રાજ્યના પૌરાણિક અને ધાર્મિક સ્થળોના વિકાસના કામો માટે રાજ્ય સરકારે નવી પ્રચારાત્મક જોગવાઈઓ લાગુ કરી છે. જેના માટે આર્થિક સહાય પણ બમણી કરવામાં આવી છે. અનુસૂચિત જાતિ અને અનુસૂચિત જનજાતિના યાત્રાધામોના વિકાસ માટે હવે 10 ટકા ફાળાની જોગવાઈ છે અને અન્ય સમાજના યાત્રાધામોના વિકાસ માટે 30ના બદલે 20 ટકાની જોગવાઈ છે. ગુજરાત પવિત્ર યાત્રાધામ વિકાસ બોર્ડના જણાવ્યા અનુસાર, રાજ્ય સરકાર હેઠળના ધાર્મિક, પૌરાણિક સ્થળો અને યાત્રાધામોને વિવિધ સ્તરે વર્ગીકૃત કરવામાં આવ્યા છે. તેના દ્વારા પાયાની સુવિધાઓ અને સૌર ઉર્જાનાં કામોમાં વધુ સરળતા રહેશે. ‘A’ કક્ષાના યાત્રાધામોના નાગરિક અને વિદ્યુતીકરણના કામો માટે, જ્યાં અગાઉ 1 કરોડ રૂપિયા આપવામાં આવતા હતા, હવે 2 કરોડ રૂપિયા આપવામાં આવશે. તેમજ જ્યાં સોલાર એનર્જી માટે 20 લાખ રૂપિયા આપવામાં આવ્યા હતા, હવે ત્યાં 40 લાખ રૂપિયા આપવામાં આવશે.
આ પણ વાંચો : જંત્રી દરને લઈ સૌથી મોટા સમાચાર, જાણો- સરકારે કરી શું મોટી જાહેરાત ?
એ જ રીતે ‘B’ કક્ષાના યાત્રાધામોના સિવિલ અને ઇલેક્ટ્રિકલ કામો માટે અગાઉ રૂ. 50 લાખ આપવામાં આવ્યા હતા ત્યાં હવે 1 કરોડ રૂપિયા આપવામાં આવશે. આ સિવાય હવે સૌર ઉર્જાનાં કામો માટે 10 લાખને બદલે 20 લાખ રૂપિયા આપવામાં આવશે. એ જ રીતે ‘A’ સ્તરના યાત્રાધામોમાં સિવિલ અને ઇલેક્ટ્રિફિકેશન માટે રૂપિયા 20 લાખને બદલે 50 લાખ રૂપિયા આપવામાં આવશે. સૌર ઉર્જા માટે રૂ.5 લાખને બદલે રૂ.10 લાખ આપવામાં આવશે. યાત્રાધામ વિકાસ બોર્ડ દ્વારા રાજ્યમાં અનુસૂચિત જાતિ અને અનુસૂચિત જનજાતિના યાત્રાધામો માટે વિશેષ જોગવાઈ કરવામાં આવી છે. સમાજના ધાર્મિક સ્થળો વિકાસથી વંચિત ન રહે તેની પણ ખાસ કાળજી રાખવામાં આવી છે. તમામ સમાજની લાગણીને ધ્યાનમાં રાખીને હવે માત્ર 10 ટકા રકમ જમા કરાવીને વિવિધ સ્થળોનો વિકાસ કરવામાં આવશે.
