‘ભૂતે’ નોંધાવી FIR: પોલીસને નિવેદન પણ આપ્યું, આ અનોખો કિસ્સો આવ્યો કોર્ટ સમક્ષ!

HD ન્યૂઝ ડેસ્ક, 9 ઓગસ્ટ, અલાહાબાદ હાઈકોર્ટનો એક અજીબોગરીબ મામલો સાંભળી સૌ કોઈ દંગ રહી ગયા છે. શું કોઈ ભૂત FIR નોંધાવી શકે? વર્ષ 2014માં મૃતક વ્યક્તિના નામે જમીનના વિવાદમાં એક જ પરિવારના 5 લોકો સામે કેસ દાખલ કરવામાં આવ્યો હતો. તે જ સમયે, તપાસ અધિકારીએ નિવેદન નોંધ્યું હતું અને ચાર્જશીટ દાખલ કરી હતી. કોર્ટમાં માહિતી આપવામાં આવી કે વર્ષ 2014માં શબ્દપ્રકાશ નામના વ્યક્તિએ પુરુષોત્તમ અને અન્ય લોકો વિરુદ્ધ છેતરપિંડીની FIR દાખલ કરી. પરંતુ ચોંકાવનારી વાત તો એ નીકળી કે શબ્દપ્રકાશનું નિધન તો વર્ષ 2011માં જ થઈ ચૂક્યું હતું.

આ મામલો યુપીના કુશીનગરનો છે. હકીકતમાં મૃત્યુના ત્રણ વર્ષ પછી મૃતક વ્યક્તિએ પોલીસ સ્ટેશનમાં એફઆઈઆર નોંધાવી હોવાનું કહેવામાં આવી રહ્યું છે. હવે તમે પણ વિચારી રહ્યા હશો કે ભૂત કેવી રીતે FIR નોંધાવી શકે? વ્યક્તિના મૃત્યુના ત્રણ વર્ષ બાદ શબ્દપ્રકાશના ‘ભૂતે’ અરજદાર વિરુદ્ધ FIR નોંધાવી છે. આ પછી પોલીસ તપાસ અધિકારીએ તે ‘ભૂત’નું નિવેદન પણ નોંધ્યું અને કોર્ટમાં ચાર્જશીટ પણ દાખલ કરી. આશ્ચર્યની વાત એ છે કે આ કથિત ભૂતે 19 ડિસેમ્બર 23ના રોજ હાઈકોર્ટમાં દાખલ કરેલી અરજીમાં વકાલતનામા પર પણ હસ્તાક્ષર કર્યા હતા!

મૃત્યુ પામેલા વ્યક્તિનું નિવેદન કેવી રીતે નોંધ્યું?

કેસની સુનાવણી કરી રહેલા જસ્ટિસ સૌરભ શ્યામ શમશેરી પણ આ બધું જોઈને આશ્ચર્યચકિત થઈ ગયા હતા. તેમણે કહ્યું કે આ કેસની વિગતોથી પોતે અવાચક બની ગયા છે. આખરે પોલીસ ગુનાની તપાસ કેવી રીતે કરે છે? પોલીસે ત્રણ વર્ષ પહેલાં મૃત્યુ પામેલા વ્યક્તિનું નિવેદન કેવી રીતે નોંધ્યું? આ મામલામાં કોર્ટે એસપી કુશીનગરને તપાસ અધિકારી સમક્ષ પોતાનું નિવેદન નોંધવા નિર્દેશ આપ્યો છે કે ભૂત નિર્દોષોને પરેશાન કરી રહ્યું છે. આ બાબતમાં તપાસ અધિકારીએ તપાસ કરીને અહેવાલ રજૂ કરવો જોઈએ. કોર્ટે અરજદાર પુરુષોત્તમ સિંહ અને અન્ય ચાર વિરુદ્ધ ફોજદારી કેસની કાર્યવાહી પણ રદ કરી હતી.

ફરિયાદી શબ્દપ્રકાશનું મૃત્યુ 19 ડિસેમ્બર 2011ના રોજ થયું હતું, જેને CJM કુશીનગરના રિપોર્ટમાં પણ સમર્થન આપવામાં આવ્યું છે. તેમણે મૃતકની પત્નીના નિવેદન અને મૃત્યુ પ્રમાણપત્રના આધારે રિપોર્ટ આપ્યો હતો. મૃત વ્યક્તિના ભૂતે 2014માં કોતવાલી પોલીસ સ્ટેશનમાં FIR નોંધાવી હતી, પોલીસે 23 નવેમ્બર 2014ના રોજ ચાર્જશીટ દાખલ કરી હતી. આ સાથે કથિત ભૂતને ફરિયાદ પક્ષના સાક્ષી તરીકે નામ આપવામાં આવ્યું હતું, આ અરજીમાં કેસની કાર્યવાહીની માન્યતાને પડકારવામાં આવી હતી અને તેને રદ કરવાની માંગ કરવામાં આવી હતી.

આ પણ વાંચો..ગર્લફ્રેન્ડને iphone 15 ગિફ્ટમાં આપવા પ્રેમીએ પોતાના જ ઘરમાં કર્યો આ અપરાધ