દિલ્હી હાઈકોર્ટે પોલીસને બળાત્કાર પીડિતાની ઓળખ જાહેર કરવા બદલ રાહુલ ગાંધી વિરુદ્ધ FIRની માંગ કરતી અરજી પર રિપોર્ટ રજૂ કરવાનો નિર્દેશ આપ્યો છે. એવો આરોપ છે કે દિલ્હીના સ્મશાનમાં બળાત્કાર અને હત્યા કરાયેલી નવ વર્ષની દલિત બાળકીની ઓળખ રાહુલ ગાંધી દ્વારા કથિત રીતે જાહેર કરવામાં આવી હતી. એક્ટિંગ ચીફ જસ્ટિસ મનમોહન અને જસ્ટિસ મિની પુષ્કર્ણની ડિવિઝન બેન્ચે પોલીસને 10 દિવસમાં રિપોર્ટ દાખલ કરવાનો આદેશ આપ્યો હતો અને 21 ડિસેમ્બરે સુનાવણી નક્કી કરી હતી.
રાહુલ ગાંધીએ ટ્વિટ કરી હતી
ખંડપીઠ મકરંદ સુરેશ મ્હાડલેકર નામના કાર્યકર્તા દ્વારા દાખલ કરવામાં આવેલી પીઆઈએલ પર વિચારણા કરી રહી હતી, જેમાં ગાંધીના ટ્વિટ સામે વાંધો હતો, જેમાં મૃત છોકરીના માતા-પિતાની તસવીરો હતી. મ્હાડલેકરે કહ્યું કે આ ફોટોગ્રાફ્સ પીડિત છોકરીની ઓળખ છતી કરે છે અને પરિણામે જુવેનાઈલ જસ્ટિસ (કેર એન્ડ પ્રોટેક્શન ઓફ ચિલ્ડ્રન) એક્ટ (જેજે એક્ટ) અને પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સ એક્ટ, 2012 (પોક્સો એક્ટ)નું ઉલ્લંઘન છે. તેમણે કહ્યું કે જુવેનાઈલ જસ્ટિસ એક્ટની કલમ 74 અને POCSO એક્ટની કલમ 23(2) મુજબ પીડિતા અથવા તેના પરિવારના સભ્યોની ઓળખ જાહેર ન કરવાનો આદેશ છે.
બનાવ 3 વર્ષ પૂર્વેનો હોવા છતાં કાર્યવાહી નહીં
સુનાવણી દરમિયાન, અરજદાર તેમજ નેશનલ કમિશન ફોર પ્રોટેક્શન ઓફ ચાઈલ્ડ રાઈટ્સ (NCPCR) તરફથી હાજર રહેલા વકીલે બેંચને કહ્યું કે આ ઘટના લગભગ ત્રણ વર્ષ પહેલા બની હોવા છતાં, દિલ્હી પોલીસે કોઈ કાર્યવાહી કરી નથી. NCPCRના વકીલે કહ્યું કે દિલ્હી પોલીસે આ મામલે FIR નોંધવી જોઈએ. રાહુલ ગાંધી તરફથી હાજર રહેલા એડવોકેટ તરન્નુમ ચીમાએ બેન્ચને જણાવ્યું કે કોર્ટે તેમને ઔપચારિક નોટિસ જારી કરી નથી. બેન્ચે કહ્યું કે તે પહેલા દિલ્હી પોલીસના સ્ટેટસ રિપોર્ટની તપાસ કરશે અને પછી નક્કી કરશે કે શું કરવાની જરૂર છે.
સ્મશાનમાં 9 વર્ષની બાળકી ઉપર થયો હતો બળાત્કાર
આ મામલો દિલ્હીના પુરાના નાંગલ વિસ્તારમાં સ્મશાન ભૂમિમાં લગાવેલા કુલરમાંથી પાણી લેવા ગયેલી નવ વર્ષની બાળકી પર બળાત્કારનો છે, જ્યારે સ્મશાનભૂમિના પૂજારીએ અન્ય ત્રણ સાથે મળીને આ ક્રૂર આચર્યું હતું. કાર્ય ગાંધી ત્યારબાદ છોકરીના માતા-પિતાને મળ્યા અને તેમને સાંત્વના આપી, જેના ફોટોગ્રાફ્સ તેમના સત્તાવાર ટ્વિટર હેન્ડલ પરથી ટ્વીટ કરવામાં આવ્યા. 4 ઓગસ્ટ, 2021 ના રોજ, NCPCR એ ટ્વીટની નોંધ લીધી અને ટ્વિટરને ગાંધીની ટ્વીટને દૂર કરવા નિર્દેશ આપ્યો કારણ કે તેમાં બળાત્કાર પીડિતાના પરિવારના સભ્યો વિશે સંવેદનશીલ માહિતી હતી.
