કઠુઆ અને કિશ્તવાડમાં એન્કાઉન્ટર, બે આતંકવાદીઓ ઠાર, 4 જવાનો ઘાયલ

શ્રીનગર, 13 સપ્ટેમ્બર : જમ્મુ-કાશ્મીરના કિશ્તવાડમાં સુરક્ષાદળો અને આતંકવાદીઓ વચ્ચે એન્કાઉન્ટર ચાલુ છે. આ અથડામણમાં સેનાના ચાર જવાન ઘાયલ થયા છે. સુરક્ષા દળોની સર્ચ ટીમો અને છુપાયેલા આતંકવાદીઓ વચ્ચે ગોળીબાર જિલ્લાના છત્રો પોલીસ સ્ટેશનના કાર્યક્ષેત્ર હેઠળના નૈદગામ ગામની ઉપરના પિંગનલ દુગડ્ડા જંગલ વિસ્તારમાં થયો હતો. જે બાદ જવાનોએ આતંકીઓને શોધવા માટે સર્ચ ઓપરેશન શરૂ કર્યું છે.

માહિતીના આધારે, કિશ્તવાડના ચત્રુ વિસ્તારમાં જમ્મુ-કાશ્મીર પોલીસ સાથે સંયુક્ત ઓપરેશન શરૂ કરવામાં આવ્યું હતું. બપોરે લગભગ સાડા બાર વાગે જવાનોએ આતંકવાદીઓનો સામનો કર્યો હતો. ત્યારબાદ થયેલા ફાયરિંગમાં સેનાના ચાર જવાન ઘાયલ થયા હતા. ઘાયલોમાંથી એકને સારવાર માટે નજીકની કમાન્ડ હોસ્પિટલમાં દાખલ કરવામાં આવ્યો છે, જ્યારે ત્રણની સ્થાનિક સારવાર કરવામાં આવી રહી છે. સુરક્ષા દળોએ વિસ્તારને ઘેરી લીધો છે અને ઓપરેશન હજુ પણ ચાલુ છે.

દરમિયાન જમ્મુ ડિવિઝનના કઠુઆમાં પણ સેનાએ આતંકીઓ સાથે એન્કાઉન્ટર કર્યું હતું. આ હુમલામાં જવાનોએ બે આતંકીઓને ઠાર કર્યા હતા. ભારતીય સેનાના રાઇઝિંગ સ્ટાર કોર્પ્સના જવાનોએ કઠુઆના ખંડારામાં ચાલી રહેલા ઓપરેશનમાં બે આતંકવાદીઓને ઠાર કર્યા છે. આ વિસ્તારમાં હજુ પણ ઓપરેશન ચાલુ છે.