પ્રથમ રાષ્ટ્રપતિથી લઈને દ્રૌપદી મૂર્મૂ સુધી! કેટલી સત્તાવાર કાર બદલાઈ? જાણો

• 18મી લોકસભાના પ્રથમ સત્રમાં રાષ્ટ્રપતિ દ્રૌપદી મૂર્મૂએ સંબોધન કર્યું 

નવી દિલ્હી, 27 જૂન: 18મી લોકસભાનું પ્રથમ સત્ર ચાલી રહ્યું છે અને તમામ નવા ચૂંટાયેલા સભ્યોએ શપથ લીધા છે. આજે ગુરુવારે રાષ્ટ્રપતિ દ્રૌપદી મૂર્મૂ લોકસભા અને રાજ્યસભાની સંયુક્ત બેઠકને સંબોધિત કરવા સંસદ પહોંચ્યા હતા. જ્યાં રાષ્ટ્રપતિ દ્વારા સંબોધન કરવામાં આવ્યું હતું અને અહીં તેમણે આગામી 5 વર્ષ માટે નવી સરકારના રોડમેપની રૂપરેખા રજૂ કરી હતી. આ સભાને સંબોધવા માટે, રાષ્ટ્રપતિ દ્રૌપદી મૂર્મૂ તેમની સત્તાવાર કાર મર્સિડીઝ-બેન્ઝ S600 પુલમૈન ગાર્ડમાં આવ્યા હતા.

દેશના રાષ્ટ્રપતિની કાર અત્યાધુનિક ટેક્નોલોજી અને સુવિધાઓથી સજ્જ છે. આ એક બખ્તરબંધ કાર છે જે ગોળીબાર અથવા કોઈપણ પ્રકારના બોંબ વિસ્ફોટથી પ્રભાવિત થતી નથી. દેશના પ્રથમ રાષ્ટ્રપતિ ડૉ. રાજેન્દ્ર પ્રસાદથી લઈને દ્રૌપદી મૂર્મૂ સુધી ભારતના રાષ્ટ્રપતિની સત્તામાં ઘણા ફેરફારો જોવા મળ્યા છે.

કેવી છે રાષ્ટ્રપતિ દ્રૌપદી મૂર્મૂની કાર?

ભારતના પંદરમા રાષ્ટ્રપતિ દ્રૌપદી મૂર્મૂની સત્તાવાર કાર મર્સિડીઝ બેન્ઝ S600 પુલમૈન ગાર્ડ ખૂબ જ ખાસ છે. આ એક વિસ્ફોટક પ્રતિરોધક વાહન છે. જે 2010-લેવલ અને VR9 લેવલ બેલિસ્ટિક પ્રોટેક્શનથી સજ્જ છે. આ બખ્તરબંધ લક્ઝરી સલૂન કાર મોટા બોંબ વિસ્ફોટોનો સામનો કરવાની શક્તિ ધરાવે છે. રિપોર્ટ અનુસાર, આ કાર લગભગ 2 મીટરના અંતરથી 15 કિલો TNT અને AK-47 જેવી ઓટોમેટિક રાઈફલ્સના ફાયરિંગનો સામનો કરી શકે છે. એટલું જ નહીં, આ કારની ગ્લાસ એટલા મજબૂત છે કે 7.62×51 MMની બુલેટ પણ તેમાં પ્રવેશી શકતી નથી.

કારમાં શું છે વિશેષ સુવિધાઓ મળશે?

મર્સિડીઝ બેન્ઝ દ્વારા તૈયાર કરવામાં આવેલી આ રાષ્ટ્રપતિની કાર ઘણી અત્યાધુનિક ટેક્નોલોજી અને ફીચર્સથી સજ્જ છે. કહેવાય છે કે, આ કાર ટાયર ફાટ્યા પછી પણ કેટલાય કિલોમીટર ચાલી શકે છે. આ સિવાય તેમાં સેલ્ફ-સીલિંગ ફ્યુઅલ ટાંકી અને અગ્નિશામક સિસ્ટમ પણ આપવામાં આવી છે. કારની બોડી મજબૂત સ્ટીલની બનેલી છે, જે અભેદ્ય કિલ્લાથી ઓછી નથી.

આ કારમાં બુલેટ પ્રૂફ એલોય વ્હીલ્સ, પ્રિવેન્ટિવ શિલ્ડ અને ઓટોમેટેડ લોક કંટ્રોલ, ઓક્સિજન સપ્લાય, પેનિક એલાર્મ સિસ્ટમ અને ઈમરજન્સી આસિસ્ટ જેવી ઘણી મહત્ત્વપૂર્ણ સુવિધાઓ પણ છે.

ખાસ નંબર પ્લેટ:

મહત્ત્વપૂર્ણ છે કે, ભારતના રાષ્ટ્રપતિની ઓફિશિયલ કાર પર નંબર પ્લેટની ઉપર ભારતનું રાષ્ટ્રીય પ્રતીક એટલે કે ‘અશોક સ્તંભ’ અંકિત હોય છે. જે સૂચવે છે કે, આ દેશના રાષ્ટ્રપતિની સત્તાવાર કાર છે. દ્રૌપદી મૂર્મૂ પહેલા દેશના ચૌદમા રાષ્ટ્રપતિ રામનાથ કોવિંદ પણ આ જ કારમાં મુસાફરી કરતા હતા. દેશ પ્રજાસત્તાક બન્યો અને પ્રથમ રાષ્ટ્રપતિ ચૂંટાયા પછી, ભારતીય રાષ્ટ્રપતિની સત્તાવાર કારમાં છેલ્લા 74 વર્ષમાં ઘણા મોટા ફેરફારો જોવા મળ્યા છે.

PBJના હાથમાં હોય છે રાષ્ટ્રપતિની સુરક્ષા

ભારતના રાષ્ટ્રપતિની સુરક્ષાની જવાબદારી રાષ્ટ્રપતિના બોડી ગાર્ડને સોંપવામાં આવે છે, જેને રાષ્ટ્રપતિના બોડી ગાર્ડ અથવા PBG તરીકે પણ ઓળખવામાં આવે છે. તેમની પોતાની અલગ રેજિમેન્ટ પણ છે. આ રેજિમેન્ટમાં સેનાના અલગ-અલગ યુનિટમાંથી સૈનિકોને લેવામાં આવે છે. આ પછી તેમને ખાસ તાલીમ પણ આપવામાં આવે છે.

આ રેજિમેન્ટના દરેક સૈનિક પેરા ટ્રુપિંગ સહિત વિવિધ વિષયોમાં નિપુણ છે. આ રેજિમેન્ટની સૌથી મોટી ઓળખ તેના સુંદર ઘોડાઓ છે. તમને જાણીને નવાઈ લાગશે કે રાષ્ટ્રપતિના કાફલામાં સામેલ ઘોડા જર્મન જાતિના છે. સેનામાં આ એકમાત્ર જાતિ છે જેને લાંબા વાળ રાખવાની છૂટ છે. ઘોડાઓની આ જાતિ સિવાય, અન્ય કોઈપણ જાતિના ઘોડાઓને લાંબા વાળ રાખવાની મંજૂરી નથી.

ભારતીય રાષ્ટ્રપતિની સત્તાવાર કાર આ રીતે બદલાતી રહીઃ

પ્રતિભા પાટીલના સમયમાં કાર અપગ્રેડ કરવામાં આવી હતી

જુલાઈ 2007માં, જ્યારે પ્રતિભા દેવી સિંહ પાટીલે દેશના 12મા રાષ્ટ્રપતિ તરીકે કાર્યભાર સંભાળ્યો, ત્યારે રાષ્ટ્રપતિની સત્તાવાર કાર છેલ્લે અપગ્રેડ કરવામાં આવી હતી. તે પહેલા, મર્સિડીઝ-બેન્ઝ X-ક્લાસ W 140 રાષ્ટ્રપતિની સત્તાવાર કાર હતી. પ્રતિભા પાટીલના કાર્યકાળ દરમિયાન, X-ક્લાસ S600 પુલમેન લિમોઝિનનો ઉપયોગ રાષ્ટ્રપતિના સત્તાવાર વાહન તરીકે થવા લાગ્યો. નેક્સ્ટ જનરેશનની આ કારમાં ઘણી અત્યાધુનિક સુવિધાઓ સામેલ કરવામાં આવી હતી.

અબ્દુલ કલામ કઈ કારમાં મુસાફરી કરતા હતા?

એ.પી.જે. અબ્દુલ કલામે 2002થી 2007 સુધી દેશના 11મા રાષ્ટ્રપતિ તરીકે પદ સંભાળ્યું હતું. તેઓ દેશના સૌથી લોકપ્રિય રાષ્ટ્રપતિઓમાંના એક રહ્યા છે. તેમના સમયગાળા દરમિયાન જ મર્સિડીઝ-બેન્ઝ X-ક્લાસ ડબલ્યુ 140ને સત્તાવાર રાષ્ટ્રપતિ કાર તરીકે સામેલ કરવામાં આવી હતી. જો કે, તેમના કાર્યકાળના અંતમાં એટલે કે 2007માં, અબ્દુલ કલામે હિન્દુસ્તાન એમ્બેસેડરનો ઉપયોગ કરવાનું શરૂ કર્યું હતું.

પ્રથમ બુલેટ અને ગ્રેનેડ પ્રૂફ કાર:

આપણે સૌ જાણીએ છીએ કે, ડૉ.રાજેન્દ્ર પ્રસાદ દેશના પહેલા રાષ્ટ્રપતિ હતા. પરંતુ દેશના નવમા રાષ્ટ્રપતિ ડૉ. શંકર દયાલ શર્મા (કાર્યકાળ 1992-1997) એવા પહેલા રાષ્ટ્રપતિ હતા જેમણે બુલેટ અને ગ્રેનેડ પ્રૂફ લિમોઝિન કારનો ઉપયોગ શરૂ કર્યો હતો. તે સમયે, મર્સિડીઝ-બેન્ઝ W124 તેમની સત્તાવાર કાર હતી, તે એક આર્મર્ડ કાર હતી જે સંપૂર્ણપણે બુલેટ અને ગ્રેનેડ પ્રૂફ હતી. બાદમાં, આ કારનો ઉપયોગ દેશના દસમા રાષ્ટ્રપતિ આર. નારાયણન (કાર્યકાળ: 1997-2002) દ્વારા કરવામાં આવ્યો હતો.

ભારતનું પ્રજાસત્તાક બનવું 

દેશને 77 વર્ષ પહેલા આઝાદી મળી હતી અને 15 ઓગસ્ટ 1947નો દિવસ દેશનો સ્વતંત્રતા દિવસ તરીકે ઉજવવામાં આવે છે. પરંતુ ભારત 74 વર્ષ પહેલાં એટલે કે 1950 સુધી ભારત એક ગણતંત્ર તરીકે જાણીતું ન હતું, જ્યાં સુધી ડૉ. બી.આર. આંબેડકરે બંધારણ લખ્યું ન હતું જેણે ભારતને પ્રજાસત્તાક બનાવ્યું.

આપણે વિશ્વમાં સૌથી યુવા લોકશાહી છીએ અને તે આ બંધારણ જ છે જે આપણને આપણા અધિકારો અને જવાબદારીઓ આપે છે. પરંતુ શું તમે જાણો છો કે જ્યાં સુધી રાષ્ટ્રપતિની પસંદગી ન થાય ત્યાં સુધી આપણી પાસે બંધારણ ન હતું? સ્વતંત્ર ભારતનું બંધારણ ઘડવામાં આવ્યું ત્યારે 26 જાન્યુઆરી, 1950ના રોજ ડૉ. રાજેન્દ્ર પ્રસાદ ભારતના પ્રથમ રાષ્ટ્રપતિ તરીકે ચૂંટાયા હતા.

દેશના પ્રથમ રાષ્ટ્રપતિની કારઃ

તત્કાલીન સરકારે કેડિલેક કન્ટ્રી કન્વર્ટિબલની આયાત કરી, જે ભારતના પ્રથમ રાષ્ટ્રપતિ ડૉ. રાજેન્દ્રપ્રસાદની કાર હતી. સત્તાવાર પ્રેસિડેન્શિયલ મોટરકેડમાં આ કારને સામેલ કરવા માટે તેને અમેરિકાથી આયાત કરવામાં આવ્યું હતું. કારને કાફલામાં ક્યારે ઉમેરવામાં આવી તે અંગે કોઈ ડેટા નથી, તેમ છતાં, જ્યારે અન્ય દેશોના રાજ્યોના વડાઓ સત્તાવાર મુલાકાતો માટે રાષ્ટ્રીય રાજધાનીમાં આવે ત્યારે કન્ટ્રી કન્વર્ટિબલનો ઉપયોગ કરવામાં આવતો હતો. મહત્ત્વપૂર્ણ છે કે, આ તે સમય હતો જ્યારે ઘોડા ગાડીઓ કાફલાનો મુખ્ય ભાગ હતી, તેથી ખાસ પ્રસંગોએ રાજ્યની ગાડીઓનો ઉપયોગ કરવામાં આવતો હતો. વધુમાં, કન્વર્ટિબલ્સ સામાન્ય રીતે ઇવેન્ટ્સ અને પરેડનો ભાગ પણ હતી.

આ પણ જુઓ: ફરી વિપક્ષે સેંગોલનો મુદ્દો ઉખેળ્યો: સેંગોલને બદલે બંધારણ રાખવાની કોણે માંગ કરી?