ભાગીને લગ્ન કરતા યુવક-યુવતીઓ ચેતી જજો, સરકાર બદલવા જઈ રહી છે કાયદો, કરી લીધી તૈયારી

નવા પ્રસ્તાવિત નિયમો અનુસાર, લગ્ન નોંધણીની પ્રક્રિયામાં વહીવટી અને પારિવારિક સ્તરે નીચે મુજબના ફેરફારો જોવા મળશે. અત્યાર સુધી તલાટી-કમ-મંત્રી લગ્ન નોંધણી કરવાની સત્તા ધરાવતા હતા. પરંતુ હવે, તલાટી માત્ર પ્રાથમિક પ્રક્રિયા પૂર્ણ કરી શકશે. લગ્ન નોંધણીની આખરી મંજૂરી હવે ક્લાસ-2 (વર્ગ-2) અધિકારી દ્વારા જ આપવામાં આવશે. પ્રેમ લગ્ન કરનાર યુગલના માતા-પિતાને લગ્ન નોંધણી અંગે વહીવટી તંત્ર દ્વારા નોટિસ મોકલવામાં આવશે. નોટિસ મળ્યા બાદ વાલીઓએ 30 દિવસની અંદર પોતાનો વાંધો કે જવાબ રજૂ કરવો ફરજિયાત રહેશે. જો વાલીઓ દ્વારા કોઈ પણ પ્રકારનો વાંધો ઉઠાવવામાં આવશે, તો ક્લાસ-2 અધિકારી તે મામલે ઊંડી તપાસ કરશે અને ત્યારબાદ જ લગ્ન નોંધણી અંગે નિર્ણય લેશે.

તલાટી પાસેથી કેમ છીનવાઈ સત્તા?

સૂત્રોના જણાવ્યા અનુસાર, સરકારના ધ્યાને આવ્યું હતું કે કેટલાક કિસ્સાઓમાં એક જ ગામના તલાટી દ્વારા ટૂંકા ગાળામાં 200 જેટલા લગ્નોને મંજૂરી આપી દેવામાં આવી હતી. આ પ્રકારની શંકાસ્પદ કામગીરી અને પારદર્શિતાના અભાવને કારણે સરકારે તલાટીઓ પાસેથી આ સત્તા પરત ખેંચી લેવાનો નિર્ણય કર્યો છે.

નિયમો પાછળનો સરકારનો તર્ક

રાજ્ય સરકારનું માનવું છે કે આ નવા સુધારાથી લગ્ન નોંધણીની પ્રક્રિયા વધુ અધિકૃત બનશે. યુવતીઓને લલચાવી-ફોસલાવીને અથવા બળજબરીથી કરવામાં આવતા લગ્નો પર રોક લગાવી શકાશે. પરિવારની જાણ બહાર થતા લગ્નોને કારણે સર્જાતા સામાજિક ઘર્ષણોમાં ઘટાડો થશે.

આ પણ વાંચો: ભારત-પાકિસ્તાન વચ્ચે 2026માં થઈ શકે છે મહાયુદ્ધ, જાણો કોણે આપી આવી ચેતવણી