2024 પર ફોકસ, નીતિશે ગુજરાત પર બનાવ્યો પ્લાન, PM મોદીને તેના ગઢમાં જ પડકાર આપશે
બિહારના મુખ્યમંત્રી અને જનતા દળ યુનાઈટેડના નેતા નીતિશ કુમાર પણ ગુજરાત ચૂંટણીમાં ભારતીય જનતા પાર્ટી વિરુદ્ધ પ્રચાર કરવાનું મન બનાવી રહ્યા છે. બિહારમાં લાંબા સમય સુધી ભાજપ સાથે સરકાર ચલાવનાર નીતિશ કુમાર હવે આરજેડી-કોંગ્રેસ સાથે છે. 2024ની લોકસભા ચૂંટણી પહેલા બિહારની બહાર પોતાની હાજરી બનાવવાના પ્રયાસમાં નીતિશ કુમાર પીએમ મોદીના ગૃહ રાજ્યમાં પણ દસ્તક આપવાના છે.
બિહારની શાસક જેડીયુએ સોમવારે કહ્યું કે તે આદિવાસી નેતા છોટુભાઈ વસાવાના નેતૃત્વ હેઠળની ભારતીય ટ્રાઇબલ પાર્ટી (બીટીપી) સાથે ગુજરાતમાં ચૂંટણી લડવા માટે વાતચીત કરી રહી છે. ગુજરાતની ઝગડિયા સીટ પરથી સાત વખત ધારાસભ્ય રહી ચૂકેલા વસાવાએ મીડિયાને જણાવ્યું હતું કે તેમણે JDU અને BTP વચ્ચેના ગઠબંધન અંગે નીતિશ કુમાર સાથે વાત કરી હતી. “નીતીશ કુમાર ગઠબંધન સાથે ગુજરાતની ચૂંટણી લડવા માટે સંમત થયા છે.
BTPના સ્થાપક આદિવાસી નેતાએ કહ્યું, “BTP અને JDU જૂના મિત્રો છે અને તેથી અમે ચૂંટણી પૂર્વે જોડાણ કરવાનો નિર્ણય લીધો છે. અમે જેડીયુને મદદ કરીશું અને તેઓ અમને મદદ કરશે. બિહારના મુખ્યમંત્રી ગુજરાતમાં પ્રચાર કરશે. અમારો ઉદ્દેશ્ય વર્તમાન (ભાજપ) સત્તાને ઉખાડી નાખવાનો છે.
જેડીયુના રાષ્ટ્રીય મહાસચિવ અફાક અહેમદ ખાને ટાઈમ્સ ઓફ ઈન્ડિયા સાથેની વાતચીતમાં આ વાતની પુષ્ટિ કરતા કહ્યું કે જેડીયુ ગુજરાતમાં વિધાનસભાની ચૂંટણી લડવા માટે બીટીપી સાથે વાતચીત કરી રહી છે. ખાને કહ્યું, “વસાવા અમારા પોતાના છે, તેઓ 2017 સુધી JDU ગુજરાત યુનિટના અધ્યક્ષ હતા. અમે તે વિધાનસભા બેઠકોની ઓળખ કરી રહ્યા છીએ જ્યાં ઉમેદવારો મેદાનમાં ઉતરી શકે છે. ખાને કહ્યું કે, જો અમે (JDU) ચૂંટણી ન લડી શકીએ તો પણ અમારા નેતા નીતિશ કુમાર ગુજરાતની ચૂંટણીમાં ભાજપ વિરુદ્ધ પ્રચાર કરશે. ગુજરાતમાં 1 અને 5 ડિસેમ્બરે મતદાન થવાનું છે. 2017ની વિધાનસભા ચૂંટણીમાં BTPએ 6 બેઠકો પર ઉમેદવારો ઊભા રાખ્યા હતા અને 2 પર સફળતા મેળવી હતી. વસાવાએ 2017માં જેડીયુમાંથી રાજીનામું આપી દીધું હતું જ્યારે નીતિશે ફરીથી ભાજપ સાથે ગઠબંધનની જાહેરાત કરી હતી. હવે નીતીશ ફરી એકવાર ભાજપથી અલગ થઈ ગયા છે તેથી વસાવાએ ગઠબંધનની જાહેરાત કરી છે.
આ પણ વાંચો : કોંગ્રેસ છોડી ભાજપમાં આવેલાને મળશે ઈનામ, ભાજપ હાર્દિક-અલ્પેશને આપી શકે છે ટિકિટ
