કોંગ્રેસ માટે એકનાથ શિંદે બની શકે છે ડીકે શિવકુમાર, ભાજપના મોટા નેતાએ કર્યો ચોંકાવનારો દાવો

બેંગલુરુ, 01 માર્ચ 2025: ભારતીય જનતા પાર્ટીની કર્ણાટક યૂનિટે એક ભડકાઉ નિવેદન આપ્યું છે, જેમાં નાયબ મુખ્યમંત્રી ડીકે શિવકુમાર અને મહારાષ્ટ્રના એકનાથ શિંદેની વચ્ચે સમાનતાઓ દર્શાવી છે. વિપક્ષના નેતા આર અશોકે કહ્યું કે, કોંગ્રેસમાં કેટલાય લોકો છે, જે એકનાથ શિંદે જેવા બની શકે છે. ડીકે શિવકુમાર તેમાંથી એક હોય શકે છે. તેમણે કહ્યું કે, કોંગ્રેસના દિગ્ગજ નેતા પાર્ટીની અંદર વિભાજનની કોશિશ કરી શકે છે.

અશોકનું આ નિવેદન ડીકે શિવકુમારની ભાજપની નજીક જવાની અટકળો વચ્ચે આવ્યું છે. ડેપ્યુટી સીએમ કોયમ્બતૂરમાં ઈશા ફાઉન્ડેશનના મહાશિવરાત્રિ કાર્યક્રમમાં સામેલ થવા ગયા હતા. જ્યાં કેન્દ્રીય ગૃહમંત્રી અમિત શાહ સાથે પણ હાજર હતા.

‘શિંદે જેવી ઘટના કર્ણાટકમાં પણ થઈ શકે?

ભાજપના નેતા શ્રીરામુલુએ પણ નામ લેવાનું ટાળ્યું અને શુક્રવારે કહ્યું કે મહારાષ્ટ્ર જેવી “શિંદે ઘટના” કર્ણાટકમાં પણ બની શકે છે. તેમણે કહ્યું, ‘તમે જોશો કે શાસક પક્ષ (કોંગ્રેસ) માં કોણ તેનું નેતૃત્વ કરશે.’ શ્રીરામુલુએ મૈસુરમાં કહ્યું, ‘રાજકારણ એ સ્થિર પાણી નથી. આ વહેતું પાણી છે. આપણે કેટલાક રાજકીય વિકાસ જોઈ રહ્યા છીએ. આપણે જોયું છે કે કેવી રીતે વીરેન્દ્ર પાટિલ જેવા દિગ્ગજ વ્યક્તિને એરપોર્ટ પર લેવાયેલા નિર્ણય દ્વારા મુખ્યમંત્રી પદ પરથી રાજીનામું આપવાની ફરજ પાડવામાં આવી. તેવી જ રીતે, આપણે જોયું છે કે દેવરાજ ઉર્સ સાથે કેવી રીતે વર્તવામાં આવતું હતું.

ડીકે શિવકુમાર શા માટે ચર્ચામાં આવ્યા છે?

બુધવારે ઈશા ફાઉન્ડેશન દ્વારા આયોજિત શિવરાત્રી કાર્યક્રમમાં શિવકુમારે કેન્દ્રીય ગૃહમંત્રી અમિત શાહ અને સદગુરુ જગ્ગી વાસુદેવ સાથે સ્ટેજ શેર કર્યું હતું. અહેવાલો અનુસાર, આનાથી કોંગ્રેસના નેતાઓના એક વર્ગમાં ચિંતા ફેલાઈ છે, જેમને લાગે છે કે શિવકુમાર ભાજપની વિચારધારા સાથે જોડાઈ રહ્યા છે.

2022 માં મહારાષ્ટ્રમાં સરકાર પડી ગઈ

પરિસ્થિતિનો લાભ લેવાનો પ્રયાસ કરતા, ભાજપના નેતા અને વિધાનસભામાં વિપક્ષના નેતા આર અશોકે ગુરુવારે શિવકુમારની સરખામણી મહારાષ્ટ્રના નાયબ મુખ્યમંત્રી એકનાથ શિંદે સાથે કરીને શાસક કોંગ્રેસ પર કટાક્ષ કર્યો. એકનાથ શિંદેના નેતૃત્વ હેઠળની શિવસેનામાં બળવો અને ભાગલાને કારણે 2022 માં મહારાષ્ટ્રમાં મહા વિકાસ આઘાડી (MVA) ગઠબંધન સરકાર પડી ભાંગી હતી.

જોકે, કોંગ્રેસના નેતા અને મંત્રી બીઝેડ ઝમીર અહેમદ ખાને શિવકુમાર ભાજપમાં જોડાઈ શકે તેવી અટકળોને ફગાવી દીધી હતી અને કહ્યું હતું કે કોંગ્રેસ તેમના લોહીમાં છે. તેમણે વિશ્વાસ વ્યક્ત કર્યો કે ડીકે શિવકુમાર કોઈપણ સંજોગોમાં પાર્ટી છોડશે નહીં અને પહેલાની જેમ કોંગ્રેસ પ્રત્યે વફાદાર રહેશે.

આ પણ વાંચો: ટ્રમ્પ સાથે ગરમાગરમી થયા બાદ ઝેલેન્સકીએ માફી માગવાની સ્પષ્ટ ના પાડી દીધી, લંચ વિના નીકળી ગયાં