બાંગ્લાદેશીઓના ભારતમાં ગેરકાયદે વસવાટના રેકેટનો થયો પર્દાફાશ

નવી દિલ્હી, તા. 22 માર્ચ, 2025: ભારતમાંથી વધુ એક વખત ગેરકાયદે વસવાટ કરતાં બાંગ્લાદેશીઓ ઝડપાયા હતા. દિલ્હી પોલીસે ભારતમાં ગેરકાયદેસર રીતે બાંગ્લાદેશીઓને સ્થાયી કરવામાં સંડોવાયેલી એક ગેંગનો પર્દાફાશ કર્યો હતો. આ કેસમાં પોલીસે 18 બાંગ્લાદેશી અને 8 ભારતીયોની ધરપકડ કરી હતી. જે નકલી દસ્તાવેજો પર બાંગ્લાદેશી લોકોને અસલી પાસપોર્ટ આપતા હતા. ધરપકડ કરાયેલા લોકો પર બાંગ્લાદેશીઓને ભારતમાં ગેરકાયદેસર રીતે સ્થાયી થવામાં મદદ કરવાનો આરોપ છે.  હાલમાં પોલીસે 8 બાંગ્લાદેશી નાગરિકોને દેશનિકાલ કરવાની પ્રક્રિયા પણ શરૂ કરી દીધી છે. ધરપકડ કરાયેલા લોકોમાં ચાર ભારતીયોની પણ ઓળખ કરવામાં આવી છે, જેઓ બાંગ્લાદેશી નાગરિકો માટે નકલી આધાર કાર્ડ બનાવવામાં સામેલ હતા. ઝુલ ઇસ્લામ આ રેકેટનો મુખ્ય સૂત્રધાર હતો અને સમગ્ર નેટવર્ક ચલાવતો હતો.

આ રીતે ભારતમાં કરતા હતા ઘૂસણખોરી

પોલીસે આ કેસમાં વધુમાં જણાવ્યું હતું કે ભારત-બાંગ્લાદેશ સરહદ પર એક દુકાનમાં ચાલતા હવાલા રેકેટનો પણ પર્દાફાશ કર્યો હતો. આરોપીઓમાંથી એક વારંવાર બાંગ્લાદેશ જતો હતો. આ ટોળકીએ તેમને દેશમાં પ્રવેશવામાં મદદ કરી એટલું જ નહીં, પરંતુ તેમને નોકરીઓ અને નકલી દસ્તાવેજો પણ પૂરા પાડ્યા હતા. તેમની કાર્યપદ્ધતિમાં બાંગ્લાદેશથી વ્યક્તિઓને આસામ અને પછી દિલ્હી લાવવાનો સમાવેશ થતો હતો, જ્યાં તેમના માટે રહેવાની વ્યવસ્થા કરવામાં આવતી હતી. અહીં તેમના નકલી ઓળખ કાર્ડ બનાવવામાં આવતા હતા અને તેમને નાની-નાની નોકરીઓ આપવામાં આવતી હતી.

🛂Delhi Police @CrimeBranchDP arrested illegal Bangladeshi immigrants and their Indian facilitator.

🛂The syndicate was actively involved in trafficking Bangladeshi nationals to India facilitating their illegal settlement in Delhi/NCR using forged documents.

🛂Police team… pic.twitter.com/iqQwFZgvED

— Delhi Police (@DelhiPolice) March 21, 2025

નકલી દસ્તાવેજોથી પ્રતિષ્ઠિત શાળામાં બાળકોનું એડમિશન પણ લીધું

આ કેસમાં ઘણા બાંગ્લાદેશીઓની પણ ધરપકડ કરવામાં આવી હતી. તેમણે નકલી દસ્તાવેજો રજૂ કરીને અસલી પાસપોર્ટ મેળવ્યા હતા. તેને એક એરલાઇન કંપનીમાં નોકરી પણ મળી. આ ઉપરાંત, કેટલાક લોકોની ધરપકડ કરવામાં આવી હતી જેમણે ભારતના લોકોને ઉપલબ્ધ EWS ક્વોટાનો લાભ લીધો હતો અને તેમના બાળકોને પ્રતિષ્ઠિત શાળાઓમાં પ્રવેશ અપાવ્યો હતો. આ લોકો આધાર કાર્ડ બનાવવા માટે સ્થાનિક જનપ્રતિનિધિઓ દ્વારા સહી કરેલા દસ્તાવેજો પૂરા પાડતા હતા. જેના કારણે તેમનું આધાર કાર્ડ બની ગયું હતું. આ બાંગ્લાદેશીઓ ભારતમાં જે પણ પૈસા કમાતા હતા, તેઓ હવાલા નેટવર્કનો ઉપયોગ કરીને બાંગ્લાદેશ પાછા મોકલતા હતા.

અમદાવાદમાંથી પણ પકડાયા હતા બાંગ્લાદેશીઓ

દિલ્હીમાં ગેરકાયદેસર રીતે રહેતા બાંગ્લાદેશીઓ પર પોલીસ સતત કડક કાર્યવાહી કરી રહી છે. થોડા દિવસો પહેલા જ દિલ્હી પોલીસે વિવિધ વિસ્તારોમાંથી 24 બાંગ્લાદેશીઓની ધરપકડ કરી હતી. ગત મહિને અમદાવાદમાંથી પણ 50 જેટલા બાંગ્લાદેશીઓ પકડાયા હતા. થોડા દિવસ પહેલા દેવભૂમિ દ્વારકામાંથી ગેરકાયદેસર રીતે ઘૂસેલી પાંચ બાંગ્લાદેશી મહિલાઓને ઝડપી લેવામાં આવી હતી.

આ પણ વાંચોઃ સુરતમાં બનેલા કપડાંની જર્સી પહેરીને રમશે IPLના ખેલાડીઓ