ગૌતમ અદાણીએ સુપ્રીમ કોર્ટના ચુકાદા બાદ કહ્યું, સત્યમેવ જયતે

• ગૌતમ અદાણીએ અદાણી-હિંડનબર્ગ કેસ પર સુપ્રીમ કોર્ટના નિર્ણય પર ખુશી વ્યક્ત કરી છે. તેમણે કહ્યું કે આ સત્યની જીત થઈ છે, આ ઉપરાંત તેમણે તેમની પડખે ઊભા રહેલા તમામ લોકોનો આભાર માન્યો હતો.

નવી દિલ્હી, 03 જાન્યુઆરી: અદાણી ગ્રૂપના ચેરમેન ગૌતમ અદાણીએ અદાણી-હિંડનબર્ગ કેસ પર સુપ્રીમ કોર્ટના નિર્ણય બાદ તેમણે X (અગાઉ ટ્વિટર) પર એક પોસ્ટ કરી ખુશી વ્યક્ત કરી છે. તેમણે લખ્યું, ‘માનનીય સુપ્રીમ કોર્ટનો નિર્ણય દર્શાવે છે કે સત્યની જીત થઈ છે. સત્યમેવ જયતે. જેઓ અમારી પડખે ઊભા રહ્યા તેમનો હું આભારી છું. ભારતની વિકાસગાથામાં અમારું યોગદાન ચાલુ રહેશે. જય હિંદ.’

અદાણી-હિંડનબર્ગ કેસમાં સુપ્રીમ કોર્ટે બુધવારે પોતાનો ચુકાદો આપ્યો છે. કોર્ટે કહ્યું કે આ કેસમાં SEBI પાસેથી SITને તપાસ ટ્રાન્સફર કરવાનો કોઈ આધાર નથી. સુપ્રીમ કોર્ટે સેબીના નિયમનકારી માળખામાં દખલ કરવાની તેની મર્યાદિત સત્તા વિશે પણ વાત કરી હતી.

The Hon’ble Supreme Court’s judgement shows that:

Truth has prevailed.
Satyameva Jayate.

I am grateful to those who stood by us.

Our humble contribution to India’s growth story will continue.

Jai Hind.

— Gautam Adani (@gautam_adani) January 3, 2024

સુપ્રીમ કોર્ટે શું આપ્યો નિર્ણય?

મુખ્ય ન્યાયાધીશ ચંદ્રચુડે કહ્યું કે સેબીએ 22માંથી 20 કેસમાં તેની તપાસ પૂર્ણ કરી છે. બાકીના 2 કેસમાં તપાસ પૂર્ણ કરવા માટે તેમણે સેબીને વધુ 3 મહિનાનો સમય આપ્યો છે. મુખ્ય ન્યાયાધીશે કહ્યું કે અદાણી-હિંડનબર્ગ કેસની તપાસ સેબી પાસેથી એસઆઈટીને ટ્રાન્સફર કરવા માટે કોઈ આધાર નથી. તેમણે કહ્યું કે તપાસ ટ્રાન્સફર કરવાની સત્તાનો ઉપયોગ અસાધારણ સંજોગોમાં જ થવો જોઈએ.

કોર્ટે અરજીઓ ફગાવી

સુપ્રીમ કોર્ટે તેના નિયમનકારી માળખામાં દખલ કરવાની સેબીની મર્યાદિત સત્તાઓ વિશે પણ વાત કરી હતી. મુખ્ય ન્યાયાધીશે કહ્યું કે સેબીના નિયમનકારી માળખામાં દખલ કરવાની કોર્ટની સત્તા મર્યાદિત છે. સુપ્રીમ કોર્ટે એફપીઆઈ અને એલઓડીઆર નિયમોમાં થયેલા સુધારાને રદ કરવાની સેબીની માગણી કરતી અરજીઓને પણ ફગાવી દીધી હતી.

શૅરમાં ઉછાળો જોવા મળ્યો

સુપ્રીમ કોર્ટના નિર્ણય બાદ બુધવારે સવારથી જ અદાણી ગ્રૂપના શૅરમાં સારો ઉછાળો જોવા મળી રહ્યો છે. બુધવારે બપોરે અદાણી એન્ટરપ્રાઈઝમાં 2.11 ટકાના વધારા સાથે અને અદાણી પોર્ટ્સમાં 1.21 ટકાના વધારા સાથે ટ્રેડિંગ જોવામાં આવ્યું હતું. આ સિવાય અદાણી પાવરમાં 3.04%, અદાણી એનર્જીમાં 7.84%, અદાણી ગ્રીનમાં 4.02%, અદાણી ટોટલમાં 6.14% અને અદાણી વિલ્મરમાં 3.96%નો વધારો જોવા મળ્યો હતો.

આ પણ વાંચો: ગુજરાતમાં વધ્યા પેટ્રોલના ભાવ, ડીઝલમાં કોઈ ફેરફાર નહીં, જાણો શું છે નવો ભાવ