉદેપુર અને બાંસવાડામાં નાની ઓફિસ શરૂ કરીને હતી. આ ઉપરાત મહારાષ્ટ્રમાં પણ તેણે કેટલાંક શહેરોમાં રોકાણકારોને છેતર્યા હતા. સીઆઇડી ક્રાઇમને સમગ્ર કેસની તપાસ દરમિયાન એવી પણ વિગતો જાણવા મળી હતી કે તેણે મલ્ટી લેવલ માર્કેટીંગ અને પીરામીડ સ્કીમમાં લોકો છેતરવા માટે મોટાપાયે સેમીનાર પણ યોજ્યા હતા. સાથેસાથે એજન્ટોને કાર, આઇફોન જેવી ભેટ આપી હતી.

આ પણ વાંચો: National Girl Child Day: ગુજરાતમાં હાલ દત્તક લેવાના પ્રમાણમાં 10માંથી 6 દીકરીઓ