પૂર્વ રાષ્ટ્રપતિ પ્રણવ મુખર્જીની સમાધિ બનશે, પુત્રી શર્મિષ્ઠાએ PM મોદીનો આભાર માન્યો

નવી દિલ્હી, 7 જાન્યુઆરી : પૂર્વ વડાપ્રધાન મનમોહન સિંહની યાદમાં સમાધિ બનાવવાની કોંગ્રેસની માંગ વચ્ચે સરકારે પહેલા પૂર્વ રાષ્ટ્રપતિ પ્રણવ મુખર્જીની સમાધિ બનાવવાનો નિર્ણય કર્યો છે. 1 જાન્યુઆરીએ કેન્દ્રીય શહેરી વિકાસ મંત્રાલયે પ્રણવ મુખર્જીની પુત્રી શર્મિષ્ઠા મુખર્જીને પત્ર લખીને આ અંગે જાણકારી આપી હતી.

કોઈ પણ માંગણી વિના સમાધિ બનાવવાના સરકારના નિર્ણય પર ખુશી વ્યક્ત કરતા, શર્મિષ્ઠા મુખર્જીએ વડાપ્રધાન નરેન્દ્ર મોદીને મળ્યા અને તેના માટે તેમનો આભાર વ્યક્ત કર્યો હતો. નોંધનીય છે કે મોદી સરકારે 2019માં પ્રણવ મુખર્જીને દેશના સર્વોચ્ચ નાગરિક સન્માન ભારત રત્નથી સન્માનિત કર્યા છે.

રાજઘાટ પર સમાધિ બનાવવામાં આવશે

પ્રાપ્ત માહિતી અનુસાર, રાજઘાટ પાસે બનેલા નેશનલ મેમોરિયલ સાઈટમાં પ્રણવ મુખર્જીની સમાધિ માટે જમીનની ઓળખ કરવામાં આવી છે. દફન સ્થળની ઓળખ કર્યા બાદ શર્મિષ્ઠા મુખર્જીને જાણ કરવામાં આવી હતી. રાષ્ટ્રપતિ બનતા પહેલા પ્રણવ મુખર્જી ઈન્દિરા ગાંધી અને મનમોહન સિંહની સરકારમાં મહત્વપૂર્ણ મંત્રાલયોમાં મંત્રી રહી ચૂક્યા છે.

મહત્વનું છે કે, શર્મિષ્ઠા મુખર્જી છેલ્લા કેટલાક સમયથી તેમના પિતા પ્રણવ મુખર્જી પર કોંગ્રેસમાં યોગ્ય સન્માન ન મળવાને લઈને સતત પ્રહારો કરી રહી છે. રાષ્ટ્રપતિ બન્યા બાદ પ્રણવ મુખર્જીએ ઘણી વખત વડાપ્રધાન મોદીની કાર્યશૈલી અને જુસ્સાના વખાણ કર્યા હતા.

Called on Hon’ble PM @narendramodi ji to express thanks & gratitude from core of my heart 4 his govts’ decision 2 create a memorial 4 baba. It’s more cherished considering that we didn’t ask for it. Immensely touched by this unexpected but truly gracious gesture by PM🙏 1/2 pic.twitter.com/IRHON7r5Tk

— Sharmistha Mukherjee (@Sharmistha_GK) January 7, 2025

શર્મિષ્ઠા મુખર્જીએ પીએમ મોદીનો આભાર માન્યો હતો

શર્મિષ્ઠા મુખર્જીએ ઈન્ટરનેટ મીડિયા પ્લેટફોર્મ X પર તેના પિતાના નામે સમાધિ વિશે માહિતી પોસ્ટ કરતા કહ્યું કે આના કારણે તે જે ખુશી અનુભવી રહી છે તે શબ્દોમાં વ્યક્ત કરી શકતી નથી. તેમના મતે, આ વડાપ્રધાન મોદીની ઉદારતા અને ખાનદાની છે કે તેમણે પૂર્વ રાષ્ટ્રપતિના નામ પર એક સમાધિ બનાવવાનો નિર્ણય પણ કોઈ માંગણી વગર કર્યો હતો.

કોંગ્રેસ પર નિશાન સાધ્યું

આ સિવાય શર્મિષ્ઠા મુખર્જીએ મનમોહનની સમાધિની કોંગ્રેસની માંગને પણ આડે હાથ લીધી હતી. તેમના કહેવા પ્રમાણે, પ્રણવ મુખર્જી હંમેશા કહેતા કે સરકારી સન્માન ક્યારેય ન માંગવું જોઈએ, તે આપોઆપ આવવું જોઈએ. ઉલ્લેખનીય છે કે સરકારે પૂર્વ વડાપ્રધાન મનમોહન સિંહના નામ પર સમાધિ બનાવવાનું પણ આશ્વાસન આપ્યું છે. સરકારના જણાવ્યા અનુસાર, આ માટે ટ્રસ્ટની રચના થયા બાદ ટૂંક સમયમાં જમીનની ઓળખ અને ફાળવણીની પ્રક્રિયા શરૂ કરવામાં આવશે.

આ પણ વાંચો :- રાજ્યના ૩૨ જેટલા માર્ગો પર નવા મેજર-માઈનોર પૂલોના નિર્માણ માટે રૂ.૭૭૯ કરોડ મંજૂર