મણિપુરમાં ફરી હિંસા ભડકી, ઉગ્રવાદીઓએ એક સૈન્ય કમાન્ડોની કરી હત્યા

ઈમ્ફાલ (મણિપુર), 17 જાન્યુઆરી: મણિપુરના તેંગનોપલ જિલ્લાના મોરેહમાં ઉગ્રવાદીઓએ સુરક્ષા દળોના વાહન પર હુમલો કર્યો હતો. જેમાં રાજ્ય પોલીસ કમાન્ડો સાથે જોડાયેલા ભારતીય રિઝર્વ બટાલિયન (IRB)ના સૈનિક વાંગખેમ સોમરજીતનું મૃત્યુ થયું હતું અને એક જવાન ઘાયલ થયો હતો. સોમરજીત પશ્ચિમ ઇમ્ફાલના માલોમનો રહેવાસી હતો. હુમલાખોરો કુકી સમુદાયના હોવાનું કહેવાય છે. મણિપુર પોલીસે જણાવ્યું કે આજે સવારે મોરેહમાં ત્રણ અલગ-અલગ સ્થળોએ સુરક્ષા દળો અને આતંકવાદીઓ વચ્ચે અથડામણ થઈ હતી. આતંકવાદીઓએ મોરેહ SBI નજીક એક સુરક્ષા ચોકી પર બોમ્બ ફેંક્યા અને ગોળીબાર કર્યો. આતંકવાદીઓએ અસ્થાયી કમાન્ડો પોસ્ટ પર પણ ગોળીબાર કર્યો હતો, જેનાથી નજીકમાં ઉભેલા અનેક વાહનોને નુકસાન થયું હતું. નોંધપાત્ર છે કે, હજુ બે દિવસ પહેલાં જ રાહુલ ગાંધીએ મણિપુરની મુલાકાત લીધી હતી.

Violence reported in Manipur’s Moreh, injured shifted to Imphal pic.twitter.com/HuK7zQ5Enb

— ANI (@ANI) January 17, 2024

શકમંદોની ધરપકડ બાદ હુમલો થયો

પોલીસ અધિકારીના જણાવ્યા અનુસાર, એક પોલીસની હત્યા સંબંધિત કેસમાં રાજ્ય દળોએ સરહદી શહેરમાં બે શકમંદોની ધરપકડ કર્યાના 48 કલાક પછી શંકાસ્પદ કુકી ઉગ્રવાદીઓએ સુરક્ષા દળોની ચોકી પર ગોળીબાર કર્યો હતો. અગાઉ મણિપુર સરકારે શાંતિમાં ખલેલ, તણાવનો માહોલ અને માનવ જીવન તેમજ સંપત્તિ માટે ગંભીર ખતરા સંબંધિત બાબતોને ધ્યાનમાં રાખ્યા પછી 16 જાન્યુઆરીની મધ્યરાત્રિએ 12 વાગ્યાથી તેંગનોપલમાં સંપૂર્ણ કર્ફ્યુ લાદ્યો હતો. તેમજ ઇમ્ફાલ પશ્ચિમ જિલ્લાના કૌત્રુક ગામમાં ગામના સ્વયંસેવકો અને શંકાસ્પદ કુકી ઉગ્રવાદીઓ વચ્ચે મંગળવારે રાત્રે બે કલાકથી વધુ સમય સુધી ગોળીબાર થયો હતો.

Security Forces Threatened By Kuki Narco Terrorist In #Moreh, Manipur

1. The recent attack by the Kuki Zo Militants on security forces at Moreh, Manipur, India, resulting in the martyrdom of a Jawan of the Indian Reserve Battalion (IRB), is a deeply concerning and disheartening… pic.twitter.com/tdwT5Va4MH

— Meckley W⛳ (@mapunachanbiba) January 17, 2024

પોલીસ જવાનોના વાહનો પર કરાયો ગોળીબાર

જો કે, આ અંગેની માહિતી મળતાં કેન્દ્રીય સુરક્ષા દળો વિસ્તારમાં પહોંચ્યા બાદ હુમલાખોરોએ ગોળીબાર બંધ કરી દીધો હતો. પોલીસે ગયા વર્ષે ઑક્ટોબરમાં સબ ડિવિઝનલ પોલીસ ઓફિસર (SDPO) સી આનંદની હત્યાના કેસમાં બે મુખ્ય શકમંદ ફિલિપ ખોંગસાઈ અને હેમોખોલાલ માટની ધરપકડ કરી હતી. બંનેએ સુરક્ષા કર્મચારીઓના વાહનો પર ગોળીબાર કર્યો હતો જે બાદ પોલીસે તેમનો પીછો કરીને તેમને ઝડપી પાડ્યા હતા.

શંકાસ્પદોને ઝડપી પડાતા કુકીઓએ કર્યો હતો વિરોધ

પોલીસે જણાવ્યું હતું કે બાદમાં બંનેને મોરેહના ન્યાયિક મેજિસ્ટ્રેટ સમક્ષ રજૂ કરાયા હતા જ્યાંથી તેમને નવ દિવસની પોલીસ કસ્ટડીમાં મોકલવામાં આવ્યા હતા. શંકાસ્પદોના કબજામાંથી હથિયારો અને દારૂગોળા મળી આવ્યા છે. અધિકારીઓએ જણાવ્યું કે મોટી સંખ્યામાં મહિલાઓએ મોરેહ પોલીસ સ્ટેશનની સામે બે શકમંદોની ધરપકડને લઈને વિરોધ કર્યો હતો. કુકી ઇનપી તેંગનોપલ (KIT), ચુરાચંદપુર જિલ્લાના સ્વદેશી આદિજાતિ લીડર્સ ફોરમ (ITLF) અને કાંગપોકપી જિલ્લાની આદિજાતિ એકતાની સમિતિ (COTU) એ બંનેની ધરપકડની નિંદા કરી છે જેના પગલે સુરક્ષા દળો પર હુમલો થયા હોવાનું કહેવાય છે.

આ પણ વાંચો: આર્મી ચીફે આપ્યા ભારતીય સરહદોના સુરક્ષા અપડેટ, મણિપુર વિશે કહી મોટી વાત