- પરીક્ષા પૂર્ણ થયાના માત્ર 20 દિવસમાં જ પરિણામ જાહેર થઈ જશે
- પરિણામ વહેલુ જાહેર થવાના લીધે ઉચ્ચ અભ્યાસની પ્રવેશ પ્રક્રિયામાં પણ ખૂબ ઝડપ આવશે
- માર્ચ 2024ની પરીક્ષાનું પરિણામ અપ્રિલના બીજા કે ત્રીજા વિકમાં આપવાની બોર્ડની તૈયારી
ગુજરાતમાં ધો. 10 અને 12 બોર્ડના પરિણામને લઈ મોટા સમાચાર સામે આવ્યા છે. જેમાં અપ્રિલના બીજા કે ત્રીજા વિકમાં ધો. 10 અને 12 બોર્ડના પરિણામ આપવાની બોર્ડની તૈયારી છે. તેથી ઉચ્ચ અભ્યાસની પ્રવેશ પ્રક્રિયામાં પણ ખૂબ ઝડપ આવશે. તથા પરીક્ષા પદ્ધતિ વિદ્યાર્થીઓ માટે ખૂબ સરળ પ્રકારની ઘડવામાં આવી છે.
પરીક્ષા પૂર્ણ થયાના માત્ર 20 દિવસમાં જ પરિણામ જાહેર થઈ જશે
ઉલ્લેખનીય છે કે મૂલ્યાંકનમાં અનેક ફેરફારના લીધે પરિણામ વહેલા આવશે. વહેલા પરિણામથી એડમિશન પ્રક્રિયા ઝડપી થશે. માર્ચ 2024ની પરીક્ષાનું પરિણામ અપ્રિલના બીજા કે ત્રીજા વિકમાં આપવાની બોર્ડની તૈયારી છે. તો ગત વર્ષની સરખામણીએ સવાથી દોઢ મહિનો વહેલુ પરિણામ જાહેર થશે. કારણ કે, ગત વર્ષે પરીક્ષાઓ તા.14 માર્ચ-2023માં શરૂ થઈ હતી. જેમાં ધોરણ.10ની પરીક્ષા તા.28 માર્ચ, ધોરણ.12 સાયન્સની પરીક્ષા તા.25 માર્ચ અને ધોરણ.12 સામાન્ય પ્રવાહની પરીક્ષા તા.29 માર્ચ-2023ના રોજ પૂર્ણ થઈ હતી. એ પછી ધોરણ 10નું પરિણામ તા.25 મે-2023ના રોજ, ધોરણ.12 સામાન્ય પ્રવાહનું પરિણામ તા.31 મે-2023ના રોજ અને ધોરણ.12 સાયન્સનું પરિણામ તા.2 મે-2023ના રોજ જાહેર થયું હતુ. આમ પરીક્ષા પૂર્ણ થયા બાદ પરિણામ જાહેર થતાં અંદાજે બે મહિના જેટલો સમય લાગ્યો હતો, જે હવે નવા આયોજન મુજબ તો પરીક્ષા પૂર્ણ થયાના માત્ર 20 દિવસમાં જ પરિણામ જાહેર થઈ જશે.
પરિણામ વહેલુ જાહેર થવાના લીધે ઉચ્ચ અભ્યાસની પ્રવેશ પ્રક્રિયામાં પણ ખૂબ ઝડપ આવશે
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ 10 અને 12ની બોર્ડની પરીક્ષાના સમગ્ર માળખામા ફેરફાર કરવાની સાથેસાથે મૂલ્યાંકન કામગીરીમાં પણ મોટો ફેરફાર કરવામાં આવ્યો હોવાનું જાણવા મળ્યું છે. શિક્ષણ બોર્ડના અત્યારના આયોજન મુજબ ધોરણ 10 અને 12ની બોર્ડ પરીક્ષાનું પરિણામ દર વર્ષની સરખામણીએ સવાથી દોઢ મહિનો વહેલું એટલે કે, તા. 15થી 20 એપ્રિલ-2024ની વચ્ચે જાહેર કરી દેવામાં આવશે. બોર્ડની પરીક્ષાનું પરિણામ વહેલુ જાહેર થવાના લીધે ઉચ્ચ અભ્યાસની પ્રવેશ પ્રક્રિયામાં પણ ખૂબ ઝડપ આવશે.
