Forex Exchange Reserveમાં એક જ સપ્તાહમાં 8.31 બિલિયન ડોલરનો ઘટાડો

ભારતના વિદેશી મુદ્રા ભંડારમાં મોટો ઘટાડો નોંધાયો છે. 10 ફેબ્રુઆરી, 2023ના રોજ પૂરા થયેલા સપ્તાહમાં, વિદેશી મુદ્રા ભંડારમાં 8.31 ડોલર બિલિયનનો ઘટાડો થયો છે, જે 11 મહિનામાં દરેક સપ્તાહનો સૌથી મોટો ઘટાડો છે.

બેંકિંગ ક્ષેત્રના નિયમનકાર રિઝર્વ બેંક ઓફ ઈન્ડિયાએ વિદેશી મુદ્રા ભંડારને લઈને આ ડેટા જાહેર કર્યો છે. આ આંકડાઓ અનુસાર, 10 ફેબ્રુઆરી, 2023ના રોજ પૂરા થયેલા સપ્તાહમાં વિદેશી મુદ્રા ભંડાર 566.94 બિલિયન ડોલર પર આવી ગયો છે, જે 3 ફેબ્રુઆરી, 2023ના રોજ સમાપ્ત થયેલા સપ્તાહમાં 575.27 બિલિયન ડોલર હતો. તે સપ્તાહે વિદેશી મુદ્રા ભંડારમાં પણ 1.49 બિલિયન ડોલરનો ઘટાડો જોવા મળ્યો હતો. સતત ત્રણ સપ્તાહના વધારા પછી એક સપ્તાહમાં વિદેશી મુદ્રા ભંડારમાં આ પ્રથમ ઘટાડો હતો.\

આ પણ વાંચોઃ ‘5 ટ્રિલિયન ઈકોનોમી મજાક છે, તમે કેવી રીતે કહી શકો છો?’ નાણામંત્રીનો વિપક્ષ પર પ્રહાર

આનો અર્થ એ થયો કે માત્ર બે અઠવાડિયામાં વિદેશી મુદ્રા ભંડારમાં 10 બિલિયન ડોલરનો ઘટાડો થયો છે. આ જ સમયગાળામાં ફોરેન કરન્સી એસેટ 7.11 બિલિયન ડોલર ઘટીને 500.59 બિલિયન ડોલર થઈ છે. આ જ સમયગાળામાં ગોલ્ડ રિઝર્વમાં 919 મિલિયન ડોલરનો ઘટાડો થયો છે. ગોલ્ડ રિઝર્વ ઘટીને 42.86 બિલિયન ડોલર થયું છે, જ્યારે SDR 190 મિલિયન ઘટીને 18.35 બિલિયન ડોલર થઈ ગયું છે.

ઓક્ટોબર 2021માં વિદેશી મુદ્રા ભંડાર 645 બિલિયન ડોલરના ઐતિહાસિક સ્તરે પહોંચી ગયો હતો. ત્યારથી, વિદેશી રોકાણકારોના વેચાણને કારણે, વિદેશી મુદ્રા ભંડારમાં ઘટાડો થયો છે. તેથી RBIએ ડોલર સામે રૂપિયાના ઘટાડાને રોકવા માટે ડોલર વેચ્યા છે. એક સમયે એક ડોલર સામે રૂપિયો 83 રૂપિયાના સ્તરથી નીચે ગયો હતો. વૈશ્વિક કારણોસર ખાસ કરીને યુક્રેન પર રશિયાના હુમલા બાદ વિશ્વનું ચલણ ડોલર સામે નબળું પડી રહ્યું છે.

ફેડરલ રિઝર્વના વ્યાજ દરોમાં સતત વધારાને કારણે રોકાણકારો તેમના રોકાણ પાછા ખેંચી રહ્યા છે, જેમાં ભારત પણ સામેલ છે. જેના કારણે અનામત ઘટી રહી છે.