વડોદરાના ડેસરમાં ચકચાર: સગીર દીકરી પર પિતાએ જ આચર્યુ દુષ્કર્મ, આરોપી ફરાર

Vadodara Crime News: વડોદરા જિલ્લાના ડેસર તાલુકાના એક ગામમાં પિતા-પુત્રીના પવિત્ર સંબંધોને કલંકિત કરતો અત્યંત ગંભીર અને માનવતાને શરમાવે એવો બનાવ સામે આવ્યો છે. પોતાના જ ઘરમાં 13 વર્ષ અને 2 મહિનાની સગીર દીકરી પર તેના પિતાએ બળજબરીપૂર્વક દુષ્કર્મ આચર્યું હોવાનો આરોપ સામે આવતા સમગ્ર વિસ્તારમાં ચકચાર મચી ગઈ છે. પીડિતાની માતાએ ડેસર પોલીસ સ્ટેશનમાં પોતાના પતિ વિરુદ્ધ ફરિયાદ નોંધાવતા પોલીસે ગુનો દાખલ કરી તપાસનો ધમધમાટ શરૂ કર્યો છે. સાથે જ ફરાર આરોપીને ઝડપી પાડવા માટે અલગ-અલગ ટીમો કાર્યરત કરવામાં આવી છે.

ઘરેલુ ઝઘડા બાદ મહિલા સંબંધીના ઘરે ગઈ હતી

પોલીસ ફરિયાદમાં જણાવ્યા મુજબ, 28 જૂનના રોજ સાંજના સમયે પતિ-પત્ની વચ્ચે કપડાંને લઈને બોલાચાલી થઈ હતી. સામાન્ય તકરાર થોડા જ સમયમાં ઉગ્ર ઝઘડામાં ફેરવાઈ હતી. વાત વધુ ન વણસે તે માટે મહિલા નજીકમાં જ સીમ વિસ્તારમાં રહેતા પોતાના મહિલા સંબંધીના ઘરે જતી રહી હતી. તે સમયે ઘરમાં માત્ર તેમની 13 વર્ષની દીકરી અને 10 વર્ષનો પુત્ર જ હાજર હતા.

મોડી રાત્રે ઘરે પરત ફરતાં માતા ચોંકી ઊઠી

રાત્રિના લગભગ 12 વાગ્યાના સમયે મહિલા પોતાની બહેન સાથે ઘરે પરત ફરી હતી. ઘરના દરવાજા સામે ખાટલો આડો રાખેલો હોવાથી બંનેએ તેને હટાવી અંદર પ્રવેશ કર્યો હતો. ઘરમાં પ્રવેશતા જ તેઓએ જે દૃશ્ય જોયું તે જોઈ બંનેના હોશ ઉડી ગયા હતા.

ફરિયાદ અનુસાર, પિતા પોતાની જ સગીર દીકરી સાથે દુષ્કર્મ કરી રહ્યો હતો. દીકરી બૂમો ન પાડી શકે તે માટે તેના મોઢામાં કપડું ઠાંસી દેવામાં આવ્યું હતું. માતા અને તેની બહેનને અચાનક ઘરમાં જોઈ આરોપી ગભરાઈ ગયો અને ઉતાવળમાં પોતાના કપડાં સરખા કરીને સ્થળ પરથી ફરાર થઈ ગયો હતો.

દીકરીએ માતાને કહી સમગ્ર હકીકત

આ ઘટનાથી ગભરાયેલી માતાએ તરત જ દીકરીના મોઢામાંથી કપડું કાઢ્યું અને તેને કપડાં પહેરાવી શાંત પાડવાનો પ્રયાસ કર્યો હતો. થોડો સમય બાદ દીકરીએ રડતાં-રડતાં પોતાની માતાને સમગ્ર આપવીતી જણાવી હતી.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

પીડિતાએ જણાવ્યું કે તેનો નાનો ભાઈ ઊંઘી ગયા બાદ પિતાએ તેને પકડી લીધી હતી. તેણે વિરોધ કરવાનો પ્રયાસ કર્યો હતો, પરંતુ આરોપીએ તેના મોઢામાં કપડું ઠાંસી દીધું હતું અને બંને હાથ પકડી રાખીને બળજબરીપૂર્વક તેની સાથે દુષ્કર્મ આચર્યું હતું. ડરના કારણે તે કોઈ પ્રકારની મદદ માટે બૂમ પણ પાડી શકી નહોતી.

પરિવારજનોની હાજરીમાં પોલીસ ફરિયાદ

ઘટનાની ગંભીરતા સમજી માતાએ પોતાની બહેન અને બનેવીને સમગ્ર વાત કરી હતી. ત્યારબાદ તેઓ સીધા ડેસર પોલીસ સ્ટેશન પહોંચ્યા હતા, જ્યાં પોતાના જ પતિ વિરુદ્ધ સગીર પુત્રી પર દુષ્કર્મ આચરવાનો આરોપ મૂકતી લેખિત ફરિયાદ નોંધાવી હતી.

ફરિયાદના આધારે પોલીસે ભારતીય ન્યાય સંહિતાની સંબંધિત જોગવાઈઓ તેમજ પોક્સો (POCSO) અધિનિયમ હેઠળ ગુનો નોંધી કાયદેસરની કાર્યવાહી શરૂ કરી છે.

તબીબી તપાસ સહિત પુરાવા એકત્ર કરવાની કાર્યવાહી

પોલીસે પીડિતાનું તાત્કાલિક તબીબી પરીક્ષણ કરાવવાની કાર્યવાહી હાથ ધરી છે. ઉપરાંત ઘટનાસ્થળેથી જરૂરી પુરાવા એકત્ર કરવામાં આવી રહ્યા છે અને પીડિતાનું નિવેદન પણ નિયમ મુજબ નોંધવામાં આવી રહ્યું છે. તપાસ દરમિયાન ફોરેન્સિક સહિતના તમામ પાસાઓને ધ્યાનમાં રાખીને કાર્યવાહી કરવામાં આવી રહી હોવાનું પોલીસ સૂત્રોએ જણાવ્યું છે.

ફરાર આરોપીને ઝડપી પાડવા પોલીસના ચક્રો ગતિમાન

ઘટના બાદથી આરોપી પિતા ફરાર થઈ ગયો હોવાનું સામે આવ્યું છે. પોલીસે તેની શોધખોળ માટે અલગ-અલગ સ્થળોએ દરોડા પાડવાની કાર્યવાહી શરૂ કરી છે. સંબંધીઓ અને ઓળખીતાઓની પણ પૂછપરછ કરવામાં આવી રહી છે જેથી આરોપીને ઝડપથી કાયદાના હવાલે કરી શકાય.

ગામમાં આક્રોશ અને ચકચાર

પોતાની જ દીકરી સાથે પિતા દ્વારા દુષ્કર્મ આચરવામાં આવ્યું હોવાના આરોપથી સમગ્ર ગામ અને આસપાસના વિસ્તારમાં ભારે આક્રોશ જોવા મળી રહ્યો છે. જે વ્યક્તિ પરિવારની સુરક્ષા અને સંભાળની જવાબદારી નિભાવે છે, તેના પર જ આવા ગંભીર આરોપ સામે આવતા લોકોમાં દુઃખ અને રોષની લાગણી ફેલાઈ છે.

પોલીસે જણાવ્યું છે કે કેસની તપાસ તમામ પાસાઓને ધ્યાનમાં રાખીને ગંભીરતાથી કરવામાં આવી રહી છે. આરોપીની ધરપકડ બાદ વધુ પૂછપરછ કરવામાં આવશે અને કાયદા મુજબ કડક કાર્યવાહી કરવામાં આવશે. પીડિતાને જરૂરી કાનૂની અને માનસિક સહાય પણ ઉપલબ્ધ કરાવવામાં આવશે.

આ પણ વાંચો: અદાણીની મોટી ડીલ : વિઝિંજામ પોર્ટ પ્રાઇવેટ લિમિટેડમાં 13 હજાર કરોડનું કરશે રોકાણ