ભારત ફરવા આવેલી વિદેશી મહિલા પર સામૂહિક દુષ્કર્મ, પીડિતા બાઈક પર હોસ્પિટલ પહોંચી

• સ્પેનથી ભારત ફરવા આવેલી 28 વર્ષીય મહિલા પર સામૂહિક દુષ્કર્મ
• મહિલા રાત્રે દુમકાના તંબુમાં સૂતી હતી ત્યારે દુષ્કર્મની ધટના બની
• હાલ મહિલાને હોસ્પિટલમાં દાખલ કરવામાં આવી છે, પોલીસ તપાસ કરી રહી છે

ઝારખંડ, 2 માર્ચ: વિદેશથી ભારત ફરવા આવેલી મહિલા પર સામૂહિક દુષ્કર્મની ઘટના પ્રકાશમાં આવી છે. મહિલા તેના પતિ સાથે ઝારખંડના દુમકા પહોંચી હતી. અહીં લગભગ 8-10 આરોપીઓએ દુષ્કર્મ આચર્યું હતું. પોલીસે આ મામલે ગુનો નોંધી તપાસ શરૂ કરી છે. સારવાર માટે પીડિતા પોતે તેના પતિ સાથે બાઇક પર બેસીને સારવાર માટે હોસ્પિટલ પહોંચી હતી. ડૉક્ટરોએ પીડિતાને હોસ્પિટલમાં દાખલ કરી છે.

મળતી માહિતી મુજબ આ મામલો હંસદિહા પોલીસ સ્ટેશન વિસ્તારના કુરુમહાતનો છે. સ્પેનની એક મહિલા અહીં ફરવા માટે આવી હતી. આ ઘટના ગત શુક્રવારે રાત્રે બની હોવાનું કહેવાય છે. મહિલાનો પતિ પણ તેની સાથે હતો. બધા બાઇક પર ભાગલપુર તરફ નીકળ્યા હતા.

પતિ-પત્ની વિદેશથી ટુરિસ્ટ વિઝા પર ભારત આવ્યા હતા. આ લોકો સ્પેન પહેલા પાકિસ્તાન ગયા હતા. આ પછી પાકિસ્તાનથી બાંગ્લાદેશ અને પછી બાંગ્લાદેશ થઈને ઝારખંડના દુમકા પહોંચ્યા હતા. અહીં આ લોકો દુમકાના હંસદિહા પોલીસ સ્ટેશન વિસ્તારના કુંજી ગામમાં તંબુઓમાં રોકાયા હતા.

ઝારખંડથી સ્પેનિશ મહિલાને નેપાળ જવાનું હતું. જ્યારે મહિલા તંબુમાં હતી ત્યારે લગભગ આઠથી દસ લોકો ત્યાં પહોંચી ગયા હતા અને મહિલા સાથે સામૂહિક દુષ્કર્મ કર્યું હતું. દુષ્કર્મ પીડિત વિદેશી મહિલાને પોલીસ એસ્કોર્ટ સાથે દુમકા સદર હોસ્પિટલમાં લાવવામાં આવી છે. પીડિત મહિલા તેના પતિ સાથે બાઇક પર સવાર થઈને દુમકા હોસ્પિટલ પહોંચી હતી. મામલાની ગંભીરતા જોઈને એસપી પીતામ્બર સિંહ ખેરવાર ઘટનાસ્થળે પહોંચી ગયા હતા અને તપાસ કરી હતી. પોલીસે ત્રણ લોકોની અટકાયત કરી છે, તેમની પૂછપરછ કરવામાં આવી રહી છે.

• વિપક્ષે વિદેશી મહિલા પર સામૂહિક દુષ્કર્મનો મામલો ગૃહમાં ઉઠાવ્યો હતો. હંગામા વચ્ચે ગૃહની કાર્યવાહી 12 વાગ્યા સુધી સ્થગિત કરી દેવામાં આવી હતી.

ભાજપે કહ્યું- પીડિતને SIT બનાવીને મદદ મળવી જોઈએ

ભારતીય જનતા પાર્ટીએ આ ઘટનાની સખત નિંદા કરી છે અને તેને દુર્ભાગ્યપૂર્ણ અને શરમજનક ગણાવી છે. રાજ્યના પ્રવક્તા પ્રતુલ શાહદેવે કહ્યું કે હેમંત સોરેન પાર્ટ 2 સરકારમાં મહિલાઓ સંપૂર્ણપણે અસુરક્ષિત છે. એસઆઈટીની તાત્કાલિક રચના કરવી જોઈએ અને ગુનેગારોની ધરપકડ કરવામાં આવે અને સ્પેનિશ મહિલાને શક્ય તમામ મદદ પૂરી પાડવામાં આવે.

ભાજપના ધારાસભ્યએ સરકાર પર નિશાન સાધ્યું હતું

સ્પેનિશ મહિલા પર સામૂહિક બળાત્કારના મામલામાં ભાજપના ધારાસભ્ય અનંત ઓઝાનું કહેવું છે કે આ ઘટના રાજ્ય પર એક ડાઘ છે. અહીં કાયદો અને વ્યવસ્થા કથળી રહી છે. અહીં વિદેશીઓ પણ સુરક્ષિત નથી. પોલીસે આ મામલે વહેલી તકે કડક કાર્યવાહી કરવી જોઈએ અને સરકારે પણ તેની નોંધ લેવી જોઈએ. આવા બેફામ તત્વો સામે કડક પગલાં લેવા જોઈએ. આ સરકાર સદંતર નિષ્ફળ ગઈ છે.

આ પણ વાંચો: નીતિન ગડકરીની કોંગ્રેસ નેતાઓને કાનૂની નોટિસ, “ઈન્ટરવ્યૂને તોડી-મરોડી રજૂ કરાયો”