મોટો ઝટકો: ગુજરાતમાં હવે જન્મ-મરણનો દાખલો લેવા વધારે ફી આપવી પડશે, સરકારે કર્યો ધરખમ વધારો
અમદાવાદ, 03 માર્ચ 2025: ગુજરાતની જનતાને વધુ એક મોટો ઝટકો આવ્યો છે. સરકારે રાજ્યમાં જન્મ અને મરણની નોંધણીની ફીમમાં મોટો વધારો કર્યો છે. આ નિયમ 27 ફેબ્રુઆરીથી અમલમાં આવી ગયો છે. જેના કારણે નાગરિકોને આ સેવાઓ માટે હવે વધુ ખર્ચ કરવો પડશે. સરકારની આ નિર્ણયથી સામાન્ય લોકોને સીધી અસર થશે.
સરકાર દ્વારા નક્કી કરવામાં આવેલા ધારાધોરણ અનુસાર, મૃત્યુ પ્રમાણપત્ર મેળવવા માટેની ફી અગાઉ 5 રુપિયા હતી, જે વધારીને હવે 20 રુપિયા કરવામાં આવી છે. આવી જ રીતે જન્મનો દાખલો લેવા માટે પણ ફીમાં વધારો કર્યો છે. જે પહેલા 10 રુપિયા હતી, તેના હવે 50 રુપિયા ચુકવવા પડશે. આ ફી તાત્કાલિક અસરથી લાગૂ કરવામાં આવી છે.
આ ફી વધારાની સાથે સાથે સરકારે મોડી નોંધણીના નિયમોમાં પણ ફેરફાર કર્યા છે. જો કોઈ વ્યક્તિ જન્મ કે મરણની ઘટનાની નોંધણી 30 દિવસની મર્યાદા પછી કરાવે છે તો હવે વધુ લેટ ફી ભરવી પડશે. અગાઉ આ લેટ ફી માત્ર 10 રુપિયા હતી, જેને વધારીને હવે 50 રુપિયા કરી દેવામાં આવી છે. એટલું જ નહીં જો નોંધણી એક વર્ષથી પણ વધારે મોડી થાય તો 100 રુપિયા ફી ભરવી પડશે. અને આવા કિસ્સામાં જિલ્લા મેજિસ્ટ્રેટની મંજૂરી પણ લેવી પડશે.આ નિયમો એટલા માટે બનાવ્યા છે કે સમસયર જન્મ અને મરણની નોંધણી થાય.
વધુમાં, સરકારે પ્રમાણપત્રોના સ્વરૂપમાં પણ ફેરફાર કર્યો છે. હવેથી પ્રમાણપત્રો ઇલેક્ટ્રોનિક અથવા અન્ય સ્વરૂપમાં આપવામાં આવશે, અને અગાઉ વપરાતો ‘નકલ’ શબ્દ હવે ‘પ્રમાણપત્ર’ તરીકે ઓળખાશે. આ ફેરફાર પ્રમાણપત્રોને વધુ અધિકૃત અને આધુનિક બનાવવાનો પ્રયાસ છે.
સરકારે આ નવા નિયમોમાં ખોટી માહિતી આપવા બદલ દંડની જોગવાઈ પણ કરી છે. જો કોઈ વ્યક્તિ જન્મ કે મરણની નોંધણી દરમિયાન ખોટી માહિતી આપે છે, તો તેને રૂ. 50 થી લઈને રૂ. 1000 સુધીનો દંડ થઈ શકે છે. આ કડક જોગવાઈનો હેતુ ખોટી માહિતી આપવાના કિસ્સાઓને અટકાવવાનો અને નોંધણી પ્રક્રિયાને વધુ વિશ્વસનીય બનાવવાનો છે.
જન્મ પ્રમાણપત્ર માટે અરજી કેવી રીતે કરવી
નવા જન્મ પ્રમાણપત્ર માટે ઓનલાઈન અરજી: જે લોકોએ હજી સુધી જન્મ પ્રમાણપત્ર બનાવ્યું નથી, તેઓ ભારત સરકારની અધિકૃત વેબસાઈટ https://dc.crsorgi.gov.in/crs/ પર જઈને ઓનલાઈન રજીસ્ટ્રેશન કરાવી શકે છે અને પોતાની અરજી સબમિટ કરી શકે છે.
