લોકસભામાં આજથી બે દિવસ બંધારણ પર શરૂ થશે ચર્ચા, કોંગ્રેસ અને ભાજપ આમને-સામને

• રક્ષા મંત્રી રાજનાથ સિંહ ચર્ચાની શરૂઆત કરશે જ્યારે વડાપ્રધાન નરેન્દ્ર મોદી શનિવારે બે દિવસીય ચર્ચાનો જવાબ આપશે

નવી દિલ્હી,13 ડિસેમ્બર: સંસદમાં વિપક્ષના હોબાળા વચ્ચે આજથી બે દિવસ સુધી બંધારણ પર ચર્ચા શરૂ થશે. દેશમાં બંધારણના 75 વર્ષ પૂર્ણ થવા પર લોકસભાથી ચર્ચા શરૂ થશે. રક્ષા મંત્રી રાજનાથ સિંહ ચર્ચાની શરૂઆત કરશે જ્યારે વડાપ્રધાન નરેન્દ્ર મોદી શનિવારે બે દિવસીય ચર્ચાનો જવાબ આપશે. કેન્દ્રીય ગૃહ પ્રધાન અમિત શાહ દ્વારા રાજ્યસભામાં આવી જ ચર્ચા શરૂ કરવામાં આવે તેવી શક્યતા છે. બે દિવસીય ચર્ચા પહેલા વડાપ્રધાન મોદીએ રણનીતિ ઘડવા માટે એક બેઠક યોજી હતી, જેમાં અમિત શાહ અને રાજનાથ સિંહ સિવાય બીજેપી અધ્યક્ષ જેપી નડ્ડાએ પણ ભાગ લીધો હતો.

12 વાગે ચર્ચા શરૂ થશે

મળતી માહિતી મુજબ, આજે શુક્રવારે સવારે 11 વાગ્યાથી લોકસભાની કાર્યવાહી શરૂ થશે. બપોરે 11થી 12 સુધી પ્રશ્નકાળ રહેશે, ત્યારબાદ બપોરે 12 વાગ્યાથી બંધારણના 75 વર્ષની સફર પર ચર્ચા શરૂ થશે. આ ચર્ચા રક્ષા મંત્રી રાજનાથ સિંહ કરશે જેમાં રવિશંકર પ્રસાદ પણ ભાગ લઈ શકે છે. આ ચર્ચામાં ભાજપના 12 થી 15 નેતાઓ ભાગ લેશે.

રાહુલ અને પ્રિયંકા ગાંધી પણ બોલશે

મળતી માહિતી મુજબ, કોંગ્રેસને બંધારણ દિવસ પર ચર્ચા માટે 2 કલાક 20 મિનિટનો સમય મળશે. કોંગ્રેસના પાર્લામેન્ટરી સ્ટ્રેટેજિક ગ્રૂપે સંસદના શિયાળુ સત્ર અને બંધારણ પર ચર્ચા અંગે પણ વાતચીત કરી હતી. કોંગ્રેસના વરિષ્ઠ નેતા રાહુલ ગાંધી અને પ્રિયંકા ગાંધી વાડ્રા બંને ગૃહમાં બોલશે. સૂત્રોના જણાવ્યા મુજબ, રાહુલ ગાંધી આજે જ ચર્ચામાં બોલી શકે છે જ્યારે પ્રિયંકા ગાંધી આવતીકાલે ચર્ચામાં ભાગ લઈ શકે છે. પ્રિયંકાનું આ પહેલું ભાષણ હશે. કોંગ્રેસે બંને દિવસ માટે ગૃહમાં ત્રણ લીટીનો વ્હીપ જારી કર્યો છે અને તેના સાંસદોને બંને દિવસે ગૃહમાં હાજર રહેવા જણાવ્યું છે. કોંગ્રેસ અધ્યક્ષ મલ્લિકાર્જુન ખડગે રાજ્યસભામાં વિપક્ષ વતી ચર્ચાની શરૂઆત કરશે.

પીએમ મોદીએ બેઠક યોજી હતી

બે દિવસીય ચર્ચા પહેલા વડાપ્રધાન મોદીએ રણનીતિ ઘડવા માટે એક બેઠક યોજી હતી, જેમાં અમિત શાહ અને રાજનાથ સિંહ સિવાય બીજેપી અધ્યક્ષ જેપી નડ્ડાએ પણ ભાગ લીધો હતો. આ પહેલા અમિત શાહે જે.પી. નડ્ડા, વાણિજ્ય પ્રધાન પીયૂષ ગોયલ અને સંસદીય બાબતોના પ્રધાન કિરેન રિજિજુ સહિત ભાજપના વરિષ્ઠ પ્રધાનો સાથે સંસદ ભવનમાં તેમના કાર્યાલયમાં બેઠક કરી હતી.

શિયાળુ સત્ર 20 ડિસેમ્બરે સમાપ્ત થશે

સરકાર 13 અને 14 ડિસેમ્બરે લોકસભામાં અને 16 અને 17 ડિસેમ્બરે રાજ્યસભામાં બંધારણ પર ચર્ચા કરવા સંમત થઈ છે. સંસદના શિયાળુ સત્ર દરમિયાન, વિરોધ પક્ષોએ બંધારણ સભા દ્વારા બંધારણને અપનાવવાની 75મી વર્ષગાંઠના અવસર પર બંને ગૃહોમાં ચર્ચાની માંગ કરી હતી. સત્તાધારી પક્ષ અને વિપક્ષ વચ્ચે સમજૂતી થયા બાદ સંસદમાં મડાગાંઠ તૂટી ગઈ હતી. સંસદનું શિયાળુ સત્ર કદાચ 20 ડિસેમ્બરે સમાપ્ત થશે.

આ પણ જૂઓ: દિલ્હી વિધાનસભા ચૂંટણી : કોંગ્રેસની પહેલી યાદી જાહેર, જાણો કોને ક્યાં ટિકિટ મળી