ડેંગ્યુ સામે લડવા માટે પીઓ આ ચાર જ્યુસ, ફટાફટ વધશે પ્લેટલેટ્સ

• આ સીઝનમાં ડેંગ્યુ વધી જતો હોય તેવું લાગી રહ્યું છે. તમારી આસપાસ પણ જો ડેંગ્યુના દર્દી હોય તો તેને ઘરે બનાવેલો આ જ્યુસ પીવડાવો, તેના પ્લેટલેટ્સ ઝડપથી વધી જશે

HD ન્યુઝ ડેસ્કઃ વરસાદ અને ઠંડીની વચ્ચેના સમયગાળામાં ડેન્ગ્યુ થવાનું પ્રમાણ વધી જતું હોય છે. આ દરમિયાન મચ્છર અને ગંદા પાણીનો ઠેરઠેર ત્રાસ હોય છે. મચ્છર કરડવાથી તાવ, માથાનો દુખાવો, સ્નાયુ અને સાંધાનો દુખાવો થાય છે. આ દરમિયાન સૌથી મહત્ત્વની બાબત પ્લેટલેટ્સમાં ઘટાડો થવો એ છે. આવી સ્થિતિમાં ડૉક્ટર પાસે જવું જરૂરી છે, પરંતુ આમાંથી ઘરે બનાવેલા કેટલાક જ્યુસ પીવાથી પ્લેટલેટ્સ ઝડપથી વધારી શકાય છે.

પપૈયાના પાનનો રસ

ડેન્ગ્યુમાં પ્લેટલેટ્સ વધારવા માટે પપૈયાના પાનનો રસ સૌથી અસરકારક ઉપાય માનવામાં આવે છે. પપૈયાના પાનમાં રહેલા એન્ઝાઇમ પ્લેટલેટ્સ વધારવામાં મદદ કરે છે. તે એન્ટીઑકિસડન્ટ ધરાવે છે, જે શરીરની રોગપ્રતિકારક શક્તિને મજબૂત કરવામાં મદદ કરે છે અને પ્લેટલેટ્સની સંખ્યામાં વધારો કરે છે. પપૈયાના તાજા પાંદડાને ધોઈને તેમાંથી રસ કાઢો. તેને દિવસમાં બે વાર પીઓ. તે કડવો હોઈ શકે છે, પરંતુ તેની અસર ખૂબ સારી છે.

દાડમનો રસ

દાડમમાં વિટામિન સી અને એન્ટીઓક્સીડેન્ટ ભરપૂર માત્રામાં હોય છે, જે શરીરમાં પ્લેટલેટ્સની સંખ્યા વધારવામાં મદદ કરે છે. ડેન્ગ્યુ દરમિયાન નબળાઈ દૂર કરવા અને એનર્જી જાળવી રાખવા માટે દાડમનો રસ સારો વિકલ્પ છે. દાડમનો તાજો રસ કાઢીને નિયમિત સવાર-સાંજ પીવો. તેનાથી શરીરને જરૂરી પોષક તત્વોની સપ્લાય થશે અને પ્લેટલેટ્સની ઉણપ દૂર થશે.

એલોવેરા જ્યૂસ

એલોવેરા માત્ર ત્વચા અને વાળ માટે જ નહીં, પરંતુ ડેન્ગ્યુ માટે પણ ખૂબ જ ફાયદાકારક સાબિત થઈ શકે છે. તે શરીરની રોગપ્રતિકારક શક્તિને મજબૂત બનાવે છે અને રક્ત કોશિકાઓ વધારવામાં મદદ કરે છે. તેમાં વિટામિન અને મિનરલ્સ ભરપૂર માત્રામાં હોય છે, જે ડેન્ગ્યુ સામે લડવામાં મદદ કરે છે. તાજા એલોવેરામાંથી પલ્પ કાઢીને જ્યુસ તૈયાર કરો અને તેને દિવસમાં એક કે બે વાર પીવો. જો તમે ઈચ્છો તો તેનો સ્વાદ વધારવા માટે તેમાં થોડું મધ પણ ઉમેરી શકો છો.

ગાજર અને બીટરૂટનો રસ

ગાજર અને બીટરૂટ બંને લોહીને શુદ્ધ કરવા અને નવી રક્ત કોશિકાઓના ઉત્પાદનને પ્રોત્સાહન આપવા માટે જાણીતા છે. તેનો રસ પીવાથી પ્લેટલેટ્સની ઉણપને દૂર કરવામાં મદદ મળે છે અને શરીરમાં રક્ત પરિભ્રમણ સુધરે છે. ગાજર અને બીટરૂટને ધોઈને તેના નાના-નાના ટુકડા કરો અને તેને મિક્સરમાં પીસીને જ્યુસ બનાવો. આ જ્યુસ દરરોજ એક વખત પીવો. તેને પીવાથી પ્લેટલેટ્સ તો વધશે જ, પરંતુ શરીરને જરૂરી વિટામિન્સ અને મિનરલ્સ પણ મળી જશે.

આ પણ વાંચોઃ ડેંગ્યુમાંથી રિકવરી માટે દર્દીને ખવડાવો આ ખોરાક, થશે પહેલા જેવા ફિટ