માત્ર 1 રૂપિયામાં જ ખરીદી શકાય છે સોનું, જાણો કઈ રીતે

નવી દિલ્હી, તા. 17 નવેમ્બર, 2024: ભારતીયોમાં સોનાનું આકર્ષણ પહેલાથી જ રહ્યું છે. સોનાને સલામત રોકાણનું સાધન ગણવામાં આવે છે. આજે સોનાના ભાવ આસમાને આંબી ગયા છે. તેથી મધ્યમ વર્ગ માટે સોનું ખરીદવું હાલ મુશ્કેલ બન્યું છે. લગ્નસરાની સિઝનમાં પણ લોકો શુકન પૂરતું સોનું ખરીદી રહ્યા છે. ડિજિટલ ગોલ્ડ દ્વારા તમે માત્ર 1 જ રૂપિયામાં સોનું ખરીદી શકો છો.

ડિજિટલ ગોલ્ડ શું છે?

ડિજિટલ સોનાને ગોલ્ડ-બેક્ડ ડિજિટલ એસેટ પણ કહી શકાય. એટલે કે, જ્યાં રોકાણકારો સોનાની કિંમતોના આધારે ડિજિટલ સ્વરૂપમાં સોનામાં રોકાણ કરે છે. ભૌતિક સ્વરૂપમાં સોનું ખરીદવાને બદલે, સમગ્ર પ્રક્રિયા ઓનલાઇન કરવામાં આવે છે. ઉદાહરણ તરીકે, તમે આજે એક ગ્રામ ડિજિટલ સોનામાં રોકાણ કરશો, આ સોનું તમારા ડિજિટલ વૉલેટમાં નિશ્ચિત કિંમતે આવી જશે.

જે દિવસે તમને લાગે છે કે તમારા ખરીદેલા સોનાની કિંમતમાં વધારો થયો છે અને તમારે તમારો નફો બુક કરાવવો પડશે, તમે તેને વેચીને તમારો નફો બુક કરી શકો છો. હાલમાં તમે સેફગોલ્ડ બ્રાન્ડ સાથે એમએમટીસી-પીએએમપી ઇન્ડિયા પ્રાઇવેટ લિમિટેડ અને ડિજિટલ ગોલ્ડ ઇન્ડિયા પ્રાઇવેટ લિમિટેડ, સરકારી કંપની એમએમટીસી અને સ્વિસ કંપની એમકેએસ પીએએમપીના સંયુક્ત સાહસ ઓગમોન્ટ ગોલ્ડનું ડિજિટલ ગોલ્ડ ખરીદી શકો છો.

માત્ર 1 રૂપિયાના રોકાણથી પણ ખરીદી શકો છો સોનું

જો તમે આજે કોઈ ઝવેરાતની દુકાન પર જશો, તો તમને 100 રૂપિયામાં પણ સોનાનું કંઈ નહીં મળે. જો કે, તમે એક રૂપિયામાં ડિજિટલ સોનામાં રોકાણ કરી શકો છો. સૌથી મહત્વની બાબત એ છે કે તમે અહીં જે સોનું ખરીદો છો તે શુદ્ધ 24 કેરેટ સોનું છે. જો તમે ડિજિટલ ગોલ્ડમાં રોકાણ કરવા માંગતા હો, તો તમે તેને ગૂગલ પે, ફોનપે અને પેટીએમ દ્વારા પણ કરી શકો છો. આ સિવાય ડિજિટલ ગોલ્ડ એમેઝોન પે, ફ્રીચાર્જ, મોબિક્વિક અને એચડીએફસી સિક્યોરિટીઝ જેવા ઈ-વોલેટ દ્વારા પણ ખરીદી શકાય છે. તમને જણાવી દઈએ કે, ગૂગલ પેએ ગયા વર્ષે એપ્રિલમાં ડિજિટલ ગોલ્ડ લોન્ચ કર્યું હતું. પેટીએમ અને ફોનપેએ 2017માં ડિજિટલ ગોલ્ડ અને 2018માં મોબિક્વિકે ડિજિટલ ગોલ્ડનું વેચાણ શરૂ કર્યું હતું.

આ પણ વાંચોઃ શેર બજાર માટે ખુશખબર, બ્રોકરેજ કંપની CLSA ફરી ભારતમાં રોકાણ વધારશે