‘રાજ્યપાલને હાજર થવા’ માટે સમન્સ જારી કરનાર બદાયુંના SDMને સરકારે કર્યા સસ્પેન્ડ

• SDMએ રાજ્યપાલના નામે સમન્સ જારી કરીને હાજર થવાનો આપ્યો આદેશ
• રાજ્યપાલને હાજર થવા માટેનો સમન્સ રાજભવન પહોંચતા મચ્યો હડકંપ
• રાજ્યપાલ આનંદીબેન પટેલના સચિવના પત્ર બાદ ડીએમએ SDMને કર્યા સસ્પેન્ડ

ઉત્તર પ્રદેશ : યુપીના બદાયુંમાં SDM સદરે સંપતિ સંબંધિત કેસમાં રાજ્યપાલના નામે સમન્સ જારી કર્યું હતું. સમન્સ રાજભવન પહોંચતા જ હંગામો મચી ગયો હતો. આ પછી રાજ્યપાલ આનંદીબેન પટેલ વતી તેમના સચિવે બદાયુંના DMને પત્ર મોકલીને પોતાનો વાંધો વ્યક્ત કર્યો હતો. જેમાં ચેતવણી આપવામાં આવી હતી. હવે સરકારે રાજ્યપાલને સમન્સ મોકલનાર SDMને ગુરુવારે સસ્પેન્ડ કરી દીધા છે. સરકારની કાર્યવાહી બાદ બદાયુંના ડીએમએ વિરોધને સ્થગિત કરી દીધો હતો. ડીએમએ પેશકરને સસ્પેન્ડ કરી દીધા છે.

અનુચ્છેદ 361 મુજબ બંધારણીય પદ પર રહેલા વ્યક્તિ વિરુદ્ધ સમન્સ કે નોટિસ જારી કરી શકાતી નથી

મળતી માહિતી મુજબ, બદાયુંના સદર તહસીલના SDMએ 18 ઓક્ટોબરે રાજ્યપાલને તેમની ન્યાયિક અદાલતમાંથી કાયદાકીય વ્યવસ્થાઓને અવગણીને સમન્સ જારી કર્યા હતા. જેમાં એસડીએમ કોર્ટમાં પોતાનો પક્ષ રજૂ કરવા હાજર થવાનો આદેશ આપવામાં આવ્યો હતો. આ પછી, રાજ્યપાલના સચિવે જિલ્લા મેજિસ્ટ્રેટને પત્ર મોકલ્યો હતો અને આ પત્રમાં કહેવામાં આવ્યું હતું કે “બંધારણના અનુચ્છેદ 361 મુજબ બંધારણીય પદ પર રહેલા વ્યક્તિ વિરુદ્ધ કોઈ સમન્સ કે નોટિસ જારી કરી શકાતી નથી.” આ પત્ર રાજ્યપાલના વિશેષ સચિવ બદ્રીનાથ સિંહે મોકલ્યો હતો. જેમાં કલમ 361નું ઉલ્લંઘન માનીને વાંધો ઉઠાવવામાં આવ્યો હતો અને DMને આ મામલે દરમિયાનગીરી કરવા, નિયમ મુજબ કેસ રજૂ કરવા અને નોટિસ આપનાર વ્યક્તિ સામે જરૂરી કાર્યવાહી કરવા સૂચના આપવામાં આવી હતી. હવે સરકારે નોટિસ પાઠવનાર SDMને સસ્પેન્ડ કરી દીધા છે.

શું હતો આ સમગ્ર મામલો?

બદાયુંના રહેવાસી ચંદ્રહાસે સદર તહસીલના SDM લેખરાજ, સંબંધિત પીડબ્લ્યુડી અધિકારીઓ અને રાજ્યપાલને વિરોધ પક્ષ તરીકે પક્ષકાર બનાવ્યા પછી ન્યાયિક અદાલતમાં અરજી કરી હતી. SDM કોર્ટમાં દાખલ કરાયેલી અરજી અનુસાર, ચંદ્રહાસની કાકી કટોરી દેવીની સંપત્તિ તેમના એક સંબંધીએ તેમના નામે રજીસ્ટર કરાવી હતી. આ પછી સંપતિને લેખરાજના નામે વેચવામાં આવી હતી. અહેવાલ મુજબ, થોડા દિવસો બાદ બદાયું બાયપાસ પર સ્થિત બહેડી ગામ પાસે ઉક્ત જમીનનો કેટલોક ભાગ સરકાર દ્વારા સંપાદિત કરવામાં આવ્યો હતો. તે મિલકત હસ્તગત કર્યા પછી, લેખરાજને સરકાર તરફથી વળતર તરીકે લગભગ 12 લાખ રૂપિયાની રકમ મળી હતી. આ અંગે જાણ થતાં કટોરી દેવીના ભત્રીજા ચંદ્રહાસે સદર તહસીલની જ્યુડિશિયલ મેજિસ્ટ્રેટ કોર્ટમાં અરજી દાખલ કરી હતી. આ અરજી પર, એસડીએમ ન્યાયિક વિનીત કુમારની કોર્ટમાંથી લેખરાજ અને રાજ્યના રાજ્યપાલને રાજ્ય સંહિતાની કલમ 144 હેઠળ 7 ઓક્ટોબરના રોજ સમન્સ જારી કરવામાં આવ્યું હતું, જે 10 ઓક્ટોબરના રોજ રાજભવન પહોંચ્યું હતું. આ સમન્સમાં રાજ્યપાલને 18 ઓક્ટોબરે SDM જ્યુડિશિયલ કોર્ટમાં હાજર થવા અને પોતાનો પક્ષ રજૂ કરવા કહેવામાં આવ્યું હતું.

આ પણ જુઓ :યુપી કેબિનેટની બેઠકમાં 23 મહત્વપૂર્ણ પ્રસ્તાવ પાસ, યોગી સરકારે લીધા આ મોટા નિર્ણયો