ગોલમાલ-5 કન્ફર્મ : રોહિત શેટ્ટી ફરી એકવાર દર્શકોનું મનોરંજન કરવા તૈયાર

• અજય દેવગનની આ ફિલ્મ પહેલા કરતા પણ હશે મોટી, રોહિત શેટ્ટી તૈયારીમાં વ્યસ્ત

મુંબઈ, 18 જાન્યુઆરી: બોલિવૂડના ટોચના દિગ્દર્શકોમાંથી એક રોહિત શેટ્ટી ફરી એકવાર પોતાની ગોલમાલ ફ્રેન્ચાઈઝીથી દર્શકોનું મનોરંજન કરવા માટે તૈયાર છે. ‘સિમ્બા’, ‘સૂર્યવંશી’, ‘સિંઘમ’, ‘ચેન્નઈ એક્સપ્રેસ’ જેવી ફિલ્મો બનાવી ચૂકેલા ડિરેક્ટર રોહિત શેટ્ટીએ તેની આગામી ફિલ્મ ‘ગોલમાલ-5’ની પુષ્ટિ કરી છે. નિર્દેશકે ફિલ્મ ‘ગોલમાલ 5’ માટે ઉત્સાહ વ્યક્ત કર્યો અને કહ્યું કે, તેની ફિલ્મ ચોક્કસ બનશે પરંતુ બધાને તેના માટે લાંબો સમય રાહ જોવી પડશે. તે તેને ખૂબ જ ભવ્ય બનાવશે. હાલમાં તે તેની આગામી એક્શન ફિલ્મ સિંઘમ 3ના શૂટિંગમાં વ્યસ્ત છે.

‘પિંકવિલા’ સાથે વાત કરતા નિર્દેશક રોહિત શેટ્ટીએ કહ્યું કે, ‘ગોલમાલ 5 ચોક્કસપણે બનશે. ચાહકોના ઉત્સાહને જોઇને મારે તેને થોડી વહેલી બનાવવી પડશે. મને લાગે છે કે, તમને આગામી 2 વર્ષમાં ગોલમાલ 5 જોવા મળશે. રોહિત શેટ્ટીએ વધુમાં કહ્યું કે, સિનેમામાં તાજેતરના ફેરફારોને ધ્યાનમાં રાખીને, ગોલમાલ ફ્રેન્ચાઇઝીની આગામી ફિલ્મ અન્ય ફિલ્મો કરતાં વધુ સારી હશે.

ગોલમાલમાં એક્શન નહીં જોવા મળે : રોહિત શેટ્ટી

તેણે વધુમાં કહ્યું કે, મને લાગે છે કે, આજના સમયમાં સિનેમાએ ઓલ ધ બેસ્ટ અને ગોલમાલ જેવી ફિલ્મો કરતાં વધુ ભવ્ય અને મોટું થવું જોઈએ, જે મેં તે સમયે બનાવી હતી. મોટા પાયે, મારો મતલબ એક્શન નથી. હું ગોલમાલમાં એક્શન ઉમેરી શકતો નથી, પરંતુ હું સ્ટાઇલનું સ્તર વધારી શકું છું. ગોલમાલના ઘણા ચાહકો છે અને હું ચાહકો માટે આ બ્રાન્ડ બનાવી રહ્યો છું. આગામી ગોલમાલ મૂવી મોટી અને સારી હશે, ભલે તે કોમેડી ફ્રેન્ચાઈઝી હોય.

ચેન્નાઈ એક્સપ્રેસ જેવી ફિલ્મ બનાવવા માંગુ છું : નિર્દેશક

વાતચીત દરમિયાન રોહિત શેટ્ટીએ એક એવી ફિલ્મ બનાવવાની ઈચ્છા વ્યક્ત કરી જે તેના ‘કોપ-વર્સ’ પર આધારિત નથી. આ વિશે વાત કરતાં તેમણે કહ્યું કે, ‘મને પણ ચેન્નાઈ એક્સપ્રેસ જેવી ફિલ્મ બનાવવાની જરૂર લાગે છે. જો મને સારી અને ભવ્ય સ્ક્રિપ્ટ મળશે તો હું નવી ફિલ્મ બનાવીશ.

આ પણ જુઓ :આનંદ મહિન્દ્રાએ 12th Fail મૂવીને નેશનલ એવૉર્ડની હકદાર ગણાવી