CBIના નામે ઠગ ટોળકીએ બિહારમાં પ્રખ્યાત ડોક્ટર પાસેથી 4.40 કરોડની લૂંટ ચલાવી

• મોબાઈલ અને ડીજીટલની દુનિયાના યુગમાં ઓનલાઈન બેંકિંગના વધતા ઉપયોગ સાથે ઓનલાઈન છેતરપિંડીના કિસ્સાઓ વધ્યા 

ગયા, 23 ઓગસ્ટ: મોબાઈલ અને ડીજીટલની દુનિયામાં માણસો માટે ઘણા અઘરા કામો ખુબ જ સરળ બન્યા છે. ઓનલાઈન બેંકિંગે લોકોને તેમની આંગળીના ટેળવા પર બેંકિંગ સુવિધા આપી છે. જેના કારણે હવે લોકોને કોઈપણ કામ માટે બેંકમાં લાંબી લાઈનોમાં ઉભુ રહેવુ પડતું નથી, પરંતુ આ ઓનલાઈન બેંકિંગના વધતા ઉપયોગ સાથે ઓનલાઈન છેતરપિંડીના કિસ્સાઓ પણ વધી રહ્યા છે. આવી છેતરપિંડીથી બચવા માટે સરકાર દ્વારા ઝુંબેશ પણ ચલાવવામાં આવે છે, પરંતુ લોકોની થોડી બેદરકારીના કારણે લાખો કરોડોની છેતરપિંડી થાય છે. હવે બિહારમાંથી ઓનલાઈન છેતરપિંડીનો આવો જ એક મામલો બહાર આવ્યો છે. ગયા જિલ્લાના એક પ્રખ્યાત ડૉક્ટર સાથે CBIના નામે ઠગ ટોળકીએ 4 દિવસમાં 4.40 કરોડની છેતરપિંડી કરી. ડૉક્ટરને આ છેતરપિંડીનો ત્યારે અહેસાસ થયો જ્યારે તેણે ઠગ ટોળકીના ખાતામાં પૈસા ટ્રાન્સફર કર્યા.

નકલી CBI બનીને ડોક્ટર સાથે કરોડોની છેતરપિંડી

ગયા જિલ્લાના એક પ્રખ્યાત ડૉક્ટર સાથે CBIના નામે કરોડો રૂપિયાની છેતરપિંડી થયાનો મામલો બહાર આવ્યો છે. ડૉક્ટરને છેતરપિંડીનો અહેસાસ ત્યારે થયો જ્યારે તેણે ઠગ ટોળકીના ખાતામાં પૈસા ટ્રાન્સફર કર્યા. આ પછી ડોક્ટરે સાયબર પોલીસ સ્ટેશનમાં કેસ નોંધાવ્યો. સાયબર ઠગ ગેંગે ગયાના પ્રખ્યાત ડોક્ટર એ.એન. રાયનો સંપર્ક કર્યો હતો. ગેંગના સભ્યોએ ડૉક્ટરને જણાવ્યું હતું કે, અમે CBIના છીએ. તમારા ખાતામાં ઘણા પૈસા છે.

નકલી CBI દ્વારા ડોક્ટરને કેવી રીતે છેતરવામાં આવ્યા?

આ સાથે ગેંગના સભ્યોએ કહ્યું કે, તમારું મુંબઈમાં પણ બેંક ખાતું છે. તમારી વિરુદ્ધ મની લોન્ડરિંગનો કેસ નોંધવામાં આવ્યો છે. જો તમારે પૈસા બચાવવા હોય તો આ ખાતામાં પૈસા મોકલો, નહીં તો જેલ જવા માટે તૈયાર થઈ જાઓ. સાયબર ગેંગની આ વાતથી ડૉ. એ.એન. રાય ડરી ગયા. જેલ જવાના ડરથી ડૉ.એ.એન.રાયે 4 દિવસમાં 4 કરોડ 40 લાખ રૂપિયા સાયબર ગેંગે આપેલા ખાતામાં ટ્રાન્સફર કરી દીધા. જ્યારે પૈસા ટ્રાન્સફર કર્યા ત્યારે પીડિત ડોક્ટરને ખબર પડી કે તે છેતરપિંડીનો શિકાર બન્યા છે. છેતરપિંડી થયા બાદ ડોક્ટરે સાયબર પોલીસ સ્ટેશનમાં અજાણ્યા લોકો વિરુદ્ધ કેસ દાખલ કર્યો હતો.

આ છેતરપિંડી અંગે પોલીસે શું કહ્યું?

આ અંગે વરિષ્ઠ SP આશિષ ભારતીએ જણાવ્યું કે. ગયા જિલ્લાના પ્રખ્યાત ડોક્ટર એ.એન.રાય સાયબર ફ્રોડનો શિકાર બન્યા છે. CBI તરીકે ઓળખાતા સાયબર ઠગોએ 4 કરોડ 40 લાખ રૂપિયાની છેતરપિંડી કરી છે. આ સાથે સાયબર પોલીસ સ્ટેશનમાં કેસ નોંધવામાં આવ્યો છે અને SITની રચના કરવામાં આવી છે. ટીમ આ મામલે સતત તપાસ કરી રહી છે. સાયબર ઠગ આંધ્રપ્રદેશ અને દિલ્હી સહિત અન્ય રાજ્યોમાંથી કનેક્શન મેળવી રહ્યા છે. SITની ટીમ કાર્યવાહી કરી રહી છે. ટૂંક સમયમાં તમામ આરોપીઓ પોલીસ કસ્ટડીમાં આવશે.

આ પણ જૂઓ: બાળકોની સોદાબાજીના રેકેટનો આ રીતે થયો ખુલાસોઃ ચાર ઝડપાયા