દેવભૂમિ દ્વારકા : દ્વારકા નજીક ગોઝારો અકસ્માત, 6 લોકોના મૃત્યુના અહેવાલ

દ્વારકા, 28 સપ્ટેમ્બર : દેવભૂમિ દ્વારકા જિલ્લામાં આજે શનિવારે સાંજે ગમખ્વાર અકસ્માત સર્જાયો હતો. આ ઘટનામાં એક લકઝરી બસ, બે કાર તેમજ એક બાઈક એમ ચાર વાહનો વચ્ચે અકસ્માત સર્જાયો છે. જેમાં 6 લોકોના મૃત્યુ થયાના અહેવાલ મળી રહ્યા છે. આ ઉપરાંત 12થી વધુ લોકો ઇજાગ્રસ્ત થયા હોવાનું જાણવા મળી રહ્યું છે. જો કે વહીવટી તંત્ર દ્વારા આ અંગે કોઈ સત્તાવાર જાણકારી આપવામાં આવી નથી. હાલ તો તમામ રેસ્ક્યુની કામગીરી ચાલું હોવાનું જાણવા મળી રહ્યું છે.

ઘાયલોને ખંભાળિયા અને જામનગર ખસેડાયા

મળતી માહિતી મુજબ, દ્વારકાથી અંદાજે 6 કિલોમીટર દૂર બરડીયા ગામ પાસે આ અકસ્માત સર્જાયો હોવાનું જાણવા મળ્યું છે. જેમાં ખાનગી ટ્રાવેલ્સ, જૂનાગઢ પાસીંગની સ્વિફ્ટ કાર, અમદાવાદ પાસીંગની ઈકો કાર વચ્ચે અકસ્માત સર્જાયો હતો. જેમાં એક ટ્રીપલ સવારી બાઈક ચાલક વચ્ચે ઘુસી ગયો હતો. આ અકસ્માતમાં અંદાજે 6 લોકોના મૃત્યુ થયાનું જાણવા મળી રહ્યું છે. ઇજાગ્રસ્તોને ખંભાળિયા અને જામનગર હોસ્પિટલ ખસેડવામાં આવ્યા છે.

મંત્રી મુળુભાઈ અને સાંસદ પૂનમબેન માડમ પહોંચ્યા

દરમિયાન આ ઘટનાની જાણ થતાં મંત્રી મુળુભાઈ બેરા ઉપરાંત સાંસદ પૂનમબેન માડમ ત્વરિત પહોંચ્યા હતા. તેમણેતાત્કાલીક અસરથી રાહત સેવા શરૂ કરી હતી અને વહીવટી તંત્ર સાથે સતત સંપર્કમાં રહીને ઘટનાના ઇજાગ્રસ્તોને સારવાર મળી રહે તેવી વ્યવસ્થા ગોઠવી હતી.