‘નેહરુ-કોંગ્રેસ સાથે સ્પર્ધા કરવા માટે નેતાજી નામનો ઉપયોગ ના કરો’: કંગના ઉપર બગડ્યા સુભાષ ચંદ્ર બોઝના પૌત્ર

નવી દિલ્હી, 7 એપ્રિલ : નેતાજી સુભાષ ચંદ્ર બોઝના પરિવારે બોલિવૂડ અભિનેત્રી અને હિમાચલની મંડી બેઠક પરથી ભાજપના ઉમેદવાર કંગના રનૌતની તેમની ટિપ્પણી માટે ટીકા કરી છે જેમાં કંગનાએ સુભાષ ચંદ્ર બોઝને ભારતના પ્રથમ વડા પ્રધાન કહ્યા હતા. સુભાષ ચંદ્ર બોઝના પૌત્ર ચંદ્ર કુમાર બોઝે X પરની એક પોસ્ટમાં કહ્યું કે કોઈએ પોતાની રાજકીય મહત્વાકાંક્ષાઓ માટે ઈતિહાસને વિકૃત ન કરવો જોઈએ.

અભિનેતામાંથી રાજકારણી બનેલી કંગના રનૌતની નિંદા કરતા ચંદ્ર કુમાર બોઝે કહ્યું કે કંગનાનું નિવેદન ઇતિહાસને વિકૃત કરવાનો અને રાજકીય લાભ માટે બોઝના વારસા સાથે ચેડા કરવાનો પ્રયાસ છે. આની સખત નિંદા કરીએ છીએ.

‘નેહરુ ભારતના પ્રથમ વડાપ્રધાન હતા’

કંગનાએ હાલમાં જ બોઝ ભારતના પ્રથમ વડાપ્રધાન હોવાનું કહીને વિવાદ ઉભો કર્યો હતો. આ દાવાને રદિયો આપતા, બોઝના પૌત્ર, ચંદ્ર બોઝે જણાવ્યું હતું કે “વિભાજન પછી નેહરુ ભારતના પ્રથમ વડાપ્રધાન હતા. આ ઈતિહાસ છે. આને કોઈ બદલી શકે નહીં.” આ સિવાય તેમણે કહ્યું, “નેહરુ અને કોંગ્રેસ સાથે સ્પર્ધા કરવા માટે નેતાજીના નામનો ઉપયોગ કરવામાં આવી રહ્યો છે, જે ખૂબ જ વાંધાજનક છે.”

‘નેહરુ અને નેતાજી વચ્ચે મતભેદો હતા એ વાત સાચી છે’

ચંદ્ર બોઝે આ વાત સ્વીકારી અને કહ્યું, “નેતાજી અને નેહરુ વચ્ચે મતભેદો હોવા છતાં તેઓ એકબીજાને માન આપતા હતા. જો આવું ન થયું હોત તો નેતાજીએ આઝાદ હિંદ ફોજની બ્રિગેડનું નામ નેહરુ અને ગાંધીના નામ પર ન રાખ્યું હોત.

હિમાચલ પ્રદેશમાં કંગના રનૌતે કહ્યું હતું કે નેતાજી સુભાષ ચંદ્ર બોઝ ભારતના પ્રથમ વડાપ્રધાન હતા, જવાહરલાલ નેહરુ નહીં. આ અંગે કોંગ્રેસે આકરા પ્રહારો કર્યા છે. આ પછી, સોશિયલ મીડિયા પર તેની આકરી ટીકા પણ થઈ રહી હતી, જેનો તેણે જવાબ આપ્યો છે.

આ વિવાદ પર કંગના રનૌતનો શું જવાબ હતો?

કંગના રનૌતે ટીકાકારોને કહ્યું છે કે આ તમારા આઈક્યુ લેવલથી ઉપર છે. આસામના મુખ્યમંત્રી હિમંતા બિસ્વા સરમાએ પણ કંગના રનૌતને ટેકો આપતા કહ્યું કે આઝાદીના ચાર વર્ષ પહેલા 1943માં નેતાજી સુભાષ ચંદ્ર બોઝે આઝાદ હિંદ સરકારની રચના કરી હતી, જેને વિશ્વના નવ દેશોએ ભારતની સત્તાવાર સરકાર તરીકે માન્યતા આપી હતી. .