ડોનાલ્ડ ટ્રમ્પના નિશાના પર યુક્રેન, કહ્યું ‘રશિયા સાથે યુદ્ધ માટે ઝેલેન્સકી જવાબદાર’

રશિયા, 18 ઓકટોબર :   રશિયા અને યુક્રેન વચ્ચે ચાલી રહેલા યુદ્ધને લઈને અમેરિકાના પૂર્વ પ્રમુખ ડોનાલ્ડ ટ્રમ્પે મોટું નિવેદન આપ્યું છે. ટ્રમ્પે કહ્યું છે કે રશિયા સાથેના યુદ્ધ માટે યુક્રેનના પ્રમુખ વોલોદિમિર ઝેલેન્સકી જવાબદાર છે. તેણે કહ્યું છે કે ઝેલેન્સકી માત્ર યુદ્ધને સમાપ્ત કરવામાં નિષ્ફળ રહેવા માટે જ નહીં પરંતુ તેને શરૂ કરવામાં મદદ કરવા માટે પણ દોષિત છે. પ્રમુખ ઝેલેન્સકી આ વર્ષે સપ્ટેમ્બરમાં અમેરિકાના ભૂતપૂર્વ પ્રમુખ ડોનાલ્ડ ટ્રમ્પને પણ મળ્યા હતા. આ દરમિયાન તેમણે ટ્રમ્પને કહ્યું હતું કે પુતિન યુદ્ધ જીતી શકે નહીં.

શું યુક્રેનને લઈને અમેરિકાનું વલણ બદલાશે?
અમેરિકાના ભૂતપૂર્વ પ્રમુખ ડોનાલ્ડ ટ્રમ્પે મોસ્કો સાથે શાંતિ સ્થાપવામાં નિષ્ફળ રહેવા બદલ યુક્રેનના પ્રમુખ ઝેલેન્સકીની ટીકા કરી છે. તેમણે સૂચન કર્યું છે કે યુક્રેન શાંતિ સમજૂતી માટે આગળ આવવું જોઈએ. ખાસ વાત એ છે કે આ પહેલા પણ અનેક અવસરો પર ટ્રમ્પ યુક્રેનના પ્રમુખને યુદ્ધ માટે જવાબદાર ગણાવી ચૂક્યા છે. ઝેલેન્સકી વિરુદ્ધ ટ્રમ્પના વારંવારના નિવેદનોને કારણે અનુમાન લગાવવામાં આવી રહ્યું છે કે તેઓના પ્રમુખ બન્યા બાદ યુક્રેન અને અમેરિકાના સંબંધોમાં બદલાવ આવી શકે છે. ટ્રમ્પ અગાઉ પણ કહી ચૂક્યા છે કે તેઓ રશિયા અને યુક્રેન વચ્ચેના યુદ્ધનો અંત લાવી શકે છે.

અમેરિકાએ લશ્કરી મદદ કરી
આ દરમિયાન અહીં એ નોંધનીય છે કે રિપબ્લિકન પાર્ટીના વિરોધને નજરઅંદાજ કરીને અમેરિકા ફરી એકવાર યુક્રેનની મદદ માટે આગળ આવ્યું છે. પ્રમુખ જો બિડેને કિવ માટે $425 મિલિયનના હથિયાર પેકેજની જાહેરાત કરી છે. આ પેકેજમાં એર ડિફેન્સ સિસ્ટમ, બખ્તરબંધ વાહનો અને અન્ય હથિયારોનો સમાવેશ થાય છે. બિડેન નવેમ્બરમાં યુક્રેનના સાથીઓની વર્ચ્યુઅલ મીટિંગ પણ કરશે.

આ પણ જાણો
સૈન્ય સહાય વચ્ચે, યુક્રેનને રશિયા પર પશ્ચિમી નિર્મિત લાંબા અંતરની મિસાઇલો છોડવાની મંજૂરી આપવામાં આવશે કે કેમ તે અંગે હાલમાં કોઈ માહિતી નથી. વ્હાઇટ હાઉસે જણાવ્યું હતું કે $425 મિલિયન યુએસ પેકેજમાં “વધારાની હવાઈ સંરક્ષણ ક્ષમતાઓ, હવાથી જમીન પરના શસ્ત્રો, સશસ્ત્ર વાહનો અને યુક્રેનની તાત્કાલિક જરૂરિયાતોને પહોંચી વળવા માટે મહત્વપૂર્ણ શસ્ત્રોનો સમાવેશ થાય છે.”

આ પણ વાંચો : મહારાષ્ટ્ર સરકારને ચૂંટણીપંચનો મોટો ફટકો: આચારસંહિતા ભંગના કિસ્સામાં મોટી કાર્યવાહી