iPhone, એન્ડ્રોઇડ એપથી કેબ બુકિંગ પર અલગ અલગ ચાર્જ? જાણો સરકારે શું લીધો મોટો નિર્ણય

નવી દિલ્હી, તા. 30 ડિસેમ્બર, 2024: ઉબેર અને ઓલા જેવી રાઇડ-હેલિંગ કંપનીઓ એન્ડ્રોઇડ વપરાશકર્તાઓ કરતા આઇફોન વપરાશકર્તાઓને વધુ ચાર્જ કરે છે તેવા દાવાઓ છેલ્લા કેટલાક સમયથી સોશિયલ મીડિયા પર ચર્ચાનો વિષય બન્યા છે. સોશિયલ મીડિયા બે ભાગમાં વહેંચાયેલું છે. ઘણા યૂઝર્સ આ કંપનીઓ સમાન સેવા માટે એન્ડ્રોઇડ વપરાશકર્તાઓ કરતાં આઇફોન વપરાશકર્તાઓને વધુ ચાર્જ કરી રહી હોવાનો દાવો કરી રહ્યા છે. આ મુદ્દો ઉઠતાં કેન્દ્ર સરકારે મોટો ફેંસલો કર્યો છે. કેન્દ્ર સરકારે એન્ડ્રોઇડ અને આઇઓએસ પર એક જ મુસાફરી માટે અલગ-અલગ દર વસૂલવાના આરોપોને પગલે ઓનલાઇન ટેક્સી અને ફૂડ ડિલિવરી સેવાઓની તપાસની જાહેરાત કરી છે.

કેન્દ્રીય ગ્રાહક બાબતોના મંત્રી પ્રહલાદ જોશીએ આ પ્રથાને  અયોગ્ય વેપાર પ્રથા અને ગ્રાહકોના પારદર્શિતાના અધિકારની ઘોર અવગણના તરીકે વર્ણવી હતી. એક્સ પર પોસ્ટ કરાયેલા એક નિવેદનમાં મંત્રી જોશીએ ગ્રાહક શોષણ માટે ઝીરો ટોલરન્સ પર ભાર મૂક્યો હતો અને જાહેરાત કરી હતી કે સેન્ટ્રલ કન્ઝ્યુમર પ્રોટેક્શન ઓથોરિટી (સીસીપીએ) ને આ આક્ષેપોની સંપૂર્ણ તપાસ કરવાનો નિર્દેશ આપવામાં આવ્યો છે. તેમણે કહ્યું, મેં સીસીપીએ દ્વારા જાગો ગ્રાહક જાગોને આ અંગે વિગતવાર તપાસ કરવા અને વહેલામાં વહેલી તકે અહેવાલ રજૂ કરવા નિર્દેશ આપ્યો છે.

આ તપાસ રાઇડ-હેલિંગ સેવાઓ સુધી મર્યાદિત રહેશે નહીં પરંતુ ડિજિટલ પ્લેટફોર્મ પર વ્યાપક ગ્રાહક સુરક્ષા સુનિશ્ચિત કરવા માટે ફૂડ ડિલિવરી અને ઓનલાઇન ટિકિટ બુકિંગ એપ્લિકેશન સહિત અન્ય ક્ષેત્રોને પણ આવરી લેશે.

કંપનીએ અલગ અલગ ચાર્જને લઈ શું કહ્યું

જોકે, કંપનીએ આ દાવાઓને નકારી કાઢ્યા છે. ઉબરે લખ્યું છે કે આ બંને સવારી વચ્ચે ઘણા તફાવતો છે જેના કારણે કિંમતોમાં તફાવત છે. આ વિનંતીઓ પર પિક-અપ પોઇન્ટ, ઇ. ટી. એ. અને ડ્રોપ-ઓફ પોઇન્ટ અલગ અલગ હોય છે, જે વિવિધ ભાડા તરફ દોરી જાય છે. આ મુદ્દા પર, અધિકારીઓ એવું પણ માને છે કે એગ્રીગેટર્સ પ્રાઇસિંગ એલ્ગોરિધમ્સમાં સુધારો કરવા માટે મશીન લર્નિંગ ફ્રેમવર્ક (ગૂગલ ક્લાઉડ એઆઈ અને એઝ્યુર એમએલ) નો ઉપયોગ કરે છે.

નિષ્ણાતોનું શું કહેવું છે?

ઉબેર અને ઓલા જેવી કંપનીઓ ડાયનેમિક પ્રાઇસિંગનો ઉપયોગ કરે છે, એટલે કે, માંગ અને પુરવઠાના આધારે સવારીની કિંમત બદલાય છે. કેટલીકવાર, આઇફોન વપરાશકર્તાઓને વધુ પ્રીમિયમ સવારી સેવા આપવામાં આવે છે, જેનો ખર્ચ પણ વધુ થઈ શકે છે. ઉબેરની ઉબેર બ્લેક જેવી પ્રીમિયમ સેવાઓ આઇફોન વપરાશકર્તાઓ માટે વધુ મોંઘી પડી શકે છે, કારણ કે આ સેવાઓ સામાન્ય રીતે આઇફોનનો ઉપયોગ કરતા વધુ સમૃદ્ધ વર્ગને ધ્યાનમાં રાખીને કરવામાં આવે છે.

આ પણ વાંચોઃ જયસ્વાલે રચ્ચો ઈતિહાસ, રોહિત શર્માનો રેકોર્ડ તોડી મચાવ્યો ખળભળાટ