અધધધ! સોનાનો ભાવ રૂ. 65,000ના નવા રેકોર્ડ સ્તરે પહોંચ્યો, ચાંદી પણ રૂ.900 મોંઘી

મુંબઈ, 06 માર્ચ: સોનું ઑલટાઇમ હાઈની સપાટીએ પહોંચ્યું છે. વૈશ્વિક બજારોમાં મજબૂતાઈના વલણ વચ્ચે બુલિયન માર્કેટમાં સોનાની કિંમતમાં 800 રૂપિયાનો ઉછાળો નોંધાયો હતો. આ સાથે સોનું 65,000 રૂપિયા પ્રતિ 10 ગ્રામ પર પહોંચી ગયું છે. આ સોનાનો નવો રેકોર્ડ સ્તર છે. છેલ્લા ટ્રેડિંગ સેશનમાં સોનું 64,200 રૂપિયા પ્રતિ 10 ગ્રામ પર બંધ થયું હતું. HDFC સિક્યોરિટીઝે આ માહિતી આપી હતી.

બીજી તરફ, ચાંદીની વાત કરીએ તો, ચાંદીની કિંમત પણ 900 રૂપિયા વધીને 74,900 રૂપિયા પ્રતિ કિલો થઈ ગઈ છે. છેલ્લા ટ્રેડિંગ સેશનમાં તેની કિંમત રૂ. 74,000 પ્રતિ કિલોગ્રામ પર બંધ થઈ ગઈ હતી. HDFC સિક્યોરિટીના વરિષ્ઠ કોમોડિટી એનાલિસ્ટ સૌમિલ ગાંધીનું કહેવું છે કે, દિલ્હીના બજારમાં 24 કેરેટ સોનું 65,000 રૂપિયા પ્રતિ 10 ગ્રામના હાજર ભાવે ટ્રેડ થઈ રહ્યું હતું, જે અગાઉ બંધ થયેલા ભાવમાં 800 વધારો નોંધાયો છે. તેમણે કહ્યું કે, ‘ઘરેલું બજારોમાં સ્પોટ ગોલ્ડ મંગળવારે રૂ. 65,000ની નવી ઑલટાઇમ હાઈ પર પહોંચ્યું હતું.

સોનાના ભાવ આ કારણો પર આધાર રાખે છે

સોનાની કિંમત મોટાભાગે બજારમાં સોનાની માંગ અને પુરવઠાના આધારે નક્કી કરવામાં આવે છે. જો સોનાની માંગ વધશે તો દર પણ વધશે. સોનાનો પુરવઠો વધશે તો ભાવ ઘટશે. સોનાના ભાવ પર વૈશ્વિક આર્થિક સ્થિતિની પણ અસર થાય છે. ઉદાહરણ તરીકે, જો આંતરરાષ્ટ્રીય અર્થતંત્ર નબળું પ્રદર્શન કરી રહ્યું હોય, તો રોકાણકારો સુરક્ષિત રોકાણ વિકલ્પ તરીકે સોના તરફ જોશે. તેનાથી સોનાની કિંમતમાં વધારો થશે.

આ પણ વાંચો: હવે મશરૂમમાંથી મળશે સોનું! વૈજ્ઞાનિકોએ સોનાના નાના કણોની શોધનો કર્યો દાવો