મુન્દ્રામાં DRI ને એક મોટી સફળતામાં મળી છે. જેમાં DRI અમદાવાદ ઝોનલ યુનિટે રેડીમેડ ગારમેન્ટ તરીકે જાહેર કરાયેલ કન્સાઇનમેન્ટમાં છુપાવેલ વિદેશી સિગારેટના કન્ટેનર લોડને જપ્ત કર્યું છે. આ કન્ટેનરમાંથી 80.1 લાખ સિગારેટની સ્ટીક્સ મળી આવી હતી જેની અંદાજિત બજાર કિંમત રૂ.16 કરોડ આંકવામાં આવી રહી છે.
DRI ને મળી હતી ચોક્કસ બાતમી
મળેલી ચોક્કસ બાતમીના આધારે DRI અમદાવાદના અધિકારીઓએ કંબોડિયાના ફ્નોમ પેન્હ બંદરેથી મોકલેલ આયાત કન્ટેનરને મુન્દ્રા બંદર પર અટકાવ્યું હતું. જો કે આ કન્સાઇનમેન્ટને રેડીમેઇડ ગાર્મેન્ટ્સ તરીકે જાહેર કરવામાં આવ્યું હતું અને તે હજીરા પોર્ટ ઉતારવાનું નક્કી કરવામાં આવ્યું હતું. જેમાં DRI દ્વારા શંકાના આધારે તપાસ કરવામાં આવી હતી.
ગારમેન્ટની રો પાછળ સિગારેટ હતી
ઉપરોક્ત માલસામાનની વિગતવાર તપાસ દરમિયાન, અધિકારીઓએ નોંધ્યું કે કન્ટેનરમાં પહેલી રો રેડીમેઇડ ગારમેન્ટ્સની હતી જો કે, તેની પાછળ તમામ પેકેજોમાં વિદેશી મૂળની સિગારેટ ગોલ્ડ ફ્લેકસ હતી. આ જથ્થો મળી આવતા DRI દ્વારા તે મુજબ પંચનામાની કાર્યવાહી હેઠળ કુલ 80.1 લાખની સ્ટીક્સ જપ્ત કરવામાં આવી હતી. જપ્ત કરાયેલી સિગારેટની કિંમત અંદાજે રૂ.16 કરોડ છે. એવું પણ જોવામાં આવ્યું હતું કે જપ્ત કરાયેલી સિગારેટના પેકેટો પર મેડ ઇન ઇન્ડિયાનું ચિહ્ન હતું. નકલી સિગારેટ અથવા તેવી જ રીતે આયાત કરવાના પ્રયાસની શક્યતા ઓળખવા માટે અધિકારીઓ ક્ષેત્રના નિષ્ણાતોના સંપર્કમાં છે. વધુ તપાસ ચાલુ છે.
અગાઉ 36 લાખનો જથ્થો જપ્ત કરાયો હતો
ઉલ્લેખનીય છે કે, બે મહિના પહેલા આવી જ કામગીરીમાં ડીઆરઆઈ અધિકારીઓએ 36 લાખ વિદેશી મૂળની સિગારેટ જપ્ત કરી હતી, જે મુંદ્રા પોર્ટ પર દાણચોરી કરવાનો પ્રયાસ કરવામાં આવ્યો હતો. જપ્તી તેના દાણચોરી વિરોધી આદેશ પ્રત્યે ડીઆરઆઈની પ્રતિબદ્ધતા દર્શાવે છે અને દાણચોરીની સિન્ડિકેટને નોંધપાત્ર ફટકો પડશે.
