મુંબઈ, 13 મે : મુંબઈમાં હવામાનની પેટર્ન અચાનક બદલાઈ ગઈ છે અને આકાશમાં ગાઢ વાદળો છવાઈ ગયા બાદ ધૂળની ડમરીઓ અને વરસાદ શરૂ થયો છે. મુંબઈમાં દિવસ દરમિયાન અંધારપટ છવાઈ ગયો હતો અને ભારે પવન સાથે તાપમાનમાં ઘટાડો નોંધાયો હતો. હવામાન વિભાગ દ્વારા આજે મુંબઈમાં તોફાન અને વરસાદની ચેતવણી જારી કરવામાં આવી હતી. તાજેતરના અપડેટ મુજબ, હોર્ડિંગ નીચે દટાઈને 3 લોકોના મોત થયા છે અને 59 લોકો ઘાયલ થયા છે.
આ અંગે મુંબઈ પોલીસે જણાવ્યું કે, અચાનક આવેલા આ તોફાનના કારણે ઘાટકોપરની સમતા કોલોનીના રેલવે પેટ્રોલ પંપ પર મેટલનું બોર્ડ પડ્યું હતું, જેના હેઠળ 37 લોકો ઘાયલ થયા હોવાની માહિતી મળી હતી. પરંતુ તાજેતરના અપડેટ મુજબ, આ હોર્ડિંગ નીચે દટાઈ જવાથી ઘાયલ લોકોની સંખ્યા વધીને 59 થઈ ગઈ છે અને 3 લોકોના મૃત્યુ થયા છે. મુંબઈ ફાયર બ્રિગેડ દ્વારા ફસાયેલા લોકોને બચાવવા માટે રેસ્ક્યુ ઓપરેશન હાથ ધરવામાં આવી રહ્યું છે.
ઘણી ફ્લાઈટ્સ ડાયવર્ટ કરવામાં આવી
મળતી માહિતી મુજબ હવામાનમાં અચાનક આવેલા બદલાવને કારણે 15 ફ્લાઈટ ડાયવર્ટ કરવામાં આવી હતી. હવે આ તમામ ફ્લાઈટ્સને મુંબઈ પરત લાવવામાં આવી રહી છે અને મુંબઈ એરપોર્ટ પર ફસાયેલી ઘણી ફ્લાઈટ્સ હવે ટેકઓફ કરી રહી છે. અત્યારે ઘણી ફ્લાઈટ્સ મોડી ચાલી રહી છે, પરંતુ દૃશ્યતા સામાન્ય છે. થોડા સમય પછી ફ્લાઈટ્સ સામાન્ય થઈ જશે તેવી અપેક્ષા છે.
મુંબઈમાં તોફાનને કારણે હોર્ડિંગ પડી ગયા
મુંબઈના ઘાટકોપર વિસ્તારમાં ભારે પવનને કારણે એક હોર્ડિંગ પડી ગયું, જેના કારણે 35 લોકો ઘાયલ થયા. હવે ઘાયલોની સંખ્યા 59 પર પહોંચી ગઈ છે. મુંબઈમાં તોફાની પવનોને કારણે ઘણી ફ્લાઈટ્સ રદ કરવામાં આવી છે. પ્રતિકૂળ હવામાન અને ધૂળના વાવાઝોડાને કારણે, છત્રપતિ શિવાજી મહારાજ ઇન્ટરનેશનલ એરપોર્ટ (CSMIA) એ ઓછી દૃશ્યતા અને તીવ્ર પવનને કારણે લગભગ 66 મિનિટ માટે ફ્લાઈટ કામગીરીને અસ્થાયી રૂપે સ્થગિત કરી દીધી છે.
NDRFની ટીમ તૈનાત
તોફાનના કારણે મુંબઈમાં ઘણી જગ્યાએ ભારે વિનાશ થયો છે. આ ઉપરાંત ઘાટકોપર વિસ્તારમાં NDRFની ટીમને બચાવ કાર્ય માટે તૈનાત કરવામાં આવી છે, જ્યાં NDRFના 67 જવાનો બચાવ કાર્યમાં લાગેલા છે. હવામાન વિભાગના અધિકારી સુષ્મા નાયરે હવામાનમાં આવેલા બદલાવ અંગે નિવેદન આપતા કહ્યું છે કે જે રીતે આજે હવામાનમાં ફેરફાર જોવા મળ્યો હતો તેવી જ સ્થિતિ આવતીકાલે પણ બની શકે છે.
